Namundag ako sa Paddington, sarong matawong lugar sa London, England. Kaiba ko sa harong an sakong ina asin tulong tugang na babayi na matua sako. Bihira ming makaibanan an samong ama huli sa problema niya sa arak.

Kan aki pa ako, tinukduan ako kan sakong ina na mamibi burubanggi. May sadit akong Bibliya na Salmo sana an laog, asin nag-iimbento ako nin mga tono tanganing makanta ko iyan. May nabasa ako kaidto sa sarong sekular na libro na dai ko malingaw-lingawan, an sabi: “Maabot an aldaw na mayo nang agang naghahalat.” Dahil sa mga tataramon na iyan, may mga bangging dai ako nakakaturog sa pagparaisip sa mangyayari sa maabot na panahon. Sa buot-buot ko, ‘Imposibleng arog sana kaini an buhay. Ano ta yaon ako digdi?’ Habo kong magadan!

Nagkainteres akong marhay sa okultismo. Pinurbaran kong makipag-ulay sa mga gadan, nagduduman ako sa mga sementeryo kaiba kan mga kaeskuwela ko, asin naghihiling kami nin horror na mga pelikula. Nakakatakot idto pero exciting.

Nagpuon akong magin pasaway kan 10 anyos pa sana ako. Nakanuod akong magsigarilyo, asin naadik tulos ako diyan. Tapos, nag-marijuana man ako. Kan mag-11 anyos ako, pinurbaran kong mag-inom nin arak. Napaitan ako, pero gusto ko an pagmati pag nabuburat ako. Nagin hilig ko man an musika asin baraylihan. Pirmi akong nasa mga parti saka nightclub. Pasekreto akong minahali sa harong pag banggi tapos sinisigurado kong makabalik bago magliwanag. Palibhasa parati akong daing turog, pirmi akong dai minalaog sa klase dawa ngani an aram sa harong nagklase ako. Kun maglaog man ako, inaaprobetsaran ko an mga halipot na break para mag-inom.

Hababaon an mga grado ko kan huring taon ko sa eskuwelahan. Huling dai hinuna kan sakong ina na arog na ako kaidto kapasaway, disganado siya asin angguton na marhay. Nag-iwal kami, kaya luminayas ako sa harong. Nakiistar nguna ako sa kailusyon kong si Tony, na sarong Rastafarian. Kabali siya sa paggibo nin saradit na krimen asin nagpapabakal nin mga droga saka midbid na bayolenteng tawo. Dai nahaloy nagbados ako, asin sa hoben na edad na 16 nagkaigwa kami nin aking lalaki.

Namidbid ko an mga Saksi ni Jehova kan nagdadagos ako sa sarong pasilidad para sa mga daragang ina asin mga aki ninda. Tinawan ako nin kuwarto duman kan lokal na awtoridad. Regular na binibisita nin duwang babaying Saksi an pira sa mga hoben na ina duman. Sarong aldaw, nagbali ako sa pag-urulay ninda. Gusto kong patunayan na sala an mga Saksi. Pero gamit an Bibliya, saro-saro nindang sinimbag sa kalmado asin malinaw na paagi an dakul na mga hapot ko. Nagustuhan ko sinda dahil mabuuton sinda saka magalang. Kaya nakipag-adal man ako nin Bibliya sainda.

Paghaloy-haloy may nanudan ako sa Bibliya na nakapabago sa buhay ko. Puon kan aki pa ako, takot na akong magadan. Pero ngunyan, naaraman ko an katukduan ni Jesus manungod sa pagkabuhay liwat! (Juan 5:28, 29) Nanudan ko man na personal na nagmamalasakit sa sako an Diyos. (1 Pedro 5:7) An urog na nakapahiro sa buot ko iyo an yaon sa Jeremias 29:11, na nagsasabi: “‘Aram kong gayo an mga kaisipan na nasasabuot ko dapit sa saindo,’ an sabi ni Jehova, ‘mga kaisipan nin katuninungan, asin bakong nin kapahamakan, tanganing tawan kamo nin puturo asin paglaom.’” (NW) Dahil diyan, naniniwala na ako na puwede akong magkaigwa nin paglaom na mabuhay nin daing katapusan sa Paraiso digdi sa daga.—Salmo 37:29.

Pinahilingan ako nin tunay na pagkamuot kan mga Saksi ni Jehova. Kan primero kong pag-atender sa saindang pagtiripon, namati ko an mainit saka marahay na pag-iribanan—makiamigo sinda gabos! (Juan 13:34, 35) Ibang-iba idto sa pagtrato sako sa dati kong pigsisimbahan. Inako ako kan mga Saksi sa ibong kan sitwasyon ko. Nagmalasakit sinda sako asin tinawan ako nin panahon, atensiyon, saka praktikal na tabang na kaipuhan ko. Pagmati ko parte ako nin sarong dakula asin mapagpadangat na pamilya.

Sa pag-adal ko nin Bibliya, nasabutan ko na kaipuhan kong gumibo nin mga pagbabago sa sakong buhay para maabot ko an halangkaw na mga pamantayan nin Diyos sa moral. Dai nagin madali sako na punduhon an pagsigarilyo. Narisa ko man na may nagkapirang kanta na nakakadagka sako na mag-marijuana, kaya rinibayan ko an mga musikang pigdadangog ko. Para malikayan ko nang magburat, dai na ako nagduduman sa mga parti asin nightclub. Nagpili man ako nin mga bagong barkada na magigin marahay na impluwensiya sa bago kong pamumuhay.—Talinhaga 13:20.

Kun dapit ki Tony, nakipag-adal man siya nin Bibliya sa mga Saksi ni Jehova. Mantang nasisimbag kan mga Saksi an mga hapot niya gamit an Bibliya, nakumbinsir man siya na an saiyang mga nanunudan iyo an katotoohan. Naggibo siya nin dakulang mga pagbabago sa buhay niya: binayaan niya an saiyang bayolenteng mga kairiba, nagpundo sa paggibo nin saradit na krimen, asin dai na nag-marijuana. Tanganing lubos na mapaugma si Jehova, nahiling mi man na kaipuhan ming baguhon an imoral ming pamumuhay asin tawan an samong aki nin sarong tunay na pamilya. Nagpakasal kami kan 1982.

Naghahanap ako kaidto nin mga artikulo sa magasin na An Torrengbantayan asin Gumising! * dapit sa istorya kan mga tawong nakayang gibuhon an mga pagbabago na gusto ko man gibuhon. Napakusog akong marhay kan mga halimbawa ninda! Napahiro ako kaiyan na padagos na magmaigot asin dai sumuko. Pirmi kong ipinapamibi ki Jehova na nungka niya akong bayaan. Kan Hulyo nin 1982, nabawtismuhan kami ni Tony bilang mga Saksi ni Jehova.

An marahay na relasyon sa Diyos na Jehova an nagligtas kan buhay ko. Namati mi man ni Tony an pagsuportar ni Jehova sa masakit na mga panahon. Nanudan ming magsarig sa Diyos pag may mga problema, asin pirmi ming namamati an pagtabang asin pag-ataman niya sa pamilya mi.—Salmo 55:22.

Maugma ako ta natabangan mi an aki ming lalaki asin babayi na mabisto man si Jehova. Ngunyan namamati ko pa an arog kaiyan na kaugmahan mantang nahihiling ko an saindang mga aki na padagos man na nag-uuswag sa kaaraman manungod sa Diyos.

Mayo nang banggi na dai ako nakakaturog dahil sa pagparaisip manungod sa mangyayari sa maabot na panahon o sa kagadanan. Ngunyan, surusemana kami ni Tony sa pagdalaw sa manlain-lain na kongregasyon kan mga Saksi ni Jehova tanganing pakusugon sinda. Iniibanan mi sinda para itukdo sa iba na kun mapahiling sinda nin pagtubod ki Jesus, puwede man sindang magkamit nin buhay na daing katapusan.