Pakikipag-olay sa Sarong Kagharong​—Dios daw si Jesus?

NAOOGMA an Mga Saksi ni Jehova na ipakipag-olay sa iba an Biblia. Igwa daw nin partikular na tema sa Biblia na iniisip-isip mo? May gusto ka daw na maaraman sa arin man na paniniwala o relihiosong aktibidad kan Mga Saksi ni Jehova? Kun igwa, dai mag-alangan na sabihon iyan sa sunod na may makaolay kang Saksi. Maoogma siang ipakipag-olay iyan sa saimo.

Arog kaini an puedeng mangyari sa pakikipag-olay nin saro sa Mga Saksi ni Jehova sa sarong kagharong. Ipamugtak ta baga na nagduman an Saksing si Karen sa harong ni Samantha.

Totoo daw na Kamo Dai Nagtutubod ki Jesus?

Samantha: Sabi kan pastor mi, dai daa nagtutubod ki Jesus an Mga Saksi ni Jehova. Totoo?

Karen: Gusto kong siertohon sa saindo na talagang nagtutubod kami ki Jesus. An totoo, naniniwala kami na an pagtubod ki Jesus mahalagang marhay para sa kaligtasan.

Samantha: Iyan man an pagtubod ko.

Karen: Kaya, magkaoyon kita sa bagay na ini. Ako palan si Karen. Kamo?

Samantha: Ako man si Samantha.

Karen: Puedeng nahapot na nindo, ‘Kun talagang nagtutubod ki Jesus an Mga Saksi ni Jehova, taano ta iba man an pigsasabi nin mga tawo?’

Samantha: Iyo, taano man nanggad?

Karen: Sa madaling sabi, Samantha, makosog nanggad an pagtubod mi ki Jesus, pero dai kami naniniwala sa gabos na pigsasabi nin mga tawo dapit sa saiya.

Samantha: Halimbawa ano?

Karen: May mga nagsasabi na si Jesus saro sanang marahay na tawo. Pero, dai kami oyon dian.

Samantha: Maski ako dai man.

Karen: Kaya, saro pa iyan na bagay na magkaoyon kita. An saro pang halimbawa, an Mga Saksi ni Jehova dai minaoyon sa mga katokdoan na kontra sa sinabi mismo ni Jesus manongod sa relasyon nia sa Ama.

Samantha: Ano an boot mong sabihon?

Karen: Dakol na relihion an nagtotokdo na Dios si Jesus. Iyo man gayod iyan an itinokdo sa saindo.

Samantha: Iyo, sabi kan pastor mi, an Dios iyo man sana si Jesus.

Karen: Pero, maoyon daw kamo na an pinakamarahay na paagi tanganing maaraman an katotoohan manongod ki Jesus iyo na pag-adalan an sinabi nia dapit sa saiyang sadiri?

Samantha: Iyo, oyon ako dian.

Ano an Sinabi ni Jesus?

Karen: Pag-olayan ta an sarong teksto sa Biblia na makakatabang sa sato na masabotan ini. Helinga tabi an mababasa ta digdi sa Juan 6:38. Sabi ni Jesus: ‘Ako naghilig hale sa langit, bako sa paggibo kan sadiri kong boot, kundi kan boot kaidtong nagsugo sako.’ Bako daw na an sinabi niang iyan medyo maribong kun Dios si Jesus?

Samantha: Ano an boot mong sabihon?

 Karen: Arog kaini, kun narisa nindo, an sabi ni Jesus sia dai nagbaba hale sa langit tanganing gibohon an sadiri niang kabotan.

Samantha: Tama. An sabi nia, sia nagdigdi tanganing gibohon an kabotan kan Saro na nagsugo sa saiya.

Karen: Pero, kun Dios si Jesus, siisay an nagsugo sa saiya na bumaba hale sa langit? Asin taano ta nagsunod si Jesus sa kabotan kan Sarong iyan?

Samantha: Medyo nasasabotan ko na an boot mong sabihon. Pero, dai ko segurado kun sa saro sanang bersikulong ini mapapatunayan ta na si Jesus bakong Dios.

Karen: Pero, helinga ining sinabi ni Jesus sa saro pang pagkakataon. Kaagid kan enot tang binasa an sinabi nia sa sunod na kapitulo kan Juan. Puede daw tabing basahon nindo an Juan 7:⁠16?

Samantha: Sige. ‘Si Jesus ngani nagsimbag sainda, asin nagsabi: An sakong katokdoan bako ko, kundi kaidtong nagsugo sako.’

Karen: Salamat Samantha. Oyon sa tekstong ini, itinokdo daw ni Jesus an sadiri niang mga ideya?

Samantha: Dai, sinabi nia na an mga katokdoan nia hale sa Saro na nagsugo sa saiya.

Karen: Tama iyan. Kaipuhan ta giraray ihapot: ‘Siisay an nagsugo ki Jesus? Asin siisay an nagtao sa saiya kan mga katotoohan na itinokdo nia?’ Bako daw iyan an Saro na orog na dakula kisa ki Jesus? Total, an nagsugo mas halangkaw sa isinugo.

Samantha: Interesante iyan. Dai ko pa nabasa iyan.

Karen: Pag-isipan man nindo ining sinabi ni Jesus sa Juan 14:28: ‘Kamo nakadangog na na ako nagsabi saindo, Ako mahale, asin ako madigdi sa saindo. Kun kamo namomoot sako, kamo nag-orogma kutana, ta ako maduman sa Ama. Huli ta an Ama orog sa sako.’ Segun sa bersikulong ini, ano daa an pagheling ni Jesus sa sadiri nia kun ikokomparar sa Ama?

Samantha: Sinabi nia na an Ama orog kisa sa saiya. Kaya, seguro para sa saiya mas halangkaw an Dios.

Karen: Tama. Saro pang halimbawa, helinga ining sinabi ni Jesus sa mga disipulo nia digdi sa Mateo 28:18. An sabi: ‘An gabos na kapangyarihan sa langit asin sa daga itinao sako.’ Kaya, sinabi daw ni Jesus na pirme siang igwa kan gabos na kapangyarihan o autoridad?

Samantha: Dai, sinabi nia na itinao iyan sa saiya.

Karen: Pero, kun Dios si Jesus, paano sia matatawan nin dagdag pang autoridad? Asin siisay an nagtao kaiyan sa saiya?

Samantha: Pag-iisipan ko iyan.

Kiisay Sia Nakikipag-olay?

Karen: May saro pang medyo nakakaribong kun talagang Dios si Jesus.

Samantha: Ano?

Karen: Iyan an mababasa ta dapit sa bautismo ni Jesus. Helinga ining nakasurat sa Lucas 3:​21, 22. Puede daw tabing basahon nindo an mga bersikulong iyan?

Samantha: ‘Dangan nangyari kan an gabos na tawo mabunyagan, asin si Jesus man mabunyagan na asin mamibi, na an langit nabukas, asin an Espiritu Santo naghilig sa saiya siring sa may hawak, na garong salampati, asin an sarong tingog naghale sa langit: Ika an sakuyang namomotan na Aki; sa saimo naoogma ako.’

Karen: Narisa daw nindo an ginigibo ni Jesus mantang sia binabautismohan?

Samantha: Namimibi sia.

Karen: Iyo. Siempre, tibaad maghapot kita, ‘Kun Dios si Jesus, kiisay sia namimibi?’

Samantha: Magayon na hapot iyan. Hahapoton ko an pastor mi.

Karen: Kapareho kaiyan, mangnohon nindo na pagkahawas ni Jesus sa tubig, may nagtaram hale sa langit. Narisa daw nindo an sinabi kan Sarong iyan?

Samantha: An sabi Nia, si Jesus Aki Nia, na namomotan Nia, asin na ikinakaogma Nia.

Karen: Tama iyan. Pero kun Dios si Jesus, siisay an nagsabi kaiyan hale sa langit?

Samantha: Dai ko pa iyan naisip kaidto.

 Taano ta “Ama” Asin “Aki”?

Karen: Uni an saro pang dapat pag-isipan: Nabasa ta na an Dios inapod ni Jesus na saiyang makalangit na Ama. Asin kan bautismohan si Jesus, sarong boses hale sa langit an nag-apod ki Jesus bilang Saiyang Aki. An totoo, espesipikong inapod ni Jesus an sadiri nia na Aki nin Dios. Ngonyan, kun gusto nindong itokdo sa sako na magkapantay an duwang tawo, anong klaseng relasyon sa pamilya an gagamiton nindo tanganing ipaliwanag an puntong iyan?

Samantha: Puede kong gamiton an magtugang.

Karen: Tama​—⁠tibaad kambal pa ngani. Pero, inapod ni Jesus an Dios bilang Ama asin an sadiri nia bilang Aki. Kaya, sa heling nindo, anong mensahe an gustong ipaabot ni Jesus?

Samantha: Nasasabotan ko na. Ipinapaliwanag ni Jesus na an saro mas may edad asin igwa nin mas halangkaw na autoridad kisa sa saro.

Karen: Iyo nanggad. Isip-isipa ini: Nakapag-isip kamo nin tamang-tamang halimbawa nin pagigin magkapantay​—⁠an magtugang o kambal. Kun talagang Dios si Jesus, bako daw na sia, bilang Nangongorog na Paratokdo, makakaisip man nin parehong pagkomparar​—⁠o mas malinaw pa nganing halimbawa nin pagigin magkapantay?

Samantha: Siempre.

Karen: Pero, an ginamit nia mga terminong “Ama” asin “Aki” tanganing ipaliwanag an relasyon nia sa Dios.

Samantha: Interesanteng punto an sinabi mo.

Ano an Sinabi kan Enot na mga Parasunod ni Jesus?

Karen: Bago ako maghale, gusto kong sambiton an saro pang aspekto kan pinag-oolayan tang ini, kun may panahon pa kamo.

Samantha: Sige, puede pa.

Karen: Kun talagang Dios si Jesus, bako daw aasahan ta na iyan man kutana an malinaw na sinabi kan mga disipulo nia?

Samantha: Garo rasonable iyan.

Karen: Pero, mayo kitang mababasa sa Biblia na itinokdo ninda iyan. Sa kabaliktaran, helinga an isinurat kan saro sa enot na mga parasunod ni Jesus, si apostol Pablo. Sa Filipos 2:​9, sinabi nia kun ano an ginibo nin Dios pagkatapos magadan asin buhayon liwat si Jesus: ‘Sia pinahalangkaw na marhay nin Dios, asin tinawan kan ngaran na nasa itaas nin gabos na ngaran.’ Oyon sa bersikulong ini, ano an ginibo nin Dios para ki Jesus?

Samantha: Sinabi dian na sia pinahalangkaw na marhay nin Dios.

Karen: Iyo. Pero, kun si Jesus kapantay nin Dios bago sia magadan asin kan huri ibinugtak nin Dios sa mas halangkaw na posisyon, bako daw na mas halangkaw na logod si Jesus kisa sa Dios? Paanong mangyayari na an siisay man magigin orog pa sa Dios?

Samantha: Dai puede. Imposible iyan.

Karen: Oyon ako. Kaya, basado sa gabos na ebidensiang ini, masasabi daw nindo na an Biblia nagtotokdo na Dios si Jesus?

Samantha: Dai, garo bakong arog kaiyan. An sabi sa Biblia, sia Aki nin Dios.

Karen: Tama iyan. Pero, gusto kong siertohon sa saindo na halangkawon an paggalang ki Jesus kan Mga Saksi ni Jehova. Nagtutubod kami na an saiyang kagadanan bilang ipinanugang Mesiyas an nagbukas kan dalan para sa kaligtasan kan gabos na maimbod na tawo.

Samantha: Iyan man an pagtubod ko.

Karen: Kaya, tibaad ihapot nindo, ‘Paano niato ikakapaheling ki Jesus na pinapahalagahan ta an pagtao nia kan saiyang buhay para sa sato?’ *

Samantha: Naiisip ko man iyan.

Karen: Tibaad puede akong bumalik asin ipaheling sa saindo an simbag kan Biblia. Nasa harong daw kamo sa arog kaining oras sa sunod na semana?

Samantha: Iyo, yaon ako.

Karen: Okey, madigdi ako.

[Nota sa Ibaba]