Makanood sa Tataramon nin Dios
Puede Ka daw Mabuhay Sagkod Lamang?
Sinisimbag sa artikulong ini an mga bagay na tibaad ihinahapot mo asin ipinapahiling man kun saen mo iyan mababasa sa saimong Biblia. Maoogma an mga Saksi ni Jehova na ipakipag-olay sa saimo an mga simbag na ini.
1. Taano ta garo halipoton sana an satong buhay?
May mga pawikan na nabubuhay nin sagkod sa 150 taon, asin may mga kahoy na nag-aabot nin 3,000 na taon. Halipoton an buhay nin tawo kun ikokomparar sa mga iyan. Pero, puedeng magin mas makahulogan an buhay niato kisa sa pawikan o sa kahoy. Linalang nin Dios na Jehova an mga tawo na may kakayahan na ikaogma an musika, isport, pagkakan, pag-adal, pagbiahe, asin pakikiiba sa mga tawo. Ibinugtak nin Dios sa satong puso an kamawotan na mabuhay nin daing sagkod.—Basahon an Parahulit 3:11.
2. Talaga daw na puede kitang mabuhay sagkod lamang?
Si Jehova nabubuhay sagkod lamang. Dai siya nagagadan. Sia an Burabod nin buhay, kaya makakapagtao sia nin buhay na daing katapusan sa iba. (Salmo 36:9; Habacuc 1:12, NW) Apuera kaini, nanuga sia na tatawan nia nin buhay na daing katapusan an mga nagkukuyog sa saiya. Babaliktadon nia an proseso nin paggurang.—Basahon an Job 33:24, 25; Isaias 25:8; 33:24.
Paagi sa makapangyarihan na mga gibo, ipinahiling ni Jesus na makakapagtiwala kita sa panuga nin Dios na buhay na daing katapusan na may perpektong salud. Dakol na klaseng helang an pinaomayan ni Jesus asin nagbuhay pa ngani sia nin mga gadan.—Basahon an Lucas 7:11-15, 18, 19, 22.
3. Noarin magkakatotoo an buhay na daing katapusan?
Gusto nin Dios na mabuhay kita sagkod lamang, bako sa sarong kinaban na pano nin pang-aapi asin kadahasan, kundi sa sarong paraisong daga. Gusto nia kitang magin tiwasay. (Salmo 37:9, 29; Isaias 65:21, 22) Mientras na ibinabalik an Paraiso sa daga, minilyon na nagadan an bubuhayon giraray. Kun an mga binuhay liwat magdesisyon na sambahon asin kuyogon an Dios, mabubuhay sinda sagkod lamang.—Basahon an Lucas 23:42, 43; Juan 5:28, 29.
4. Paano kita magkakamit nin buhay na daing katapusan?
Sulit an paghihingoang mamidbid an Dios
An Dios sana an makakapagtao sa sato nin buhay na daing katapusan. Kaya, marahay na rumani kita sa saiya paagi sa pagmidbid saiya. An pagkua nin kaaraman manongod sa Dios iinagid kan Biblia sa pagkakan. (Mateo 4:4) An pagkakan nakakagayagaya, pero an paghanap asin pagpreparar kan satong kakanon nangangaipo nin paghihingoa. Kaagid kaiyan, an pagkakan nin espirituwal na kakanon nangangaipo man nin paghihingoa. Pero igwa pa daw nin mas kapakipakinabang kisa sa pagrani sa Dios asin sa pag-ako nin buhay na daing katapusan?—Basahon an Lucas 13:23, 24; Juan 6:27; 17:3.
Puwede Mo Man Magustuhan
Ano an Mangyayari sa Aldaw nin Paghukom?
Iba-iba an mga paniniwala manungod sa Aldaw nin Paghukom. Dapat daw iyan katakutan? Ano an maisasagibo kaiyan?
