1 An Dios Sarong Misteryo—Totoo daw Iyan?
1 An Dios Sarong Misteryo—Totoo daw Iyan?
Kun ano an tibaad naaraman mo: “An Dios naghihiro sa misteryosong mga paagi.”
“An Ama dai kayang saboton, an Aki dai kayang saboton, asin an Espiritu Santo dai kayang saboton.”—The Athanasian Creed, na naglaladawan sa Trinidad na itinotokdo nin dakol na simbahan kan Kakristianohan.
Kun ano an itinotokdo kan Biblia: Sinabi ni Jesus na an mga nagkukua nin kaaraman dapit sa solamenteng tunay na Dios o ‘nakakamidbid’ sa Saiya mag-aako nin mga bendisyon. (Juan 17:3) Alagad paano kita makakakua nin kaaraman dapit sa Dios kun sia sarong misteryo? Imbes na itago an saiyang sadiri, gusto nia na mamidbid sia kan gabos.—Jeremias 31:34.
Siempre, nungka niatong maaaraman an gabos manongod sa Dios. Inaasahan niato ini huling an saiyang mga kaisipan asin dalan orog na halangkaw kisa kan sa sato.—Parahulit 3:11; Isaias 55:8, 9.
Kun paano makakatabang sa saimo an pakaaram kan katotoohan: Kun an Dios sarong misteryo na dai kayang saboton, taano ta magmamaigot ka pang mamidbid sia? Alagad apuera sa pagtabang nia sa sato na masabotan sia, tinatabangan man nia kita na magin dayupot na katood nia. Ilinadawan nin Dios an maimbod na tawong si Abraham bilang “sakuyang katood,” asin si Hadeng David nin Israel nagsurat: “Mga katood nin KAGURANGNAN an mga may pagkatakot saiya.”—Isaias 41:8; Salmo 25:14, BPV. *
Imposible daw na kita magin dayupot na katood nin Dios? Garo baga iyo, alagad mangnoha an sinasabi kan Guibo 17:27: “[An Dios] bakong harayo sa lambang saro sa sato.” Sa anong paagi? Paagi sa Biblia, itinatao nin Dios an kaipuhan niato tanganing mamidbid siang marhay. *
Sinasabi nia sa sato an saiyang ngaran na Jehova. (Isaias 42:8) Ipinasurat nia an saiyang mga ginibo sa katawohan tanganing mamidbid niato an Persona na igwa kan ngaran na iyan. Orog pa dian, ihinahayag sa sato nin Dios an saiyang mga saboot. Sia ‘maheherakon asin maugayon, haloy na maanggot asin dakula sa karahayan asin katotoohan.’ (Exodo 34:6) An satong mga ginigibo may epekto sa pagmate nia. Halimbawa, kan magrebelde sa saiya an suanoy na nasyon nin Israel, “kinulgan” ninda an boot nia, mantang ikinakaogma nia an mga madonong na nagkukuyog sa saiya.—Salmo 78:40, An Banal na Biblia; Talinhaga 27:11.
[Mga Nota sa Ibaba]
^ par. 6 An Marahay na Bareta Biblia (Bikol Popular Version)
^ par. 7 Para sa dugang pang impormasyon manongod sa kun ano an sinasabi kan Biblia dapit sa Dios, helingon an kapitulo 1 kan librong Ano Man Nanggad an Itinotokdo kan Biblia? na ipinublikar kan Mga Saksi ni Jehova.
[Blurb sa pahina 4]
Kun an Dios sarong misteryosong Trinidad, paano man nanggad niato sia mamimidbid?
[Picture Credit Line sa pahina 4]
The Trinity c.1500, Flemish School, (16th century)/H. Shickman Gallery, New York, USA/The Bridgeman Art Library International
