May Nagputik Na daw sa Saimo?

MAKOLOG nanggad sa boot na maaraman na an saro na pinagtitiwalaan mo nagputik sa saimo. Tibaad ika napasupog, naanggot, o nakamate na trinaydor. Rinaraot nin mga kaputikan an relasyon nin mga mag-amigo asin mag-agom; milyon-milyon na dolyar man an nawawara sa mga tawo huli sa pandadayang kaiba kaiyan.

Kaya, imahinara an saimong mamamatean kun maaraman mo na may nagputik sa saimo manongod sa Dios. Kun ika deboto, grabe an puedeng magin epekto kaiyan sa saimo, siring kan mga parasimbang ini:

● “Pagmate ko, trinaydor ako kan simbahan.”—DEANNE.

● “Naanggot ako. Pagmate ko linoko ako—nasayang sana an mga paglaom asin an kamawotan ko.”—LUIS.

Tibaad mag-alangan ka pa nganing isipon na posibleng may nagputik sa saimo manongod sa Dios. An saimong aram tibaad hale sa saro na pinagtitiwalaan mo asin nungkang tutuyohon na kolgan ka—an saimong mga magurang, padi, pastor, o dayupot na amigo. Tibaad pinaniniwalaan mo na an sarong katokdoan poon kan aki ka pa. Alagad dai ka daw maoyon na puedeng bakong totoo an sarong ideya dawa pinaniniwalaan iyan nin dakol? An katunayan na ini inadmitir kan dating presidente kan Estados Unidos na si Franklin D. Roosevelt, huling sinabi nia: “Dawa orootrohon an kaputikan, iyan dai magigin katotoohan.”

Paano mo maaaraman kun baga may nagputik sa saimo? Si Jesus namibi kaidto sa Dios: “An saimong tataramon iyo an katotoohan.” (Juan 17:17) Iyo, an kaipuhan niato tanganing maaraman kun arin an katotoohan asin kaputikan yaon sa Tataramon nin Dios, an Biblia.

Taano ta dai togotan an Biblia na ibuyagyag an limang komun na kaputikan manongod sa Dios? Maheheling mo kun paano puedeng bagohon kan katotoohan an saimong buhay para sa ikakarahay.