Siisay an Paradangog nin Pamibi?

KUN igwa nin Paradangog nin pamibi, rasonable sanang sia an Kaglalang. May iba pa daw na makakabasa kan kaisipan mo apuera sa Saro na nagdisenyo kan hotok nin tawo? May iba pa daw na makakasimbag sa mga pamibi asin makakatao sa katawohan kan kinakaipuhan na tabang? Alagad tibaad isipon mo, ‘Rasonable daw na maniwala sa sarong Kaglalang?’

Dakol an nag-iisip na kun maniniwala ka sa sarong Kaglalang, kaipuhan mong negaran an ebidensia kan modernong siensia. Alagad, bako nanggad totoo an ideya na an paniniwala sa Dios kontra sa siensia. Isip-isipa an minasunod.

▪ An sarong dai pa sana nahahaloy na surbey sa 1,646 na propesor sa siensia sa 21 sikat na unibersidad sa Estados Unidos nagpapahiling na mga 33 porsiento sana an nagpili kan mga tataramon na “Dai ako naniniwala sa Dios” tanganing iladawan an pananaw ninda.

An totoo, dakol na sientista an naniniwala na may Dios.

Ebidensia na May Kaglalang

Basta na sana daw niato aakoon, dawa mayong prueba, na nag-eeksister an Paradangog nin pamibi? Dai nanggad. Sala an ideya na an pagtubod paniniwala na mayong ebidensia. Sa Biblia, an pagtubod tinawan nin kahulogan na ‘tanda kan mga bagay na dai nahihiling.’ (Hebreo 11:1) Saro pang traduksion an nagsabi na an pagtubod “masarig na paniwala sa mga bagay na dai nahihiling.” (An Marahay na Bareta Biblia) Halimbawa, dai mo nahihiling an radio waves, alagad an saimong cell phone malinaw na nagpapatunay na may radio waves huling paagi kaiyan nakakaabot sa saimo an boses kan kaolay mo; kaya nagtutubod kang igwa kaiyan. Sa kaagid na paagi, dawa ngani dai niato nahihiling an Paradangog nin pamibi, puede tang hilingon an makukuang ebidensia na makakakombensir sa sato na sia nag-eeksister.

Saen kita makakakua nin ebidensia na nag-eeksister an Dios? Kaipuhan sana kitang magmasid sa palibot. An Biblia nangangatanosan nin  arog kaini: ‘Huli ta an lambang harong igwa nin kaggibo, alagad an kaggibo kan gabos na bagay iyo an Dios.’ (Hebreo 3:4) Oyon ka daw sa lohika kan mga tataramon na iyan? Tibaad kun hinohorophorop mo an pagkaorganisar kan uniberso, an ginikanan nin buhay, o an disenyo kan pinakakomplikado sa gabos na bagay digdi sa daga, an hotok nin tawo, makakapagsabi ka na may nag-eeksister na nakakalabi sa tawo. *

Alagad, an mga bagay sa palibot limitado an ikakatokdo sa sato manongod sa Dios. An namamasdan niato sa mga linalang nin Dios nakakaagid sa pakadangog sa mga lagatak nin bitis na parani sa seradong pinto. Aram mong may tawo, pero siisay sia? Tanganing maaraman, kaipuhan mong buksan an pinto. Arog man kaiyan an kaipuhan tang gibohon tanganing mamidbid an Saro na nasa likod kan paglalang.

An Biblia garo sarong pinto pasiring sa kaaraman manongod sa Dios. Kun bubukasan mo an pintong iyan asin eestudyaran an nagkapirang detalyadong hula asin an kaotoban kaiyan, makakahiling ka nin ebidensia na nag-eeksister an Dios. * Alagad orog pa dian, ipinapahiling kan nagin pagtratar nin Dios sa mga tawo an mismong personalidad kan Paradangog nin pamibi.

Anong Klaseng Persona an Paradangog nin Pamibi?

Ihinahayag kan Biblia na an Paradangog nin pamibi sarong persona—saro na puede mong mamidbid. Seguradong persona sana an kayang magdangog na may pakasabot. Nakakapakosog sa  boot na mabasa: ‘Ika naghihinanyog [“Paradangog,” NW] nin pamibi; sa saimo madorolok an gabos na laman.’ (Salmo 65:2) Dinadangog nia an mga namimibi sa saiya na may pagtubod. Asin may ngaran sia. An Biblia nagsasabi: ‘Si Jehova harayo sa mga maraot na tawo; sia naghihinanyog sa pamibi nin mga banal.’—Talinhaga 15:29.

May pagmate si Jehova. Sia “an Dios nin pagkamoot” asin inaapod na “maogmang Dios.” (2 Corinto 13:11; 1 Timoteo 1:11, NW) Mapadapit sa namatean nia kan panahon na lakop na marhay an karatan, an Biblia nagsasabi: ‘Nakolgan an saiyang puso.’ (Genesis 6:5, 6) Bakong totoo an sinasabi na pinapangyayari nin Dios an pagsakit tanganing baloon an mga tawo. An Biblia nagsasabi: “Harayong mangyari na an tunay na Dios humirong may karatan.” (Job 34:10, NW) Minsan siring, tibaad isipon mo, ‘Kun an Dios iyo an Kaglalang na makakamhan sa gabos, taano ta tinotogotan niang magpadagos an pagsakit?’

An katawohan tinawan ni Jehova nin libertad na magdesisyon, asin may ihinahayag iyan sa sato dapit sa kun anong klaseng persona an Dios. Bako daw na pinapahalagahan ta an satong libertad na pumili kun paano mamumuhay? Alagad makamomondo, ginagamit iyan nin dakol na tawo sa salang paagi, na minaresulta sa pagsakit ninda patin nin iba. Ngonyan, uya an sarong hapot na maninigong pag-isipan na marhay: Paano hahaleon nin Dios an pagsakit na dai hinahale an libertad nin tawo? Sisiyasaton niato iyan sa masunod na artikulo.

[Mga Nota sa Ibaba]

[Kahon sa pahina 5]

Nagkakaigwa Ka daw nin Pagduda Huli sa Relihion?

Makamomondo, relihion an dahelan kun taano ta dakol an nagdududa na may mapagmalasakit na Paradangog nin pamibi. An pakikilabot nin relihion sa giera saka terorismo, asin an pagkonsinte kaini sa pag-abuso sa mga aki, nagigin dahelan na an relihiosong mga tawo makapagsabing “Dai ako nagtutubod sa Dios.”

Taano ta sa parate bakong marahay an impluwensia nin relihion? Ini huling ginagamit nin maraot na mga tawo an relihion sa paggibo nin maraot. Ihinula kan Biblia na may ibang mga puersa na makontrol sa Kristianismo asin gagamiton iyan sa maraot na katuyohan. Sinabi ni apostol Pablo sa Kristianong mga paraataman: ‘May maruluwas sa pag-iriba nindo na magtatararam nin mga bagay na maraot, tanganing maguyod ninda sa sainda an mga disipulo.’—Guibo 20:29, 30.

Nababalde an Dios sa falsong relihion. Sa katunayan, sinasabi kan Tataramon nin Dios, an Biblia, na an falsong relihion an may paninimbagan sa ‘dugo kan gabos na ginadan sa daga.’ (Kapahayagan 18:24) Huling dai kaiyan ikinatokdo sa mga tawo an manongod sa tunay na Dios, na pagkamoot an pinakanangongorog na karakteristiko, an mga relihion na iyan nagkasala sa dugo sa paghiling nin Dios.—1 Juan 4:8.

An Paradangog nin pamibi may simpatiya sa mga biktima nin mapang-aping relihion. Huli sa pagkamoot nin Dios sa katawohan, an gabos na mapagsaginsagin na relihion hohokoman nia sa dai na mahahaloy paagi ki Jesus. Sinabi ni Jesus: ‘Dakol an masabi sako sa aldaw na iyan, “Kagurangnan, Kagurangnan, bakong naghula kami sa ngaran mo?” Dangan ako masabi sa sainda: Kasuarin man dai ko kamo namidbid, magrayo kamo sa sako, mga paragibo nin katampalasanan.’—Mateo 7:22, 23.