May Nagdadangog daw sa Pamibi?

“Dati, duda ako sa pag-eksister nin Dios. Pero, kun beses namimibi man ako. Dai ako segurado kun may nagdadangog, pero aakoon kong naglaom nanggad ako na logod igwa. Mamondo ako asin mayong katuyohan an buhay. Natatakot akong magtubod sa Dios huling iniisip ko na maluluyang tawo sana an nagtutubod sa Dios.”—PATRICIA, * IRELAND.

AROG man daw kaiyan an namamatean mo? Namimibi ka daw maski nagdududa kun baga nag-eeksister an Dios? Kun iyo, dai ka nanggad nagsosolo. Estudyare an minasunod.

▪ Sarong surbey sa 2,200 na Britano an nagpapahiling na 22 porsiento sana an nagtutubod na may Dios na naglalang kan kinaban asin nagdadangog sa mga pamibi. Pero, sa mga sinurbey, 55 porsiento an namimibi paminsanminsan maski paano.

▪ Sarong surbey sa 10,000 katawo hale sa apat na kontinente an nagpapahiling na sa mga nagsabing ateista sinda, haros 30 porsiento an namimibi.

Taano ta Nagdududa Sinda?

Si Allan, na taga Inglatera, nagsabi: “Dati, sinasabi ko na dai ako nagtutubod sa Dios huling iniisip ko na kaya nagkaigwa nin relihion iyo na kontrolon an mga tawo asin magganar nin kuarta. Nangatanosan man ako na kun may Dios, mayo kutana nin grabeng inhustisya. Pero kun beses, toninong akong minatukaw asin garo ‘may’ kinakaolay. Hinahapot ko man an sadiri ko, ‘Paano ako napadigdi?’”

An mga may arog kaiyan na saboot igwa nin kanya-kanyang dahelan sa pagduda kun baga sinisimbag an mga pamibi. Sa dakol na kamugtakan, an mga pagduda resulta nin dai nasisimbag na mga hapot, arog kan minasunod:

▪ Igwa daw nin Kaglalang?

▪ Taano ta sa parate bakong marahay an impluwensia nin relihion?

▪ Taano ta tinotogotan nin Dios an pagsakit?

Kun maaaraman mo an mga simbag dian, mas magigin kompiado ka daw sa pagpamibi?

[Nota sa Ibaba]