TIBAAD maoyon ka na importante an pagdadanay na mata kun yaon ka sa eskuelahan. Dakol an tinutungka mantang nasa klase, alagad tanganing makanood, dapat kang magdanay na mata. Tibaad nag-aatender ka man sa mga pagtiripon kun saen nag-aadal kamo kan Biblia.

Ano sa paghona mo an magigibo mo tanganing magdanay kang mata?— * An sarong paagi iyo na magtorog ka nin amay sa banggi. Tibaad makatabang man an pagtorog nin kadikit sa hapon. Helingon niato kun ano an manonodan niato sa nangyari sa sarong hoben na napatorog kan sarong matangang banggi mantang nagpapahayag si apostol Pablo. Bukasan an Biblia sa Guibo kapitulo 20, bersikulo 7 sagkod 12, asin helingon kun ano an nangyari.

Dinadalaw ni Pablo an kongregasyon na nasa duongan na siudad nin Troas. Sinasabi kan Biblia na si Pablo mahale na “pagkaaga” lunad nin barko. Kaya “pinalawig nia an saiyang pagtokdo sagkod sa matagñang bangui.” Mababasa niato: “Mantang si Pablo nagsasaysay pa, an sarong barobata na an gñaran Eutico na nagtutukao sa gaha [bintana] inabot nin dakulang pirot.” Ano an sunod na nangyari?—

Nahulog si Eutico hale sa bintana na nasa “ikatolong loon [eskalon] nin harong.” Si Pablo asin an iba pa nagdalagan pababa sa hagyan sa pinakamarikas na magigibo ninda. Si Eutico nasa daga—gadan! Maiimahinar mo daw kun gurano kamondo sinda gabos?— Sinasabi kan Biblia na kinugos ni Pablo si Eutico. Dangan tolos na nagkurahaw si Pablo nin may kagayagayahan: ‘Dai kamo maghadit, buhay sia!’ Binuhay liwat nin Dios si Eutico!

 Sa nangyari ki Eutico, ano an manonodan niato manongod sa Dios?— An sarong bagay iyo na kaya ni Jehova, an satong Ama sa langit, na buhayon liwat an mga gadan, kaiba na an mga hoben. Iyo, nasasabotan asin namomotan ka ni Jehova nin orog pa ngani sa pagsabot asin pagkamoot sa saimo kan mga magurang mo. Kan si Jesus yaon digdi sa daga, ipinaheling nia kun anong klaseng persona an Ama paagi sa pagkugos asin pagbendisyon nia sa saradit na aki. Nagbuhay man sia liwat nin mga hoben, kaiba na an sarong 12 anyos na daragita.

Ano an namamatean mo huling naaraman mong namomotan ka kan saimong Ama sa langit?— Iyo, napapahiro kitang kamotan man si Jehova asin mawoton na sunodon an sinasabi Nia. Aram mo daw kun paano niato ikakapaheling na namomotan niato Sia?— An sarong paagi iyo an pagsabi mismo kaiyan. Sinabi ni Jesus: “Ako namomoot sa Ama.” Alagad orog pa an ginibo ni Jesus kisa sa pagsabi sana na namomotan nia an Dios. Ipinaheling nia iyan paagi sa saiyang ginibo.

Sinunod ni Jesus an Dios. “Danay na ginigibo ko an ikinakaogma niya,” an sabi ni Jesus. (An Marahay na Bareta Biblia) Kun gigibohon man niato iyan, gigibohon niato an satong pinakamakakaya na magdanay na mata kun kaipuhan iyan, tanganing mapaogma si Jehova asin an saiyang Aki na si Jesus.