Pag Disyembre, dakul na tawo sa iba-ibang lugar an nakakahiling nin mga ritrato ni Jesus na bagong mundag. Yaon siya sa bahugan, garo sarong dakulang kahon na piglalagan nin kakanon kan mga hayop. Pero beybi pa daw ngunyan si Jesus?— * Aramon ta kun ano siya ngunyan. Pag-ulayan ta su nangyari sa mga pastor sarong banggi kan sinda nasa uma harani sa Betlehem.

Sarong anghel an biglang nagpahiling sa mga pastor. Sinabi niya sainda: ‘Namundag sa saindo ngunyan an sarong Paraligtas, na iyo si Cristo na Kagurangnan.’ Sinabi pa kan anghel na mahihiling ninda si Jesus na ‘napapatos nin lampin asin nakahigda sa sarong bahugan.’ Pagkatapos tulos kaiyan, dakul na anghel an biglang nagpahiling tapos ‘nag-urumaw sa Diyos.’

Kun yaon ka duman tapos nadangog mo su mga anghel na pig-uumaw an Diyos, ano an mamamati mo?— Ugmahon su mga pastor! ‘Magduman kita sa Betlehem,’ an sabi ninda, ‘asin hilingon ta an nangyaring ini.’ Nahiling ninda duman ‘si Maria asin Jose, saka an umboy na nakahigda sa bahugan.’

May iba pang nagduruman sa Betlehem kun sain yaon si Maria asin Jose. Ngalason sinda gabos kan iistorya sainda kan mga pastor an nangyari. Nauugma ka daw ta naaraman mo ini?— Kita gabos na padaba an Diyos nauugma diyan. Aramon ta ngunyan kun nata ta nakakaugmang pangyayari an pagkamundag ni Jesus. Para maaraman iyan, kaipuhan tang balikan an panahon bago mag-agom si Maria.

Sarong aldaw, nagbisita ki Maria an sarong anghel na an pangaran Gabriel. Nangako siya na si Maria magkakaigwa nin aki na ‘magigin dakula asin aapudon na Aki kan Kahuruhalangkawi.’ ‘Siya maghahadi,’ an sabi ni Gabriel, ‘asin dai nin katapusan an saiyang kahadian.’

 Mayo pang agom si Maria kaya gusto niyang maaraman kun paano ini mangyayari. Ipinaliwanag saiya ni Gabriel: ‘An kapangyarihan kan Kahuruhalangkawi lilindungan ka, kaya an banal na ipapangaki mo aapudon na Aki nin Diyos.’ Hali sa langit, piglipat nin Diyos an buhay kan saiyang Aki sa tulak ni Maria para magin beybi. Milagro talaga iyan!

Nakahiling ka na nin mga ritrato o pangdispley na igwa nin tulong “hadi” na nagbibisita ki Jesus kaiba an mga pastor?— Dakul kaiyan pag Pasko. Pero sala iyan ta bako man talaga sindang “hadi” kundi mga astrologo, na an piggigibo habo nin Diyos. Aramon ta an nangyari kaidtong pag-abot ninda. Sinasabi kan Bibliya: ‘Pagralaog sa harong, nahiling ninda an aking sadit kaiba kan saiyang ina na si Maria.’ Kaya kan panahon na idto, si Jesus bako nang beybi na nasa bahugan; sadit na siyang aki na kaiba ni Jose asin Maria sa harong!

Paano nahanap kan mga astrologo si Jesus?— Pigpasunod sinda nin sarong ‘bituon,’ pero bakong diretso sa Betlehem kundi ki Hading Herodes nguna sa Jerusalem. Sinasabi kan Bibliya na gustong mahanap ni Herodes si Jesus para gadanon. Ngunyan, isipon mo ini. Si’say daw an nagpahiro sa garo bituon na idto para sundan kan mga astrologo pasiring ki Herodes?— Bako an tunay na Diyos na si Jehova, kundi an saiyang kaiwal na si Satanas na Diyablo!

Ngunyan, gusto ni Satanas na isipon kan mga tawo na si Jesus saro sanang beybi na mayong kalaban-laban. Pero sinabi kan anghel na si Gabriel ki Maria: ‘Siya maghahadi, asin dai nin katapusan an saiyang kahadian.’ Naghahadi na ngunyan si Jesus duman sa langit, asin madali na niyang ubuson an mga kaiwal nin Diyos. Kaya Hadi ngunyan si Jesus, asin kaipuhan tang sabihon iyan sa iba.