May sarong ama na kaulay an saiyang siyete anyos na aking lalaki. Nag-istorya siya, “Kaidtong haluyon nang panahon, ginibo nin Diyos an daga saka an gabos na yaon diyan. Ginibo man niya an aldaw, bulan, pati mga bituon.” Napapundo an aki asin nag-isip, dangan naghapot, “Papa, si’say po palan an naggibo sa Diyos?”

“Mayong naggibo sa Diyos,” an simbag kan ama. “Dai siyang kapinunan.” Nakontento na an aki sa simpleng paliwanag na iyan. Pero mantang nagdadakula siya, pinag-iisipan niya pa man giraray iyan. Dai niya lubos na maintindihan kun paanong an saro dai nin kapinunan. An uniberso ngani may kapinunan. ‘Kaya sain hali an Diyos?’ an naisip niya.

Paano iyan sinisimbag kan Bibliya? Haros arog man kan pagkasimbag kan ama na binanggit sa inutan. Nagsurat si Moises: ‘Kagurangnan, bago lalangon an kabukidan, bago mahaman an daga asin an kinaban, ika Diyos na mayong kapinunan asin mayong katapusan.’ (Salmo 90:1, 2, BPV *) Kapareho man kaiyan an sinabi ni propeta Isaias: ‘Dai nindo aram? Dai nindo nadangog? An Kagurangnan iyo an mayong katapusan na Diyos; linalang niya an bilog na kinaban.’ (Isaias 40:28, BPV) Sinabi man sa surat ni Judas na yaon na an Diyos “sa bilog na nakaaging panahon na daing sagkod.”​—Judas 25, NW.

Ipinapahiling sa sato kan mga tekstong iyan na an Diyos ‘Hadi na dai nin katapusan,’ arog kan sinabi ni apostol Pablo. (1 Timoteo 1:17) Buot sabihon, an Diyos pirming yaon, gurano man kahaloy na panahon an balikan ta. Asin pirmi man siyang yaon sagkod sa panahon na daing katapusan. (Kapahayagan 1:8) Kaya, an saiyang pagigin daing sagkod sarong pundamental na kuwalidad kan Makakamhan sa Gabos.

Taano ta dai ta lubos masabutan an ideyang iyan? Limitado sana an lawig kan buhay ta kaya ibang-iba an satong ideya kumpara ki Jehova kun dapit sa panahon. Dahil an Diyos daing sagkod, an sangribong taon saiya garo sarong aldaw sana. (2 Pedro 3:8) Pag-isipan ini: Kaya daw na maintindihan nin sarong lukton (grasshopper), na an buhay mga 50 aldaw sana, an buhay nin tawo na minalawig nin 70 o 80 taon? Dai nanggad! Sinasabi kan Bibliya na kita garo mga lukton sana kumpara sa satong Dakulang Kaglalang. Maski an satong kakayahan na mangatanusan limitado man na marhay kumpara saiya. (Isaias 40:22; 55:8, 9) Kaya bakong makangangalas na may mga bagay manungod ki Jehova na dai talaga lubos na maiintindihan nin tawo.

Iyo, dipisil maintindihan an ideya dapit sa daing sagkod na Diyos, pero rasonable iyan. Kun may naglalang sa Diyos, an sarong iyan an magigin Kaglalang. Pero, arog kan sinasabi sa Bibliya, si Jehova an “naglalang kan gabos na bagay.” (Kapahayagan 4:11) Saro pa, aram ta na may panahon kaidto na mayo pa an uniberso. (Genesis 1:1, 2) Sain iyan hali? Dapat na nainot nguna an Kaglalang kaiyan. Yaon na man siya bago pa an ibang intelihenteng mga linalang, arog kan saiyang bugtong na Aki asin mga anghel. (Job 38:4, 7; Colosas 1:15) Malinaw na may panahon na siya sana an yaon kaidto. Dai puwedeng may naglalang sa saiya; mayo pang ibang buhay kaidto na puwedeng maglalang saiya.

An pagigin buhay ta saka an bilog na uniberso patunay na igwa nin daing sagkod na Diyos. An Saro na nagpapahiro sa satong mahiwason na uniberso asin an Saro na naggibo kan mga ley na nagkokontrol kaiyan, dapat na daing kapinunan asin daing katapusan. Siya sana an makakatao nin buhay sa gabos na linalang.​—Job 33:4.