Pinapahalagahan daw ni Jehova an paghihinguwa kan mga nagsasamba sa saiya na mapaugma siya? Tibaad sabihon kan iba na dai, ta para sa sainda dai interesado sa sato an Diyos. Pero sala talaga an sinasabi nindang iyan. Maliwanag an sinasabi kan saiyang Tataramon, an Bibliya. Sinisigurado kaiyan sa sato na pinapahalagahan ni Jehova an paghihinguwa kan mga nagsasamba sa saiya nin may pagtubod. Pag-ulayan ta an sinabi ni apostol Pablo sa Hebreo 11:6.

Ano an kaipuhan para mapaugma si Jehova? Si Pablo nagsurat: ‘Kun dai nin pagtubod dai mahihimo na mapaugma an Diyos.’ Dai diyan sinabi ni Pablo na dipisil mapaugma an Diyos kun mayong pagtubod. Imbes, an sinabi kan apostol dai mahihimo, o imposibleng magibo, iyan. Buot sabihon, mahalaga an pagtubod para mapaugma an Diyos.

Anong klaseng pagtubod an nakakapaugma ki Jehova? Duwang bagay an dapat kaiba sa satong pagtubod sa Diyos. Inot, ‘kaipuhan tang tumubod na siya iyo nanggad.’ An ibang traduksiyon nagsasabing “magtubod na igwa nin Dios” asin “magtubod na sya nag-iexiste.” Paano ta magigibong mapaugma an Diyos kun nagdududa kita na totoo siya? Pero, bako sana iyan an kaiba sa tunay na pagtubod, ta maski an mga demonyo nagtutubod na totoo si Jehova. (Santiago 2:19) Kun may pagtubod kita na totoo an Diyos, dapat na mapahiro kita na patunayan iyan paagi sa pamumuhay na nakakapaugma sa saiya.—Santiago 2:20, 26.

Ikaduwa, “kaipuhan na tumubod” kita na an Diyos iyo “an parabalos.” An tawong may tunay na pagtubod kumbinsidong marhay na bakong sayang an paghihinguwa niya na mamuhay sa paagi na nakakapaugma sa Diyos. (1 Corinto 15:58) Paano ta mapapaugma si Jehova kun nagdududa kita kun baga kaya niya o gusto niya na tawan kita nin balos? (Santiago 1:17; 1 Pedro 5:7) An tawong nagsasabi na an Diyos daing malasakit, daing pagpapahalaga, asin bakong matinao dai bisto an Diyos kan Bibliya.

Siisay an tinatawan ni Jehova nin balos? An mga “naghahanap saiya,” an sabi ni Pablo. An sarong reperensiya para sa mga paratradusir kan Bibliya nagsasabi na an Griegong tataramon na trinadusir digdi na “naghahanap” dai nangangahulugan na literal na “paghanap” kundi nanunungod sa pagrani sa Diyos “sa pagsamba.” Ipinaliwanag man nin saro pang reperensiya na an Griegong pandiwang ini nagpapahiling nin kaigutan saka pagigin pursigido. Iyo, binabalusan ni Jehova an mga tawong napapahiro kan pagtubod ninda na sambahon siya nin may kaigutan asin bilog na puso.—Mateo 22:37.

Paano binabalusan ni Jehova an maimbod na mga nagsasamba sa saiya? Nangangako siya nin daing kapantay na balos—an buhay na daing katapusan sa Paraiso digdi sa daga—na nagpapahiling kun gurano siya kamatinao asin kamamumuton. (Kapahayagan 21:3, 4) Ngunyan pa sana, dakul nang bendisyon an nakakamtan kan mga maigot na naghahanap ki Jehova. Sa tabang kan saiyang banal na espiritu asin kadunungan na nasa Tataramon niya, maugma asin nakakakontento an buhay ninda.—Salmo 144:15; Mateo 5:3.

Si Jehova talagang mapag-apresyar na Diyos na nagpapahalaga sa paglilingkod kan maimbod na mga nagsasamba sa saiya. Napapahiro ka daw kaiyan na mas rumani sa saiya? Kun iyo, taano ta dai mo pag-adalan kun paano ka magkakaigwa asin makakapahiling kan klase nin pagtubod na abundang babalusan ni Jehova?