IBA man an opinyon kan mga parasuportar kan interfaith, o pag-iribanan nin mga relihiyon. “May aram kang relihiyon na daing pakiaram sa pagpahiling nin pagkahirak . . . , na daing pakiaram sa pangangataman kan kapalibutan . . . , na daing pakiaram sa pag-istimar sa iba?” an hapot ni Eboo Patel, kagpundar kan Interfaith Youth Core.

Totoo, may mga pagkakataon na nagtatarabangan an mga Budista, Katoliko, Protestante, Hindu, Muslim, asin dakul pang iba tanganing labanan an kadukhaan, ipaglaban an deretso nin tawo, ipagbawal an nakatalbong na mga bomba, o tawan nin atensiyon an mga isyu dapit sa kapalibutan. Nagtitiripon an manlain-lain na relihiyon tanganing pag-ulayan kun paano magkakasinarabutan asin magpaparinigunan nin buot. Isineselebrar ninda an saindang pagkakalain-lain paagi sa mga seremonya nin pagsulo nin kandila, kapiyestahan, musika, pangadyi, asin iba pa.

An pag-iribanan daw nin mga relihiyon an paagi tanganing mahali an dai ninda pagkakauruyon? An interfaith daw an paagi nin Diyos tanganing magin mas marahay an kinaban?

Ipinag-oorgulyo kan saro sa pinakadakulang organisasyon nin interfaith na may mga miyembro sinda hali sa labing 200 na relihiyon asin na aktibo sinda sa 76 na nasyon. An katuyuhan ninda iyo na “ipromotir an dagos-dagos na pagtatarabangan aroaldaw nin lain-lain na relihiyon.” Pero, mas madali iyan sabihon kisa gibuhon. Halimbawa, uyon sa mga nag-organisar kaiyan, maingat na pinili an mga tataramon sa saindang carta tanganing mayong makulgan sa dakul na relihiyon asin grupo nin mga katutubo na nagpirma sa dokumento. Taano? An sarong dahilan iyo na baranga sinda kun baga iiiba an Diyos sa carta. Kaya, linikayan ninda na pag-ulayan o sambiton an Diyos.

Kun dai kaiba an Diyos, ano na an serbi kan pagtubod? Dugang pa, ano na an pagkakalain ninda sa bakong relihiyosong mga organisasyon na nagtatabang sa kapwa? Iyan an dahilan kun taano ta sinabi ninda na sinda “sarong organisasyon na nagpopromotir nin pagtatarabangan” imbes na sarong relihiyosong organisasyon.

“An gabos na popular na relihiyosong tradisyon haros pare-pareho an mensahe: pagkamuot, pagkahirak, asin pagpatawad,” an sabi ni Dalai Lama, sarong prominenteng parasuportar nin interfaith. Sinabi pa niya: “An mahalaga magin parte iyan kan pang-aroaldaw na buhay ta.”

Talagang mahalaga an magagayon na kuwalidad na arog kan pagkamuot, pagkahirak, asin pagpatawad.  Sa inaapod na Golden Rule, sinabi ni Jesus: ‘An gabos na buot nindong gibuhon sa saindo nin mga tawo, gibuhon man nindo iyan sa sainda.’ (Mateo 7:12) Pero an tunay na pagtubod daw nangangahulugan sana nin pagpromotir na gibuhon kun ano an marahay?

Dapit sa mga nagsasabing naglilingkod sinda sa Diyos kan panahon ni apostol Pablo, sinabi niya: “Ako nagpapatotoo na igwa sinda nin kaigutan para sa Diyos, pero bakong uyon sa tamang kaaraman.” Ano an problema? “Dahil sa dai pakaaram kan katanusan nin Diyos,” an sabi ni Pablo, sinda “naghihinguwang patunayan an sadiri nindang katanusan.” (Roma 10:2, 3, NW) Huli ta mayo kan tamang kaaraman dapit sa gusto nin Diyos na gibuhon ninda, an saindang kaigutan—saka pagtubod—talagang sayang sana.​—Mateo 7:21-23.

“Maugma an mga mapagpatuninong,” an sabi ni Jesus. (Mateo 5:9, NW) Namuhay si Jesus uyon sa saiyang ihinuhulit. Itinukdo niya na dai magin madahas asin nagdara nin mensahe nin katuninungan sa mga tawo na lain-lain an relihiyon. (Mateo 26:52) An mga naghimati nagin matibay an bugkos nin pagkamuot sa lambang saro. (Colosas 3:14) Pero an katuyuhan sana daw ni Jesus iyo na pagkasararuon an mga tawong manlain-lain an pinaghalian tanganing magin matuninong sinda? Nakiiba daw siya sa paagi nin pagsamba kan iba?

Kinontrang marhay si Jesus kan mga lider nin mga Fariseo asin Saduceo—naghinguwa pa ngani sindang ipagadan siya. Ano an nagin reaksiyon niya? Sinabi ni Jesus sa saiyang mga disipulo: ‘Pabayai nindo sinda. Sinda mga butang parapanginot.’ (Mateo 15:14) Habo ni Jesus na makiiba sa pagsamba kan arog kaiyan na mga tawo.

Paghaloy-haloy, nagkaigwa nin Kristiyanong kongregasyon sa Corinto, Grecia—sarong siyudad na midbid na kadakul nin relihiyon asin kultura. Paano mahiro sa siring na kamugtakan an mga Kristiyano duman? Malinaw na sinabi ni apostol Pablo na dai sinda dapat makiiba sa paagi nin pagsamba kan iba kan siya magsurat: ‘Paanong magkauyon an katanusan asin an kabikuan? O anong pakisumaro kan liwanag sa diklom? Asin anong pakipag-uyon ni Cristo ki Belial [o, Satanas]?’ Dangan sinabihan niya sinda: ‘Kaya, humali kamo sa tanga ninda, asin bumulag kamo.’​—2 Corinto 6:14, 15, 17.

Malinaw nanggad, dai inuuyunan kan Bibliya an interfaith. Pero tibaad maghapot ka, ‘Kun arog kaiyan, paano magkakaigwa nin tunay na pagkasararo?’

An International Space Station​—sarong makangangalas na gibo nin teknolohiya na naglilibot sa planetang daga—​resulta kan nagkasararong paghihinguwa nin mga 15 nasyon. Sa paghuna mo, mahahaman kaya an proyektong ini kun an nagpartisipar na mga nasyon dai nagkauruyon sa kun anong plano an gagamiton?

Arog kaiyan an kamugtakan kan interfaith ngunyan. Pigpopromotir ninda an pagtatarabangan saka paggalang, pero wara sindang napagkauyunan na plano sa pagpakusog kan pagtubod. Huli kaiyan, nagkakabaranga pa man giraray sinda sa mga isyu sa moral asin mga katukduan arog kan dati.

Yaon sa Bibliya an mga pamantayan nin Diyos, na arog sa sarong plano. Puwede tang gamiton na giya sa satong buhay an mga sinasabi kan Bibliya. Nahali kan mga nagsunod sa mga katukduan kaiyan an diskriminasyon huli sa rasa asin relihiyon saka nakanuod sindang magtarabangan na matuninong asin sararo. Ihinula nin Diyos: “Babaguhon ko an lengguwahe kan mga banwaan na magin dalisay na lengguwahe, tanganing sinda gabos mag-apod sa pangaran ni Jehova, tanganing daramay na maglingkod sa saiya.” An pagkasararo resulta kan “dalisay na lengguwahe,” an pamantayan nin Diyos sa pagsamba.​—Sofonias 3:9, NW; Isaias 2:2-4.

Maugma kang iniimbitaran kan mga Saksi ni Jehova na magpasyar sa Kingdom Hall na harani sa saindo tanganing mahiling mo mismo an pambihirang katuninungan asin pagkasararo ninda.​—Salmo 133:1.