‘AN Diyos Espiritu,’ dai siya nahihiling nin tawo. (Juan 4:24) Pero, sinasabi kan Bibliya na may mga tawo na masasabing nakahiling sa Diyos. (Hebreo 11:27) Paano iyan nagin posible? Puwede daw talagang mahiling an ‘Diyos na dai nahihiling’?​—Colosas 1:15.

Ikumparar an satong sitwasyon sa tawong namundag na buta. Dahil daw ta buta siya dai na niya puwedeng masabutan an mga bagay-bagay sa palibot niya? Dai man. An sarong buta puwedeng makakua nin impormasyon sa iba-ibang paagi kaya nagkakaideya siya manungod sa mga tawo, bagay, asin sa mga nangyayari sa palibot niya. “Bakong mata an nakakahiling,” an sabi nin sarong lalaking buta. “Kundi an isip.”

Sa kaparehong paagi, dawa dai mo puwedeng mahiling an Diyos gamit an saimong mata, puwede mong gamiton an ‘mata kan saimong puso’ tanganing mahiling siya. (Efeso 1:18) Hilingon ta an tulong paagi kun paano iyan puwedeng gibuhon.

An tawong buta sa parati mas sensitibo an pagdangog asin pakamati, na iyo an nakakatabang sa saiya na maintindihan an mga bagay na dai niya nahihiling. Puwede mo man gamiton an saimong mga sentido (senses) sa pag-aram kan mga bagay sa palibot tanganing garo mo mahiling an dai nahihiling na Diyos na naglalang kaiyan. ‘An mga [kuwalidad] niya na dai nahihiling malinaw na nahihiling puon pa kan lalangon an kinaban huli sa mga bagay na ginibo niya.’​—Roma 1:20.

Halimbawa, pag-isipan an satong planetang Daga. Dinisenyo iyan bako sanang para basta mabuhay kita kundi mabuhay na maugma. Nauugma kita pag namamati ta an preskong duros, init kan aldaw, pag nakakanamit kita nin mahamis na prutas, o pag nakakadangog kita nin magayon na huni nin gamgam. Bako daw na ipinapahiling kan mga regalong ini na an satong Kaglalang maasikaso, mapagpadaba, asin bukas-palad?

Ano an manunudan mo manungod sa Diyos sa mga nahihiling mo sa uniberso? Inot, ipinapahiling kan kalangitan an kapangyarihan nin Diyos. Sa dai pa sana nahahaloy na nadiskubre kan mga siyentista, ipinapahiling na an satong uniberso dai lang naghihiwas kundi marikas na naghihiwas! Kun matingkalag ka sa langit pag banggi, isipon ini: Sain hali an puwersang ini na iyo an marikas na nagpapahiwas kan uniberso? Sinasabi sa sato kan Bibliya na grabe kakusog kan enerhiya kan Kaglalang. (Isaias 40:26) An mga linalang nin Diyos nagpapahiling na siya an ‘Makakamhan sa Gabos’​—an Saro na ‘dakula sa kapangyarihan.’​—Job 37:23.

Sarong ina na may duwang aking dai nakakahiling an nagsabi: “An pag-istorya saro sa pinakaimportanteng paagi para makanuod sinda. Sabihon mo sainda an gabos mong nahihiling asin nadadangog, [asin] pirming magin handa na mag-istorya sainda. Ika an saindang mata.” Kaagid kaiyan, dawa ‘dai nin siisay man na nakahiling sa Diyos kasuarin man,’ an Aki nin Diyos na si Jesus, ‘na nasa [kataid] nin Ama, an saro na naghahayag Saiya.’ (Juan 1:18) Bilang an inot na linalang asin bugtong na Aki, si Jesus an satong “mata” para mahiling an langit. Siya an pinakamarahay na makukuanan nin impormasyon manungod sa dai nahihiling na Diyos.

Haluyon na panahon na nakaiba ni Jesus an Diyos. Hilingon ta an pira sa mga sinabi niya manungod sa saiyang Ama:

• An Diyos mahigos. ‘An sakong Ama sagkod ngunyan naggigibo.’​—Juan 5:17.

•  Aram nin Diyos an satong mga pangangaipo. ‘An saindong Ama nakakaisi na kan saindong mga kakulangan, bago nindo iyan hagadon saiya.’​—Mateo 6:8.

• An Diyos bukas-palad na nagtatao sa sato. ‘An saindong Ama na nasa langit pinapasirang an saiyang aldaw sa mga maraot asin sa mga marahay.’​—Mateo 5:45.

• Mahalaga sa Diyos an kada saro sato. ‘Bakong ipinapabakal an duwang dignos nin sarong sentabo? Ni saro sa sainda dai mahuhulog sa daga na dai maisihan kan saindong Ama. Alagad minsan ngani an mga buhok nin saindong payo nabibilang gabos. Kaya dai kamo matakot. Kamo mahalaga pang gayo kisa dakul na dignos.’​—Mateo 10:29-31.

Sa parati, iba an pag-intindi nin mga buta sa mga bagay-bagay kumpara sa mga nakakahiling. Puwedeng imahinaron nin sarong buta an anino bako bilang sarong madiklom na korte, kundi sarong lugar na mayong init nin aldaw. Kun paanong dai nakakahiling an sarong buta nin anino o liwanag nin aldaw, dai ta man maiintindihan si Jehova sa sadiri ta sanang pag-iisip. Kaya, nagtao si Jehova nin sarong tawo na perpektong mapahiling kan Saiyang personalidad asin mga kuwalidad.

An tawong iyan iyo si Jesus. (Filipos 2:7) Dai sana nagtaram si Jesus manungod sa saiyang Ama kundi ipinahiling man niya kun anong klaseng Diyos siya. Sinabihan si Jesus kan disipulo niyang si Felipe: ‘Kagurangnan, pahilingan samo an Ama.’ Si Jesus nagsimbag: ‘An nakahiling sako, nakahiling sa Ama.’ (Juan 14:8, 9) Ano an puwede mong “mahiling” sa Ama paagi sa mga ginibo ni Jesus?

Si Jesus mabuot, mapakumbaba, asin madaling dulukon. (Mateo 11:28-30) Gustong-gusto siya kan mga tawo. Namatian niya an kulog na namatian nin iba, asin nakikiugma siya sa kaugmahan ninda. (Lucas 10:17, 21; Juan 11:32-35) Pag binabasa mo o nadadangog an mga istorya sa Bibliya manungod ki Jesus, tawan iyan nin buhay sa saimong isip. Kun iisip-isipon mo kun paano nakiiba si Jesus sa mga tawo, mas malinaw mong mahihiling an magayunon na personalidad nin Diyos asin mapaparani ka sa Saiya.

Mapadapit sa kun paano pig-iintindi nin sarong buta an mga bagay-bagay, nagsabi an sarong awtor: “Padiit-diit, nakakakua siya nin mga impormasyon sa iba-ibang paagi (pakamati, pamarong, pagdangog, asin iba pa), dangan, pigkokone-konektar niya iyan para makabilog nin sarong impormasyon.” Sa kaagid na paagi, mantang naoobserbaran mo an mga linalang nin Diyos, nababasa an mga sinabi ni Jesus manungod sa saiyang Ama, asin nahihiling ki Jesus an mga kuwalidad kan Diyos, mahihiling mo sa saimong isip an sarong magayon na ladawan ni Jehova. Mas magigin buhay siya sa saimo.

Naeksperyensiyahan mismo iyan ni Job, na nabuhay kan inot na mga panahon. Kaidto, nagtaram siya maski ‘dai niya nasasabutan.’ (Job 42:3) Pero pakatapos na mahiling an mga linalang nin Diyos, napahiro si Job na magsabing: ‘Sa dangog nadangog taka, alagad ngunyan nahihiling ka kan sakuyang mga mata.’—Job 42:5.

Magigibo mo man iyan. ‘Kun hahanapon mo si Jehova, makukua mo siya.’ (1 Cronica 28:9) Mauugma an Mga Saksi ni Jehova na tabangan kang hanapon asin mahiling an dai nahihiling na Diyos.