Nahiling nin sarong aking babayi an mga aso na nagluluwas sa tsimenea kan pabrika asin narisa niya na nagigin garo dakulang panganuron ini. Naisip niya na sa pabrika palan ginigibo an mga panganuron. Makangingisi an simpleng salang pakasabot na iyan nin sarong aki. Pero, an bakong simpleng salang pakasabot puwedeng magkaigwa nin dakulang epekto sa satong buhay. Halimbawa, puwedeng ikapahamak nin saro pag sala an pakaintindi niya sa nakasurat sa sarong laganan nin bulong.

An mga salang pakasabot mapadapit sa espirituwal na mga bagay puwedeng magin mas kapaha-pahamak pa ngani. Halimbawa, may mga tawo kaidto na sala an nagin pakasabot sa mga katukduan ni Jesus. (Juan 6:48-68) Imbes na maghinguwang makanuod pa, hinabuan ninda an gabos na itinukdo ni Jesus. Sayang!

Nagbabasa ka daw nin Bibliya para makakua nin mga giya? Marahay iyan. Pero, posible daw na magkaigwa ka nin salang pakasabot sa binabasa mo? Nangyayari iyan sa dakul na tawo. Ini an tulo sa mga parating salang pakasabot ninda.

• May mga tawo na sala an pakasabot sa pagbuot kan Bibliya na ‘matakot sa Diyos.’ Hinuhuna ninda na an sinasabing takot digdi iyo an nakakapanggirabong pagkatakot sa Diyos. (Parahulit 12:13) Pero habo nin Diyos na arog kaiyan an mamatian kan mga nagsasamba sa saiya. Siya nagsabi: ‘Dai ka matakot, ta yaon ako saimo; dai ka magluya, ta ako an saimong Diyos na nagpapakusog sa saimo. Danay takang tatabangan.’ (Isaias 41:10) Simple man sana an kahulugan kan ‘matakot sa Diyos’—an magkaigwa nin paghanga asin hararom na paggalang sa saiya.

• May mga tawo na sala an pakaintindi sa ipinasabong na mga tataramon na ini: ‘Sa gabos na bagay igwa nin kapanahunan, panahon nin pagkamundag, asin panahon nin pagkagadan.’ Iniisip ninda na may itinalaan nang panahon an Diyos kun nuarin magagadan an lambang tawo. (Parahulit 3:1, 2) Pero, an pinag-uulayan man sana sa mga bersikulong iyan iyo idtong normal na nangyayari sa sato gabos—namumundag kita tapos nagagadan. Itinutukdo man kan Tataramon nin Diyos na an satong mga desisyon puwedeng makapalawig kan buhay ta. Halimbawa, mababasa ta: ‘An pagkatakot ki Jehova minapadakul kan mga aldaw.’ (Talinhaga 10:27; Salmo 90:10; Isaias 55:3) Paano? Huli sa paggalang sa Tataramon nin Diyos, lilikayan ta an mga gibong nakakaraot sa sato, arog kan pagburat asin imoralidad.—1 Corinto 6:9, 10.

• May mga tawo na literal an pakaintindi sa sinasabi kan Bibliya na an mga langit asin daga “nakatagama sa kalayo.” Iniisip ninda na lalaglagon nin Diyos an planetang ini. (2 Pedro 3:7) Pero, nanunuga an Diyos na dai niya nuarin man itutugot na malaglag an literal na daga. ‘An daga masarig na pinatindog nin Diyos sa pundasyon kaiyan tanganing dai nanggad iyan matanyog.’ (Salmo 104:5, BPV *; Isaias 45:18) An permanenteng mawawara bako an literal na daga kundi an maraot na sistemang ini nin mga bagay kan kinaban, na garo baga lalaglagon iyan sa kalayo. Kun mapadapit sa kalangitan, pag ginamit iyan sa literal, puwede iyan na mangahulugan sa nahihiling na langit, sa mabituon na uniberso, o sa istaran nin Diyos. Gabos iyan dai lalaglagon nin Diyos.

Arog kan nahiling mo sa mga halimbawang iyan, parating nasasala an mga tawo sa pakasabot ninda sa nababasa ninda sa Bibliya. Pero taano ta tinutugutan nin Diyos na mangyari iyan? Tibaad sabihon kan iba: ‘Kun an Diyos madunong asin nakakaaram kan gabos, dapat kuta an librong itinao niya sa sato iyo idtong malinaw an pakasurat asin madaling masasabutan kan gabos. Taano ta bakong arog kaiyan?’ Hilinga an tulong dahilan kun taano ta sa parati sala an pakasabot sa Bibliya.

1. Dinisenyo an Bibliya para masabutan kan mga tawong mapakumbaba asin andam na makanuod. Sinabi ni Jesus sa saiyang Ama: “Hayag takang inuumaw, Ama, Kagurangnan nin langit asin daga,  huli ta maingat mong itinago an mga bagay na ini sa mga madunong saka may inadalan asin ihinayag mo iyan sa mga aki.” (Lucas 10:21) Isinurat an Bibliya sa paagi na an mga tawo sanang may tamang kaisipan an makakasabot kan mensahe kaiyan. An mga tawo na mapalangkaw—sarong ugali na sa parati mahihiling sa “mga madunong saka may inadalan”—may tendensiya na masala an pakasabot sa Bibliya. Pero an mga tawong nagbabasa nin Bibliya na may ugali na arog sa “mga aki”—mapakumbaba asin gustong makanuod—nagkakaigwa nin tamang pakasabot sa mensahe nin Diyos. Kahanga-hanga talaga an pagkadisenyo nin Diyos sa Bibliya!

2. An Bibliya isinurat para sa mga tawo na gusto talagang magpatabang sa Diyos para masabutan iyan. Sinabi ni Jesus na kaipuhan nin tabang kan mga tawo para lubos nindang masabutan an mga itinukdo niya. Paano sinda maako kan tabang na iyan? Ipinaliwanag ni Jesus: “An paratabang, an banal na espiritu, na ipapadara kan Ama paagi sa ngaran ko, itutukdo kaiyan sa saindo an gabos na bagay.” (Juan 14:26) Kun siring, itinatao nin Diyos an saiyang banal na espiritu—an saiyang makapangyarihan na aktibong puwersa—tanganing tabangan an mga tawo na masabutan an mga nababasa ninda sa Bibliya. Pero, dai itinatao nin Diyos an saiyang espiritu sa mga tawong habong magpatabang sa saiya, kaya sa parati dai talaga ninda nasasabutan an Bibliya. Pinapahiro man kan banal na espiritu an mga mas may kaaraman na Kristiyano para tabangan an mga gustong magkaigwa nin urog na kaaraman.—Gibo 8:26-35.

3. May mga teksto sa Bibliya na masasabutan sana kan mga tawo pag uminabot na an tamang panahon. Halimbawa, sinabihan si propeta Daniel na magsurat nin mensahe na para sa maabot na panahon. Sinabi kan anghel saiya: “Daniel, ihilom mo an mga tataramon asin serahan mo nin tatak an libro, sagkod sa panahon kan katapusan.” Sa pag-agi nin mga siglo, dakul na tawo an nakakabasa kan libro sa Bibliya na Daniel pero dai talaga ninda iyan nasasabutan. An totoo, maski si Daniel mismo, dai niya nasabutan an pira sa mga isinurat niya. Mapakumbaba niyang inako: “Ako nakadangog, alagad dai ako nakasabot.” Maabot an panahon, masasabutan nin tama kan mga tawo an hula nin Diyos na isinurat ni Daniel, pero mangyayari sana iyan pag uminabot na an tamang panahon na pinili nin Diyos. Ipinaliwanag kan anghel: “Lakaw, Daniel, huli ta an mga tataramon ginibong hilom asin sinerahan nin tatak sagkod sa panahon kan katapusan.” Asin siisay an makakasabot kan mga mensahe nin Diyos? “Mayo sa mga maraot an makakasabot; pero idtong mga may pakasabot makakasabot.” (Daniel 12:4, 8-10, NW) Kaya, may mga teksto sa Bibliya na dai nguna ihinahayag nin Diyos an kahulugan sagkod na dai pa nag-aabot an tamang panahon.

Nasala na daw an mga Saksi ni Jehova sa pakasabot ninda sa Bibliya? Iyo, huli ta bako pa idto an tamang panahon. Pero, kan mag-abot an pinili nin Diyos na panahon para linawon an mga bagay-bagay, dai nag-alangan an mga Saksi na liwaton an saindang pakasabot. Naniniwala sinda na sa paggibo ninda kaiyan inaarog ninda an mga apostol ni Cristo, na mapakumbabang liniwat an saindang kaisipan kan itanos sinda ni Jesus.—Gibo 1:6, 7.

An naisip kan aking babayi dapit sa pinaghahalian kan mga panganuron masasabing saro sanang simpleng salang pakasabot. Pero an itinutukdo kan Bibliya igwa nin dakulang epekto sa buhay mo. Mahalagang marhay an mensahe kan Bibliya kaya dai ta dapat purbaran na sabuton iyan sa sadiri sana niyatong pakaintindi. Magpatabang para masabutan an binabasa mo. Hanapon an mga tawong mapakumbabang nag-aadal nin Bibliya, mga tawong nagtitiwala sa banal na espiritu nin Diyos para masabutan an Bibliya, mga tawong kumbinsido na yaon na kita sa tamang panahon na diyan gusto nin Diyos na magin malinaw nanggad an pakasabot ta sa Bibliya. Dai mag-alangan na makipag-ulay sa mga Saksi ni Jehova o na basahon an mga maingat nindang na-research na yaon sa website na jw.org. Nanunuga an Bibliya: ‘Kun maghagad ka nin pakaaram, maaaraman mo an kahulugan kan pakamidbid sa Diyos.’—Talinhaga 2:3-5, BPV.