DAI ko malilingawan an sarong pagpamahaw kaiba an sakong mga kapamilya kan Lunes na aga, Agosto 22, 2005. Namemeligro an buhay ko huli sa dakulang tumor sa sakong utak. Namibi an agom kong si Krishna, dangan kinaolay ko an sakong pamilya.

“Mapaospital ako para sa sarong delikadong operasyon,” an paliwanag ko, “kaya kaipuhan na magin handa kamo gabos sa ano man na puedeng magin resulta. Naggibo na ako nin mga areglo para sa lubong ko, kun kaipuhanon iyan. Para sa saindo na nagsasamba na ki Jehova, dai tabi kamo magpondo. Para sa iba pa, nakikimaherak ako na akoon nindo an alok na pag-adal sa Biblia asin mag-atender kamo sa Kristianong mga pagtiripon mi. Paagi kaiyan, magigin pareho na an satong pagtubod sa maabot na bagong kinaban na dian an tunay na mga nagsasamba sa Dios mabubuhay sagkod lamang na may perpektong salud sa sarong paraisong daga.”

Bago ko ipaliwanag an nagin resulta kan operasyon ko, togoti akong iestorya an pinaghalean ko asin kun paano ko namidbid an tunay na Dios.

Nakaistar an pamilya mi sa dakulang harong na gibo sa kahoy asin batbat, o lansang, sa sarong bulod na harani sa dagat sa siudad nin Durban, Aprika del Sur. Tanganing makaabot sa trangkahan kan harong mi, kaipuhan mi ngunang magsakat sa hagyanan na may 125 tangga hale sa mayor na tinampo sa ibaba kan bulod. An hagyanan na iyan pasiring sa halipot na dalan-dalan na may mga tinanom sa gilid asin minasagkod sa batbat na trangkahan. Sa sarong gilid kan trangkahan yaon an templo kan lola ko, na pano nin retrato asin imahen nin mga dios nin mga Hindu. An sabi sako ni lola, ako daa “aki nin templo” (mandir kī baccā, sa Hindi) asin namundag ako dahil sa mga dios na sinasamba mi. Sa ibong kan templo may makintab asin kolor pulang hagyanan na pasiring sa atubangan na pinto kan harong mi. Dakula an harong, na igwa nin halabang pasilyo, dakulang kusina na may kalan na de uring, pitong kuarto, asin suyab na may sarong kuarto. Beinte-siete kaming nag-iistar dian, kaiba an lolo saka lola mi, an sakong ama, an tolong nguhod na tugang niang lalaki, an kangudhan niang tugang na babae, asin an mga pamilya ninda.

Bakong pasil na asikasohon an mga pangangaipo kan siring kadakulang pamilya. Pero an pag-istar sa sarong harong na magkairiba nagpadanay sa pamilya na nagkakasararo asin nagtao sa samo nin dakol na maogmang mga memorya. An apat na manugang na babae, kaiba an sakong ina, si Gargee Devi, pararehong may mga gibohon sa harong. Sarosalida sinda sa pagluto nin kakanon asin sa paglinig. Si lolo an payo kan pamilya, asin sia an nagbabakal nin kakanon para sa bilog na pamilya. Kada Mierkoles nananaod si lolo saka si lola nin karne, prutas, asin gulay para sa sarong semana. Pirme kaming nagtutukaw kaidto sa irarom kan limpoy nin pine tree sa gilid kan bakilid, na dian natatanaw an ibaba kan bulod, mantang hinahalat mi an pagpuli ninda hale sa saod. Kun matanaw mi na sindang naglulusad sa bus dara an darakulang basket, madaralagan na kami pababa sa 125 tangga kan hagyanan tanganing magtabang sa pag-alsa kan mga pinamakal pasiring sa harong.

Sa hardin mi, igwa kaming halangkaw na poon nin palma na dian naggibo nin salagan an mga gamgam na mynah. Nahihiling mi an mga iyan na pabalikbalik na naglalayog asin nadadangog mi an hinuni kan mga iyan. Nagtutukaw si lola sa hagyanan sa atubangan kan pinto asin nag-iestorya na garo baga iniinterpretar an hinuni  kan mga mynah. Kadakol akong magagayon na memorya kan buhay niamo sa harong na idto! Kami nagngirisi, naghiribi, nagkarawat, nagngiririt, nagdaramayan​—⁠maogma kaming namuhay na magkairiba bilang sarong dakulang pamilya. An pinakamahalaga, duman kami nagpoon na makanood manongod sa satong Kaglalang, si Jehova, asin sa Aki niang si Jesu-Cristo.

Bago mi maaraman an manongod ki Jehova, dakol na pang-aroaldaw na ritual an kaiba sa pagsamba mi bilang Hindu. Igwa man kami nin regular na darakulang selebrasyon, kun saen nangingimbitar kami nin mga bisita tanganing sambahon an laen-laen na dios asin diosa. Sa siring na mga selebrasyon, mamumungnan si lola asin makikikomunikar sa mga espiritu, dangan pag-eksaktong matangang banggi, gigibohon an pag-atang nin hayop tanganing dai maanggot an mga espiritu. Midbid man na marhay sa komunidad an lolo ko huli sa mga pag-abuloy nia para sa pagtogdok asin pagpunsionar nin mga pampublikong eskuelahan asin templo kan mga Hindu.

Kan 1972, nagkahelang asin nagadan an lolo ko. Pagkalihis nin pirang bulan, an saro sa mga tiya ko na si Indervathey, midbid man bilang Jane, nag-ako nin mga magasin na Torrengbantayan asin Awake! hale sa duwang Saksi ni Jehova. Nakonsensia sia na dai nia sinda pinadagos sa samong harong tanganing makipag-olay. Pirme ming sinasayumahan an mga Saksi. Pero kan sunod na pagdalaw ninda, pinadagos sinda kan tiya ko asin nakipag-olay sa sainda dapit sa problemang pangmag-agom na may koneksion sa pag-abuso sa inomon na de alkohol kan tiyo ko. Inenkaminar an tiya ko kan kataraed asin mga paryente mi na makipagdiborsio. Ipinaliwanag kan mga Saksi an pagmansay nin Dios sa pag-agoman. (Mateo 19:⁠6) Napahangang marhay an tiya ko sa sadol kan Biblia asin sa pangako kaiyan na magkakaigwa nin mas marahay na buhay sa daga sa maabot. * Nagbago an isip nia na bayaan an tiyo ko, asin nagpoon siang regular na makipag-adal sa Biblia sa mga Saksi. Kun sia nag-aadal sa sala kan harong mi, an ibang mga manugang na babae nagdadangog sa pag-oolay mantang nasa mga kuarto ninda.

Pag-abot nin panahon, an gabos na manugang na babae nag-iba na sa pag-adal kan Biblia. Sinasabi samo ni Tiya Jane an mga nanodan nia asin sa parate binabasa asin ipinapaliwanag nia sa samo an mga estorya hale sa librong Paghinanyog sa Dakulang Paratokdo. * Kan maaraman kan mga tiyo ko na nag-aadal sa Biblia an mga tiya ko, pinonan ninda kaming kontrahon. Kinua kan saro sa mga tiyo ko an gabos ming literatura, kaiba an sarong Biblia, asin sinulo iyan. Ininsulto asin kinolgan ninda kami huli sa pag-atender sa mga pagtiripon. An ama ko sana an dai nagpahiling nin siring na atitud; nungka siang nagkontra sa pag-adal mi manongod ki Jehova. An gabos na apat na manugang na babae padagos na nag-atender sa mga pagtiripon asin nagtalubo sa pagkamoot ninda sa Dios na Jehova.

Kan 1974, nabautismohan si Tiya Jane bilang saro sa Mga Saksi ni Jehova, asin dai nahaloy nagsunod an ina ko asin an iba ko pang tiya. Pag-abot nin panahon, binayaan kan lola ko an saiyang relihiosong mga kaugalean bilang Hindu. Sa laog nin dakol na taon, nag-iiba ako sa pag-atender sa gabos na Kristianong pagtiripon. Dangan, sa sarong dakulang kombension kan Mga Saksi ni Jehova, naghapot an sarong Saksi na an ngaran Shameela  Rampersad, “Noarin ka mapabautismo?” An simbag ko, “Dai pa ako puede ta mayo pa man nagkondukta sako nin pag-adal sa Biblia.” Nag-alok siang tokdoan ako. Sa sunod na kombension, kan Disyembre 16, 1977, nabautismohan ako. Pag-abot nin panahon, sa 27 miembro kan pamilya mi na iribanan na nag-istar sa sarong harong, 18 an nabautismohan. Pero, kan ako operaran, an ama kong si Sonny Deva saro pang Hindu.

Dakulaon na tabang sa sako an mga tataramon na nakasurat sa Filipos 4:​6, 7, nangorogna kan madiskobreng may dakula akong tumor sa utak. An mga bersikulong iyan nagsasabi: ‘Sa ano man dai kamo mahadit; kundi sa gabos na bagay huli sa pamibi asin pagngayongayo na may pagpasalamat, ipahayag nindo sa Dios an saindong mga hinahagad. Asin an katoninongan nin Dios, na minalampas sa gabos na pakasabot, maingat kan saindong mga puso asin kan saindong mga pag-isip dian ki Cristo Jesus.’ Depisil na dai ‘mahadit sa ano man,’ nangorogna kun sinabihan ka na puede kang magadan ano man na oras. Kan enot, nagparahibi sana ako, dangan namibi ako ki Jehova. Poon kaidto, namatean ko ‘an katoninongan nin Dios, na minalampas sa gabos na pakasabot.’

Garo man sana kinapotan nin Dios na Jehova an sakong toong kamot, asin tunay na namatean ko na giniyahan nia ako sa gabos na panahon. (Isaias 41:13) Tinabangan nia akong ipaliwanag nin daing takot sa mga doktor asin nars an determinasyon kong sunodon an pagboot kan Biblia na lumikay sa dugo. (Guibo 15:​28, 29) Bilang resulta, nagtogot an siruhano asin anestesiologo na gibohon an operasyon na mayong pagsalin nin dugo. Paghaloyhaloy, sinabi kan siruhano na nagin mapanggana an operasyon asin nahale na an bilog na tumor. Sinabi pa nia na mayo pa siang nahiling na pasyente na siring karikas na nakabawi pagkatapos nin delikadong operasyon sa utak.

Pakalihis nin tolong semana, nakapagkondukta na ako nin pag-adal sa Biblia mantang nasa kama. Sa katapusan kan ikapitong semana, nagpoon na akong magmaneho giraray, makikabtang sa paghuhulit, asin mag-atender liwat sa mga pagtiripon kan Mga Saksi ni Jehova. Naapresyar ko an tabang kan sakong Kristianong mga tugang na iniibanan ako sa paghuhulit. Sinegurado nindang pirme akong may kaiba asin ligtas na makapuli. Nagtutubod ako na an pagdangog sa mga rekording sa audio kan pagbasa sa Biblia asin an pagpokus sa espirituwal na mga aspekto kan sakong buhay nakatabang sa marikas na pagrahay ko.

Naogma man akong maaraman na pagkatapos kan sakong operasyon, nagtogot na si papa na makipag-adal sa Biblia sa mga Saksi. Sa edad na 73, nabautismohan sia, asin sia ngonyan maigot na naglilingkod ki Jehova. Labing 40 miembro kan sakong pamilyang ekstendido an kasararo mi ngonyan na nagsasamba ki Jehova. Minsan ngani nagkadiperensia an wala kong mata asin may metal na nagsusuportar sa sakong bungo, inaantisipar ko an panahon na gigibohon ni Jehova na “bago an gabos na bagay” sa nagdadangadang na Paraisong daga.​—⁠Kapahayagan 21:​3-5.

Maogma ako sa pagkaigwa nin sarong mamomoton na agom, na naglilingkod bilang Kristianong paraataman, asin sarong magayon na aking babae, si Clerista, na dakulang tabang sa sako mantang nagpapadagos ako sa paglilingkod bilang bilog na panahon na ebanghelisador. Abundang binendisyonan nin Dios na Jehova an sakong ministeryo. Padagos kong natatabangan an dakol sa tinotokdoan ko sa Biblia na maeksperyensiahan an puersa kan Tataramon nin Dios sa saindang buhay. Labing 30 sa sainda an nagdusay na sa Dios asin nabautismohan.

Huling pano nin paglaom an sakong puso, inaantisipar ko an pag-abot kan panahon na ililigtas kita nin Dios na Jehova sa sistemang ini nin mga bagay na pano nin kakulogan asin gigiyahan kita pasiring sa paraiso digdi sa daga.