Nagdakula ako sa tios na lugar sa siyudad nin Montreal. Kan ako anom na bulan pa sana, nagadan an sakong ama, kaya nawalat sa sakong ina an gabos na responsabilidad sa pamilya. Ako an kangudhan sa walong magturugang sa pamilya mi.

Kan nagdadakula ako, nagin parte na kan buhay ko an droga, sugal, kadahasan, asin pakikiiba-iba sa mga kriminal. Kan ako diyes anyos, ginigibo ko an ano man na isugo sako kan mga hostes asin mga nagpapautang na may dakulaon na interes. Parati akong nagpuputik asin ugmahon akong manipularon an mga tawo tanganing lokohon sinda. Garo iyan nakakaadik na droga para sako.

Kan ako 14 anyos na, matibayon na ako sa pangloloko nin mga tawo. Halimbawa, nagbabakal ako nin kadakul na relo, porselas, asin singsing na tubog sa bulawan, tatatakan ko iyan nin 14-karat na bulawan gamit an sarong pang-ukit, dangan ipapabakal ko iyan sa tinampo asin mga paradahan nin awto kan mga shopping center. Nawili akong maray sa pagkaigwa nin kuwarta sa pasil na paagi. Sarong beses, naka-$10,000 ako sa sarong aldaw sana!

Pinatalsik ako sa eskuwelahan na repormatoryo kan ako 15 anyos, kaya mayo na akong maistaran. Nagturog ako sa mga gilid nin tinampo, parke, o sa mga kabisto ko na nagpadagos sako.

Huli sa mga pangloloko ko, parati akong inuusisa nin mga pulis. Huling dai man ako nagpapabakal nin mga hinabunan, nungka akong napreso. Minsan siring, nagbayad ako nin dakulaon na mga multa huli sa pangloloko asin pagtinda na daing permit. Huling daing kinakatakutan, nangolekta pa ngani ako nin kuwarta para sa mga nagpapautang na may dakulaon na interes. Delikado iyan, kaya kun beses may dara akong badil. May mga pagkakataon na nag-iiba ako sa sindikato.

Inot kong nadangog an manungod sa Bibliya kan ako 17 anyos. Nagsasaro na kami kan kailusyon ko kan magpuon siyang makipag-adal nin Bibliya sa Mga Saksi ni Jehova. Pero, dai ko nagustuhan an istriktong pamantayan kan Bibliya sa moral, kaya binayaan ko siya asin nakisaro sa ibang babayi na dati ko nang pigdi-date.

An dakulang pagbabago nagpuon kan an ikaduwa kong kailusyon makipag-adal man sa mga Saksi! May ginibo siyang mga pagbabago sa buhay niya, asin naghanga ako ta nagin mahuyo siya asin mas mapasensiya. Inako ko an imbitasyon sa sarong pagtiripon sa Kingdom Hall kan Mga Saksi ni Jehova. Inistimar ako kan mga tawong disente asin mabuot. Ibang-iba nanggad sa kamugtakan na dinakulaan ko! Dai ko lamang namatian na gusto ako kan pamilya ko. Puon sa pagkaaki, dai ko namatian an pagpadangat asin pagkamuot. An kabuutan asin pagkamuot na ipinahiling sako kan mga Saksi ni Jehova iyo talaga an hinahanap-hanap ko. Kan inalok ako kan mga Saksi na mag-adal nin Bibliya, maugma kong inako iyan.

An mga nanudan ko sa Bibliya posibleng iyo an nagligtas sa buhay ko. Ako saka an duwa ko pang kaiba nagplano na maghabon tanganing mabayadan an mga utang ko sa sugal na uminabot nin labing $50,000. Maray sana ta dai ko idinagos iyan! Pero, idinagos kan dati kong mga kaiba an paghabon. An saro sa sainda inarestar, asin an saro pa nagadan.

Mantang nagpapadagos ako sa pag-adal kan Bibliya, nahiling ko na kadakul palan akong dapat baguhon sa buhay ko. Halimbawa, nanudan ko an sinabi kan Bibliya sa 1 Corinto 6:10: ‘An mga parahabon, maaraon, paraburat, paramuda, asin maagaw dai magmamana kan Kahadian nin Diyos.’ Kan binasa ko an bersikulong iyan, napahibi ako ta grabe palan an ginigibo ko. Narealisar ko na kaipuhan kong lubos na baguhon an buhay ko. (Roma 12:2) Madahas ako saka agresibo, asin an bilog kong buhay pano nin kaputikan.

Minsan siring, nanudan ko man paagi sa pag-adal kan Bibliya, na si Jehova mahihirakon asin mapagpatawad. (Isaias 1:18) Udok sa puso akong namibi, na nakikimahirak ki Jehova na tabangan akong makabutas sa dati kong pamumuhay. Sa tabang niya, luway-luway kong nabago an sakong personalidad. An sarong importanteng lakdang iyo an pagpakasal mi kan kailusyon ko.

Ako kaidto 24 anyos, may agom saka may tulong aki. Kaipuhan ko nang maghanap nin legal na trabaho. Pero hababa an inadalan ko asin daing makakatao sa sako nin marahay na rekomendasyon. Udok akong namibi giraray ki Jehova. Dangan naghanap ako nin trabaho. Sinabihan ko an mga inaplayan ko na gusto kong magbagong buhay asin magkaigwa nin legal na trabaho. Kun beses, ipinapaliwanag ko na nag-aadal ako nin Bibliya asin gusto kong magin mas marahay na siyudadano. Nagsayuma an dakul na inaplayan ko na akuon ako sa trabaho. Sa katapos-tapusi, pagkatapos kong sabihon sa saro pang interbiyu an dati kong buhay, sinabi kan nag interbiyu: “Dai ko aram kun ta’no, pero gusto takang kuanon na magtrabaho sako.” Nagtutubod ako na ini an simbag sa mga pamibi ko. Pag-abot ni panahon, pareho kaming nabawtismuhan kan agom ko bilang Mga Saksi ni Jehova.

Buhay ako ngunyan huling inaaplikar ko an mga prinsipyo sa Bibliya asin namumuhay bilang Kristiyano. Maugma an pamilya mi. Malinig an konsiyensiya ko huling kumbinsido ako na pinatawad na ako ni Jehova.

Katorseng taon na ako sa bilog na panahon na ministeryo, na nagtatabang sa iba na manudan kun ano an itinutukdo kan Bibliya, asin dai pa sana nahahaloy, inibanan ako kan agom ko sa bilog na panahon na ministeryo. Sa nag-aging 30 taon, maugma ako na natabangan ko an 22 na katrabaho ko na sumamba ki Jehova. Nagduduman pa man giraray ako sa mga shopping center—pero bakong para mangloko nin mga tawo arog kan dati kong ginigibo. Ngunyan pag nagduduman ako parati kong ipinapakipag-ulay sa iba an sakong pagtubod. May gusto akong itao sa sainda: an paglaom na mabuhay sa maabot na bagong kinaban na mayo na nin mga mangloloko.—Salmo 37:10, 11.