Ipinangaki si Jairo na may spastic quadriplegia, sarong klase nin cerebral palsy. * Huli kaini, haros mayo siyang kontrol sa saiyang hawak. An saiyang hutok dai nakakatao nin malinaw na signal sa saiyang mga kalamnan, kaya dai niya makontrol an pagbiribid kan saiyang mga kalamias. Kun minsan, an biglang mga pag-igtad nagigin dahilan na makulgan niya mismo an saiyang sadiri. Puwede man makulgan an mga tawong nasa harani kun bako sindang alisto. Makamumundo na sa parati kaipuhan na igapos an saiyang mga takyag asin tabay sa wheelchair niya tanganing malikayan an arog kaiyan na mga aksidente.

Grabeng kulog an namatian ni Jairo mantang nagdadakula siya. Tulong bulan siya kan magpuon siyang atakehon nin pangingisay asin nawawaran siya nin malay huli kaiyan. Sa parati, higot siyang kukuguson ni Nanay asin tulos na idadalagan sa ospital, sa paghunang gadan na siya.

Huli sa parating paghirigot asin pananaragas kan kalamnan, naraot an porma kan mga tulang ni Jairo. Kan siya 16 anyos, nalapuan siya sa may piad asin kinaipuhan an mayor na operasyon sa saiyang lapi sagkod piad. Nagigirumduman ko pa an burubangging paghibi ni Jairo huli sa kulog kan siya nagpaparahay.

Huli sa grabeng diperensiya sa hawak ni Jairo, nag-aasa siya sa iba para sa gabos na kaipuhan niya sa aroaldaw arog kan pagkakan, pagsangli nin bado, asin paghigda. Si Nanay saka si Tatay an parating naggigibo kaini. Dawa ngani pirming kaipuhan ni Jairo an tabang, parating ipinapagirumdom sa saiya kan samong mga magurang na an buhay niya dai sana nakadepende sa mga tawo kundi sa Diyos man.

Mga Saksi ni Jehova an samong mga magurang, asin puon pa sa pagkaumboy binabasahan na ninda si Jairo kan mga istorya sa Bibliya. Haloy na nindang aram na mas makahulugan an buhay kun an saro may marahay na relasyon sa Diyos. Si Jairo garo baga nakapreso sa sarong hawak na maluya asin pirming nangingisay, pero igwa siya nin maugma saka masarig na paglaom sa maabot. Minsan siring, parati nindang iniisip-isip kun nasasabutan ni Jairo an kaaraman hali sa Bibliya.

Sarong aldaw kan aki pa si Jairo, hinapot siya ni Tatay, “Jairo, puwede tabing kaulayon mo ako?” Sinabi niya pa, “Kun talagang padaba mo ako, gigibuhon mo iyan!” Mantang nakikimahirak sa saiya si Tatay na magtaram dawa saro sanang tataramon, napahibi si Jairo.  Dawa ngani pinurbaran niyang sabihon an nasa buot niya, dai maintindihan sanang tanog hali sa halunan an nagluwas. Namundo si Tatay huling pinahibi niya si Jairo. Pero ipinahiling kan reaksiyon ni Jairo na nasasabutan niya an sinasabi ni Tatay. An problema iyo na dai siya makataram.

Dai nahaloy, narisa kan samong mga magurang na kun minsan marikas na minahiro an mga mata ni Jairo na garo baga pinupurbaran niyang ipaaram an nasa buot asin namamatian niya. Nakakapangluya sa buot ni Jairo na dai siya maintindihan kan iba. Pero kan maaraman kan mga magurang ko kun ano an ipinapasabot kan mga paghiro kan saiyang mga mata asin naitatao kun ano an kaipuhan niya, mahihiling an kaugmahan ni Jairo huling abot talinga an ngirit niya. Iyan an paagi niya nin pagpasalamat.

Sarong therapist sa pagtaram an nagrekomendar nin paagi sa mas marahay na komunikasyon. Kaipuhan ming iitaas an duwang kamot mi kun hinahapot mi siya na an simbag iyo o dai. An tuo nangangahulugan nin iyo asin an wala nangangahulugan nin dai. Paagi sa pagturuhok sa tamang kamot, maipapasabot niya kun ano an gusto niyang sabihon.

Tulong beses sa sarong taon, may mga asembleya asin kumbensiyon an Mga Saksi ni Jehova na diyan dakul an nakakadangog nin mga pahayag hali sa Bibliya. Gustuhon pirmi ni Jairo na madangog an pahayag para sa mga babawtismuhan. Sarong aldaw, kan siya 16 anyos, hinapot siya ni Tatay, “Jairo, gusto mong mabawtismuhan?” Tulos na nagsimbag si Jairo paagi sa desididong pagturuhok sa tuong kamot ni Tatay, na nagpapahiling kan saiyang kagustuhan na magpabawtismo. Dangan, nagsabi pa si Tatay, “Nangako ka na sa Diyos paagi sa pamibi na paglilingkudan mo siya sagkod lamang?” Tulos na nagturuhok giraray si Jairo sa tuong kamot ni Tatay. Malinaw na idinusay na ni Jairo ki Jehova an saiyang buhay.

Pagkatapos nin nagkapirang pag-urulay sa Bibliya, nagin malinaw man sa sainda na nasasabutan ni Jairo an kahalagahan kan Kristiyanong bawtismo. Kaya, kan 2004, sinimbag niya an pinakamahalagang hapot sa saiya kasuarin man, “Idinusay mo na daw an saimong sadiri sa Diyos tanganing gibuhon an saiyang kabutan?” Sinimbag ni Jairo an hapot na ini paagi sa paghiling sa itaas. Iyan an napagkauyunan nang paagi nin pagsabi niya nin iyo. Kaya, sa edad na 17, nabawtismuhan siya bilang saro sa Mga Saksi ni Jehova.

Kan 2011, nagkaigwa nin bagong paagi tanganing makikomunikar si Jairo—an kompyuter na nakokontrol nin mata (eye-controlled computer). Nagigibo kan gadyet na ini na i-activate an mga icon sa screen kan kompyuter paagi sa mga hiro kan saiyang alintataw (iris). An pagkisap o pagturuhok sa icon garo man sana pag-click kan mouse nin kompyuter. Sa screen, igwa nin ginibong mga pictogram (mga ritrato na nagrerepresentar  sa mga tataramon o frase) para tabangan si Jairo sa pakikikomunikar. Kun makisap siya sa saro sa mga ini, an program sa kompyuter (built-in software) ikukumbertir an nakasurat na mensahe tanganing magprodusir nin elektronikong boses.

Mantang nadadagdagan an pakasabot ni Jairo sa Bibliya, nagkukusog man an saiyang pagmawot na tabangan sa espirituwal an iba. Sa samong surusemanang pampamilyang pag-adal sa Bibliya, pabalik-balik an hiling niya sa sako asin sa kompyuter niya. Ini an paagi niya nin pagpagirumdom sa sako na kaipuhan kong isurat an mga puwede niyang ikomento sa hapot-simbagan na kabtang nin pagtiripon sa samong Kristiyanong kongregasyon.

Sa pagtiripon kan kongregasyon, mapasensiyang pinipili niya sa screen an tamang icon na iki-click, dangan madadangog kan gabos an saiyang elektronikong boses. Abot talinga an ngirit niya pag napapakusog niya an saiyang mga kakongregasyon sa paaging ini. Si Alex, saro sa mga hoben na amigo ni Jairo, nagsabi, “Pirmi akong napapahanga pag nadadangog ko an mga komento ni Jairo manungod sa sarong tema sa Bibliya.”

Ginagamit man ni Jairo an mga mata niya tanganing sabihon sa iba an manungod sa saiyang pagtubod. An sarong paagi na nagigibo niya ini iyo an pag-click sa ritrato nin sarong hardin na diyan matuninong na namumuhay an mga hayop asin an mga tawo na lain-lain an lahi. Pag pigki-click niya ini, sasabihon kan saiyang elektronikong boses, “An paglaom na sinasabi kan Bibliya iyo na an daga magigin sarong paraiso kun sain mayo na nin hilang asin kagadanan, Kapahayagan 21:4.” Pag nagkainteres an saiyang kaulay, iki-click niya an saro pang icon asin madadangog giraray an saiyang elektronikong boses na nagsasabi, “Gusto mong makipag-adal nin Bibliya sa sako?” Nakakasurpresa na inako kan samong lolo an imbitasyon na ini. Nakakaugmang mahiling si Jairo, sa tabang nin sarong kapwa Saksi, na luway-luway na tinutukduan si Lolo sa Bibliya! Nakakaugma ta kan Agosto 2014, nabawtismuhan si Lolo sa pangrehiyon na kumbensiyon sa Madrid.

Narisa man kan mga maestra ni Jairo sa eskuwelahan an saiyang debosyon sa Diyos. Si Rosario, saro sa mga speech therapist, nagsabi: “Kun mabalyo man ako nin relihiyon, magigin Saksi ni Jehova ako. Nahiling ko kun paanong an pagtubod ni Jairo nagtao nin tunay na kahulugan sa saiyang buhay, sa ibong kan saiyang masakit na kamugtakan.”

Mahihiling pirmi an kaugmahan sa mga mata ni Jairo pag binabasa ko sa saiya an panuga kan Bibliya: ‘An pilay malukso na garo usa, asin mag-aawit an dila kan pula.’ (Isaias 35:6) Dawa ngani kun minsan nangluluya an buot niya, sa parati maugma siya. Nagin posible sana ini huling an buhay niya nakasentro sa Diyos asin sa saiyang Kristiyanong mga amigo. An pagigin positibo niya asin pagkaigwa nin makusog na pagtubod patunay na an paglilingkod ki Jehova ginigibong maugma pa man giraray an mabuhay dawa may kasakitan.