Nagdakula ako sa Puerto Limón, sarong siyudad na may duungan na nasa sirangan na baybayon kan Costa Rica. Ikapito ako sa walong magturugang. Nagadan an sakong ama kan otso anyos ako, kaya solo kaming pinadakula kan samong ina.

Parte na kan buhay ko an baseball. Aki pa ako, mahilig na akong magkawat kaiyan. Kan tin-edyer ako, nagbali ako sa sarong amateur league team. Sa edad na 20, mantang nasa amateur league, inalok ako nin sarong scout na magbali sa sarong propesyonal team sa Nicaragua. Pero kan panahon na idto, may hilang si Mama saka ako an nag-aataman sa saiya; habo kong bayaan siya asin mag-istar sa Nicaragua. Kaya, nagsayuma ako. Dai nahaloy, saro pang scout an nag-alok sako na magkawat sa national baseball team kan Costa Rica, na an mga miyembro kaiyan pinili hali sa iba-ibang amateur league team. Inako ko na an alok. Nagkawat ako para sa national team puon 1949 sagkod 1952, asin kabali kami sa sunod-sunod na kawat na nangyari sa Cuba, Mexico, saka Nicaragua. Matibay akong baseman, kaya dawa sa 17 sunod-sunod na game mayo lamang akong error. Ugmahon ako pag ikinukurahaw kan mga tawo an pangaran ko!

Nagin imoral man an pamumuhay ko. Maski may kailusyon na ako, nakikipagrelasyon pa ako sa ibang babayi. Makusog man akong mag-inom. Sarong beses ngani, huli sa grabeng kaburatan, pagmata ko dai ko marumduman kun paano ako nakapuli sa harong! Nahilig man ako sa sugal asin pagtaya sa lotto.

Sa panahon na iyan, nagin Saksi ni Jehova an sakong ina. Inistorya niya sa sako an dapit sa saiyang pagtubod, pero kan inot dai ako nagkainteres ta sibot akong marhay sa baseball. Pag nasa training ako, dawa oras nang magkakan, dai lamang ako nakakamati nin gutom! Nakapokus sana ako sa kawat. Mayo nang mas mahalaga sako kisa sa baseball!

Dangan kan 29 anyos ako, nagkaigwa ako nin seryosong injury sa sarong kawat mantang sinasalo ko an bola. Kan magrahay ako, nagpundo na akong magkawat sa team. Pero, aktibo pa man giraray ako sa baseball. Nagtutukdo ako sa mga parakawat sa sarong amateur league team na harani sa lugar mi.

Kan 1957, pinaonrahan ko an imbitasyon na mag-atender sa sarong kumbensiyon kan mga Saksi ni Jehova na ginibo sa istadyum kun sain kami dating nagkakawat nin baseball. Mantang nakatukaw ako, narisa ko na an magalang na paggawi kan mga Saksi ibang-iba sa mariribok na tawong naghihiling pag may kawat kami. Huli kaiyan, napahiro ako na makipag-adal nin Bibliya sa mga Saksi saka mag-atender sa mga pagtiripon ninda.

Napahanga ako sa dakul na katukduan sa Bibliya na nanudan ko. Halimbawa, ihinula ni Jesus na sa huring mga aldaw ihuhulit kan saiyang mga disipulo an maugmang bareta kan Kahadian nin Diyos sa bilog na kinaban. (Mateo 24:14) Naaraman ko man na an tunay na mga Kristiyano boluntaryong ginigibo an saindang ministeryo. Sinabi ni Jesus: “Inako nindong daing bayad, itao nindong daing bayad.”—Mateo 10:8.

Mantang nakikipag-adal ako nin Bibliya, inobserbaran ko man kun ginigibo talaga kan mga Saksi ni Jehova an sinasabi kan Bibliya. Hanga ako sa padagos nindang paghihinguwa na ipahayag an maugmang bareta kan Kahadian nin Diyos sa bilog na kinaban. Nahiling ko na sinusunod ninda an sadol ni Jesus sa mga Kristiyano na magin matinao. Kaya kan mabasa ko an imbitasyon ni Jesus sa Marcos 10:21 na “Madya, magin parasunod taka,” gusto ko nang magin Saksi.

Pero, nasakitan akong gumibo nin mga pagbabago. Halimbawa, dakul na taon ko nang pigtatayaan sa lotto surusemana an “masuwerteng” numero ko. Kaso, nanudan ko sa Bibliya na kinokondenar nin Diyos an mga nagsasarig sa ‘diyos kan Suwerte,’ saka an mga mahanab o paslo. (Isaias 65:11, An Marahay na Bareta Biblia; Colosas 3:5) Kaya, nagdesisyon akong magpundo na sa pagsugal. Kan inot na Domingo pagkatapos kong magpundo sa pagtaya sa lotto, nanggana an “masuwerteng” numero ko! Kinantiyawan ako kan mga tawo ta dai ako nagtaya kan semanang iyan saka pinipirit ninda akong magtaya giraray, pero dai ako nagpadara. Dai na nanggad ako nagbalik sa pagsugal.

Kan mismong aldaw na nabawtismuhan ako sa sarong kumbensiyon kan mga Saksi ni Jehova, napaatubang ako saro pang pagbalo sa sakong “bagong personalidad.” (Efeso 4:24) Pagbalik ko sa hotel na dinadagusan ko kan bangging idto, naghahalat sa luwas kan kuwarto an dati kong kailusyon. “Sammy, tara date kita!” an sabi niya. Pero, tulos akong nagsabi: “Dai!” Sinabi ko sa saiya na namumuhay na ako uyon sa mga pamantayan kan Bibliya. (1 Corinto 6:18) “Talaga?” biglang sabi niya. Baliwala sa saiya an sinasabi kan Bibliya dapit sa seksuwal na imoralidad, saka gusto niyang makipagbalikan. Pero, an ginibo ko, naglaog ako sa kuwarto saka binaratan an pinto. Ngunyan, maugmahon ako ta puon kan mabawtismuhan ako kan 1958, padagos akong namuhay sigun sa mga pamantayan sa Bibliya.

Sa hiling ko makakabilog ako nin sarong libro kun isusurat ko an mga pakinabang na nakamtan ko huli sa pagsunod sa paggiya kan Bibliya! Ngunyan, igwa ako nin tunay na mga amigo, may katuyuhan an buhay ko, saka igwa ako nin tunay na kaugmahan.

Gusto ko pa man giraray magkawat nin baseball, pero bako na iyan an pinakaimportante sa sako. Sa baseball, nagin sikat ako asin nagkaigwa nin dakul na kuwarta, pero temporaryo sana an mga iyan. Sa kabaliktaran, an relasyon ko sa Diyos asin an kasararuan nin magturugang na kinabibilangan ko magdadanay sagkod lamang. Sinasabi kan Bibliya: “An kinaban mapapara pati na an kamawutan kaiyan, alagad an saro na naggigibo kan kabutan nin Diyos magdadanay sagkod lamang.” (1 Juan 2:17) Ngunyan, mayo nang mas mahalaga sako kisa sa Diyos na Jehova saka sa saiyang banwaan!