Malinaw na sinasabi kan Bibliya kun ano an gigibuhon ni Jehova pati kan saiyang Aki na si Jesu-Cristo sa kasakitan na dara ni Satanas na Diyablo. ‘Sa katuyuhan na ini an Aki nin Diyos [si Jesus] ihinayag,’ an sabi kan Bibliya, ‘tanganing laglagon an mga gibo kan Diyablo.’ (1 Juan 3:8) Lalaglagon an presenteng sistema nin mga bagay na lakop an kahanaban, pagkaungis, asin karatan. Nangako man si Jesus na hahalion an tagapamahala kan kinaban na ini na si Satanas na Diyablo. (Juan 12:31) Huling mayo na an impluwensiya ni Satanas, magkakaigwa nin sarong matanos na bagong kinaban asin magigin matuninong na an daga.​—2 Pedro 3:13.

Paano man idtong mga habong magbago asin padagos na naggigibo nin maraot? Pag-isipan an maaasahan na pangakong ini: ‘An mga [matanos] iyo an mag-iirok sa daga, asin an mga sangkap magdadanay diyan. Tara an mararaot na tawo pupuhuon sa daga, asin an mga makasalan hahalion diyan.’ (Talinhaga 2:21, 22) Mawawara na an impluwensiya kan maraot na mga tawo. Sa matuninong na kamugtakan na iyan, an makinuyog na mga tawo luway-luway na makakabutas sa minana nindang pagkabakong perpekto.—Roma 6:17, 18; 8:21.

Paano hahalion nin Diyos an karatan sa bagong kinaban na iyan? Dai niya hahalion an satong libertad sa pagdesisyon, na ginigibo kitang garo mga robot. Imbes, tutukduan niya an makinuyog na mga tawo kan saiyang mga dalan asin tatabangan niya sindang talikdan an saindang maraot na mga gibo asin kaisipan.

Ano an gigibuhon nin Diyos sa dai linalauman na mga kalamidad? Nangako siya na dai na mahahaloy, an Kahadian na niya an mamamahala sa daga. An Hadi na pinili nin Diyos sa Kahadian na iyan iyo si Jesu-Cristo, na may kapangyarihan na magpaumay nin mga hilang. (Mateo 14:14) May kapangyarihan man siyang kontrulon an mga puwersa nin naturalesa. (Marcos 4:35-41) Kaya, mawawara na an kasakitan na epekto kan ‘panahon asin pagkanurungod.’ (Parahulit 9:11) Sa pamamahala ni Cristo, dai na magkakaigwa nin kalamidad.—Talinhaga 1:33.

Paano man an minilyon na inosenteng mga tawo na terible an nagin kagadanan? Bago buhayon liwat an amigo niyang si Lazaro, si Jesus nagsabi: “Ako iyo an pagkabuhay liwat, asin an buhay.” (Juan 11:25) Iyo, may kapangyarihan si Jesus na buhayon liwat an mga nagadan!

Gusto mo daw na mabuhay sa kinaban na iyan na mayo nang mangyayaring maraot sa marahay na mga tawo? Hinguwahon na mas makanuod pa dapit sa tunay na Diyos asin sa saiyang katuyuhan paagi sa pag-adal kan Bibliya. Mauugma an mga Saksi ni Jehova sa lugar nindo na tabangan ka na magkaigwa kan kaaraman na iyan. Puwedeng-puwede mo sindang dulukon o kaya suratan an mga kagpublikar kan magasin na ini.