TEMA SA COVER | MGA SAKSI NI JEHOVA—SIISAY SINDA?
Taano ta Naghuhulit Kami?
Midbid na marhay siguro kaming Mga Saksi ni Jehova huli sa samong mahiwas na pag-eebanghelyo o paghuhulit
Naghuhulit kami huling gusto ming maumaw an Diyos asin ipamidbid an pangaran niya. (Hebreo 13:15) Gusto mi man na sunudon si Cristo Jesus, na nagtao kan pagbuot na ini: ‘Paduman kamo asin gibuhon nindong disipulo an gabos na nasyon, na tukduan sinda na utubon an gabos na ipinagbuot ko saindo.’
Apuwera diyan, namumutan mi an samong kapwa. (Mateo 22:39) Siyempre, aram mi na an kadaklan sa mga nakakaulay mi may sadiri nang relihiyon saka bakong gabos interesado sa mensahe mi. Pero nagtutubod kami na nakakapagligtas nin buhay an mga itinutukdo kan Bibliya. Kaya padagos kaming nakikipag-ulay sa iba, na ‘daing untok sa pagtukdo asin paghulit na si Jesus iyo an Cristo,’ arog kan ginibo kan mga Kristiyano kan inot na siglo.
Nagkomento an sosyologong si Antonio Cova Maduro mapadapit sa “paghihinguwa asin sakit na inaatubang kan mga Saksi ni Jehova, sagkod sa punto na pagal-pagal na sinda . . . , tangani na maipaabot an banal na kasuratan sagkod sa pinakaharayong parte kan daga.”
Kadaklan sa mga nagbabasa kan babasahon mi bakong Saksi ni Jehova. Saka an minilyon na tinutukduan mi sa Bibliya iba an relihiyon. Pero nagpapasalamat sinda na binibisita sinda kan mga Saksi.
Posibleng may mga hapot ka pa dapit sa Mga Saksi ni Jehova. Aramon tabi an simbag. Puwede kang . . .
-
Maghapot mismo sa mga Saksi ni Jehova.
-
Maglaog sa website mi na www.pr418.com.
-
Mag-atender sa samong Kingdom Hall, na bukas sa gabos saka mayo nin koleksiyon.
Puwede Mo Man Magustuhan
PARATING MGA IHINAHAPOT
Iniisip Daw kan Mga Saksi ni Jehova na Sinda Sana an Maliligtas?
Sinasabi kan Bibliya kun sairisay an puwedeng maligtas.
PARATING MGA IHINAHAPOT
Iginagalang Daw kan Mga Saksi ni Jehova an Ibang Relihiyon?
Aramon kun paanong an paggalang tanda nin tunay na mga Kristiyano.
