Talaga daw na nagmamakulog sato si Jehova, o siya daw daing pakiaram sa mamundong kamugtakan nin tawo? Mararanga kita sa simbag kan Bibliya. An Diyos talagang nagmamalasakit sa mga tawo. Gusto niyang ikaugma ta an buhay. Aroaldaw tinutugutan niya an mga tawo—dawa an mga pinakadaing utang na buot—na makinabang sa saiyang abundang karahayan. Pag-isipan an sinabi ni apostol Pablo.—Basahon an Guibo 14:16, 17.

Kan kaulay an mga tawong dai nagsasamba sa Diyos sa siyudad nin Listra, sinabi ni Pablo: ‘Sa mga panahon na nakaagi na, pinabayaan [nin Diyos] an gabos na nasyon na magralakaw sa saindang sadiring mga dalan. Alagad minsan siring, dai siya nagpabaya na dai magkaigwa nin saksi, na siya naggibo nin marahay, asin nagtao sa saindo nin mga uran na hali sa langit, asin mga panahon na tigbungahan, na pinapano niya an saindong mga puso nin kakanon asin nin kaugmahan.’ Ano an kahulugan kaiyan sa mga nagdadangog ki Pablo?

Madaling masabutan kan mga taga Listra an pagigin totoo kan sinabi ni Pablo. Nasa agrikultural na komunidad sinda. Matubig saka mataba an daga sa rehiyon ninda. Pero, arog kan ipinagirumdom sainda ni Pablo, an Diyos an Gikanan kan uran asin mabungang mga kapanahunan. Kaya, kada mag-ani sinda nin abunda asin magkakan nin masiram na kakanon, nakikinabang sinda sa karahayan nin Diyos.

An sinabi ni Pablo sa mga taga Listra nagtutukdo sato nin mahahalagang leksiyon dapit ki Jehova Diyos.

Tinawan kita ni Jehova nin libertad na magdesisyon. Mangnuhon na tinugutan ni Jehova an gabos na Hentil na nasyon ‘na magralakaw sa saindang sadiring mga dalan.’ Sigun sa sarong reperensiya para sa mga paratradusir kan Bibliya, an fraseng ini puwedeng mangahulugan na “maglakaw sa paaging gusto ninda” o “gibuhon an iniisip nindang pinakamarahay.” Dai pinipirit ni Jehova an siisay man na sambahon siya. Tinawan niya kita nin libertad na magdesisyon—an kakayahan na pilion an magigin buhay ta.—Deuteronomio 30:19.

Gusto ni Jehova na mamidbid ta siya. Dai siya nagpabaya na ‘dai siya magkaigwa nin saksi,’ an paliwanag ni Pablo. An nasambit na reperensiya nagsasabi na an fraseng ini puwedeng itradusir na “malinaw niyang ipinahiling sa mga tawo kun ano man nanggad na klaseng Diyos siya.” An mga linalang nin Diyos malinaw na nagpapatotoo sa saiyang “dai nahihiling” na mga kuwalidad, kaiba an saiyang karahayan, kadunungan, kapangyarihan, asin pagkamuot. (Roma 1:20) Sa Bibliya, mas dakul an ihinahayag ni Jehova dapit sa saiya. (2 Timoteo 3:16, 17) Bako daw na malinaw na ipinapahiling kaiyan na gusto niyang mamidbid ta siya?

Gusto ni Jehova na magin maugma kita. Lubos niyang ‘pinapano an satong puso nin kakanon asin kaugmahan,’ an sabi ni Pablo. Dawa an parakasala na dai minimidbid si Jehova puwedeng magkakan sagkod na makontento asin minsan paano magin maugma sa buhay. Pero, gusto nin Diyos na magkaigwa kita nin tunay asin nagdadanay na kaugmahan. Magigin posible sana iyan kun maaaraman ta an katotoohan dapit saiya asin iaaplikar iyan.—Salmo 144:15; Mateo 5:3.

Gabos kita nakikinabang sa karahayan ni Jehova aroaldaw. Taano ta dai aramon nin urog pa kun paano mo ikakapahiling an pasasalamat mo sa Diyos na lubos na ‘nagpapano sa saimong puso nin kakanon asin nin kaugmahan’?