Nagdakula ako sa Rmaysh, harani sa sagkudan nin Israel asin Lebanon. Giyera sibil kaidto. Malinaw pa sa isip ko an mga pagsabog nin nakatanom na bomba, asin an mga inosenteng biktima na naputulan nin mga kalamias. Masakit an buhay, asin grabe an krimen saka kadahasan kaidto.

Miyembro an pamilya mi kan Maronite Church, saro sa mga Eastern Catholic Church. Dose kami sa pamilya, kaya pirming sibot si Tatay sa pagtrabaho, pero sinisigurado ni Nanay na makapagsimba dawa kami sana. Dai nahaloy narisa ko na an simbahan, arog kan sosyedad sa pangkagabsan, dai man nakakatabang sa mga maluya.

Kan tin-edyer ako, nahilig ako sa kung fu. Todo-todo su training ko kaidto, kaya nagin matibay ako sa pagsuntok saka pagsipa, asin sa paggamit nin iba-ibang armas sa martial arts. Sinabi ko sa sadiri ko, ‘Dai ko mapapapundo an giyera, pero maski papano, puwede kong pugulan an madahas na mga tawo.’ Pag nakakahiling ako nin duwang tawong nag-iiwal, nakikiaram tulos ako sainda. Arangguton ako kaidto saka madaling mawaran nin pasensiya. Takot sako an mga tawo sa bilog na katimugan kan Lebanon dahil nakikipaglaban ako sa inhustisya asin kadahasan sa paaging aram ko.

Kan 1980, naglaog ako sa sarong kung fu club sa Beirut. Aroaldaw na may nagsasabog na mga bomba, kanyon, saka mga rocket, pero nagduduman pa man giraray ako tanganing mag-training. An ginigibo ko sana kaidto magkakan, magturog, saka arugon si Bruce Lee, sarong Chinese-American na artista asin kampeon sa kung fu. Inarog ko an style kan buhok niya, paglakaw, saka pagkurahaw niya pag nagku-kung fu siya. Dai lamang ako kaidto nagngingirit.

Pangarap ko na magin propesyonal na para-kung fu sa China. Sarong banggi, mantang todo-todo su training ko bilang paghahanda sa pagduman ko sa China, may nagtuktok sa pinto. Su amigo ko palan kaiba an duwang Saksi ni Jehova. Sulot ko pa kaidto su itom kong uniporme sa kung fu saka grabe su ganot ko.  An sabi ko sainda, “Mayo lamang akong aram sa Bibliya.” Dai ko hunaon na puon kaidto mababago na an buhay ko.

Ipinahiling sa sako kan mga Saksi an sinasabi kan Bibliya kun taano ta dai kaya nin tawo na lubos na halion an inhustisya asin kadahasan. Ipinaliwanag ninda na si Satanas na Diyablo an talagang dahilan kan mga problemang iyan. (Kapahayagan 12:12) Naghanga ako sa kumpiyansa asin pagigin kalmado ninda. Saka napahiro ako kan sabihon nindang may pangaran an Diyos. (Salmo 83:18) Ipinahiling man ninda sako an 1 Timoteo 4:8, na nagsasabi: ‘An pagpatuod sa hawak may pakinabang na kadikit, alagad an kabanalan may pakinabang sa gabos na bagay huling may panuga iyan sa buhay na ini, asin sa madatong.’ Dakula an nagin epekto kan mga tataramon na idto sa sakong buhay.

Kaya lang, sinabihan sinda kan pamilya ko na dai na magbalik. Kaya dai ko na sinda nakaulay giraray. Pero, nakapagdesisyon na ako kaidtong ipundo an kung fu asin mag-adal nin Bibliya. Dai iyan nagustuhan kan mga tugang ko. Pero, desidido pa man giraray akong hanapon an Mga Saksi ni Jehova tanganing magpa-study sa sainda.

Nagparahanap ako nin mga Saksi pero mayo akong nahiling. Munduon ako kan panahon na idto ta biglang nagadan an sakong Ama, tapos nagkaigwa pa nin mga problema an pamilya mi. Nagpuon akong magtrabaho sa konstruksiyon. Dangan sarong aldaw, hinapot ako kan katrabaho kong si Adel kun ta‘no ta mamundo ako. Inistorya niya sa sako an sinasabi kan Bibliya manungod sa paglaom na pagkabuhay liwat. Sa suminunod na siyam na bulan, mapasensiyang tinukduan ako sa Bibliya kan mamumuton asin mabuot na Saksing si Adel.

Mantang nagpapadagos an pag-adal ko, nahiling ko na kadakul palan an kaipuhan kong baguhon sa ugali ko. Dipisilon iyan ta pirmi akong iritable saka madaling mag-init an payo. Nanudan ko sa Bibliya an pagkontrol sa sadiri ko saka kun paano dai mapadara sa sakong emosyon. Halimbawa, sa Mateo 5:44 may sadol si Jesus: ‘Kamutan nindo an saindong mga kaiwal, asin ipamibi nindo an mga naglalamag saindo.’ Asin an Roma 12:19 nagpapatanid: ‘“Dai kamo magbalos,” huli ta nasusurat, “‘Sa sako an pagbalos; ako an mabalos,’ an sabi nin Kagurangnan.”’ Padiit-diit, an mga tekstong iyan saka an iba pa nakatabang sa sako na magin kalmado.

Dawa kan inot kontra an pamilya ko sa pakikipag-adal ko sa Mga Saksi ni Jehova, nag-abot an panahon na irinespeto na ninda an mga Saksi. May saro ngani akong tugang na lalaki na nagin Saksi. Asin kaidtong buhay pa si Nanay, idinedepensa niya sa iba an samong pagtubod.

Bendisyon man sa sako si Anita, an marahayon asin maimbod kong agom na nagin kapartner ko sa sakong bilog na panahon na paglilingkod. Puon kan 2000, nag-istar kami ni Anita sa Eskilstuna, Sweden. Nagtabang kami duman sa pagtutukdo nin Bibliya sa mga tawong nagtataram nin Arabe.

Nahihirak pa man giraray ako sa mga tawong nagsasakit huli sa kadahasan. Pero dahil aram ko an tunay na dahilan kaiyan—asin na dai mahahaloy hahalion na iyan nin Diyos—nagtatao iyan sa sako nin tunay na kaugmahan asin katuninungan.—Salmo 37:29.