Garo baga misteryoso asin nakakatakot an apat na parakabayo, pero bako ini an dapat na mamatian mo. Taano? Huling tinatabangan kita kan Bibliya asin kan mga pangyayari sa presenteng panahon na maaraman nin malinaw kun ano an kahulugan kan kada saro kaiyan. Baga man an pangangabayo ninda tanda nin maraot na mga pangyayari sa daga, puwedeng mangahulugan man iyan nin maugmang bareta para sa saimo asin sa pamilya mo. Paano? Aramon ta nguna kun siisay an apat na parakabayong ini.

Nagpuon an bisyon sa arog kaini: “Uya! nahiling ko an sarong puting kabayo, asin an nakasakay diyan igwa nin pana; asin sarong korona an itinao sa saiya, asin luminuwas siya tanganing mandaog saka tanganing lubuson an saiyang pandadaog.”—Kapahayagan 6:2.

Siisay an nakasakay sa puting kabayo? Maaaraman an simbag sa iyo man sanang libro kan Bibliya, an Kapahayagan, na kan huri inapod an nakasakay na ini na hali sa langit bilang “An Tataramon nin Diyos.” (Kapahayagan 19:11-13) An titulong “An Tataramon” nanunungod ki Jesu-Cristo, huling siya an tagapagtaram nin Diyos. (Juan 1:1, 14) Inapod man siyang “Hadi nin mga hadi asin Kagurangnan nin mga kagurangnan” saka “Maimbod asin Totoo.” (Kapahayagan 19:16) Malinaw nanggad, may awtoridad siyang humiro bilang parapakilaban na hadi, asin dai niya ginagamit an saiyang kapangyarihan sa maraot o maringis na paagi. Pero, may mga hapot na dapat masimbag.

Siisay an nagtao ki Jesus nin awtoridad na mandaog? (Kapahayagan 6:2) Nahiling ni propeta Daniel an sarong bisyon kun sain an Mesiyas, na iinagid sa ‘sarong aki nin tawo,’ tinawan nin ‘kapangyarihan, kamurawayan, asin kahadian’ kan ‘Suanoy kan mga Aldaw’—daing iba kundi an Diyos na Jehova. * (Daniel 7:13, 14) Kaya, an Diyos na Makakamhan sa Gabos an nagtao ki Jesus nin kapangyarihan asin deretsong mamahala saka maghukom. An puting kabayo angay sanang simbolo para sa makatanusan na pakikilaban kan Aki nin Diyos, huling parating ginagamit sa Kasuratan an kulor na puti bilang simbolo nin katanusan.—Kapahayagan 3:4; 7:9, 13, 14.

Kasuarin sinda nagpuon na mangabayo? Mangnuhon na an inot na parakabayo, si Jesus, nagpuon na mangabayo kan koronahan siya bilang Hadi sa langit. (Kapahayagan 6:2) Kasuarin iyan nangyari? Bako iyan kan panahon na nagbalik siya giraray sa langit pagkagadan niya. Ipinapahiling kan Bibliya na nagkaigwa nguna nin panahon nin paghalat bago siya koronahan. (Hebreo 10:12, 13) Sinabi ni Jesus sa saiyang mga parasunod an magigin tanda kan katapusan kan panahon nin paghalat asin kan kapinunan kan pamamahala niya sa langit. Sinabi niya na sa kapinunan kan saiyang pamamahala, magigin mas maraot an kamugtakan kan kinaban. Magkakaigwa nin giyera, grabeng gutom, asin epidemya. (Mateo 24:3, 7; Lucas 21:10, 11) Dai nahaloy pagpuon kan Giyera Mundiyal I kan 1914, nagin risang-risa na an katawuhan yaon na sa panahon na iyan, an maribok na panahon sa daga na inaapod kan Bibliya na “huring mga aldaw.”—2 Timoteo 3:1-5.

Kan magin Hadi si Jesus kan 1914, taano ta nagin mas maraot pa an kamugtakan kan kinaban imbes na magrahay? Huling kan panahon na iyan nagpuon nang mamahala si Jesus sa langit, bako sa daga. Nagkaigwa nin ralaban sa langit asin an bagong patukawon na Hadi, si Jesus, na inapod na Miguel, ihinulog sa daga si Satanas saka an mga demonyo kaini. (Kapahayagan 12:7-9, 12) Huli kaiyan, grabe an kaanggutan ni Satanas ta aram niyang halipot na sana an saiyang panahon. Iyo, madali nang humiro an Diyos para gibuhon an kabutan niya na halion si Satanas digdi sa daga. (Mateo 6:10) Aramon ta ngunyan kun paano an tulong iba pang parakabayo nagpapatunay na talagang nabubuhay na kita sa “huring mga aldaw.” Bakong arog kan inot na parakabayo na nanunungod sa sarong partikular na indibidwal, an tulong suminunod na parakabayo  nagrerepresentar sa mga pangyayari na nakakaapektar sa mga tawo sa bilog na kinaban.

“Saro pang kabayo an luminuwas, asin pula an kulor kaini, asin an nakasakay diyan tinawan nin awtoridad na halion an katuninungan sa daga na sa siring maggaradanan sinda, asin sarong dakulang espada an itinao sa saiya.”—Kapahayagan 6:4.

An parakabayong ini nagrerepresentar sa giyera. Mangnuhon na hinali kaini an katuninungan bako lang sa nagkapirang nasyon kundi sa bilog na kinaban. Kan 1914, sa kainot-inuting pangyayari sa kasaysayan, puminutok an giyera na nakaapektar sa bilog na kinaban. Sinundan iyan kan mas mapanglaglag na ikaduwang giyera mundiyal. Kinakarkulo na puon kan 1914, mga labing 100 na milyon an nagkagaradan huli sa mga giyera asin mga engkuwentro! Apuwera diyan, nairidong marhay an dakul na iba pang indibidwal.

Gurano na kagrabe an mga giyera sa presenteng panahon? Sa kainot-inuting pangyayari sa kasaysayan, garo baga kaya na kan mga tawo na paraon an katawuhan. Dawa ngani an inaapod na mga organisasyon na nagpapadanay nin katuninungan, arog kan United Nations, dai kayang papunduhon an nakasakay sa pulang kabayo.

“Uya! nahiling ko an sarong itom na kabayo, asin an nakasakay diyan igwa nin timbangan sa saiyang kamot. Nadangog ko an garo sarong boses sa tahaw kan apat na buhay na linalang na nagsabi: ‘Sarong takad nin trigo sa kantidad na sarong denario asin tulong takad nin sebada sa kantidad na sarong denario; asin dai mo pagsayangon an lanang oliba saka an arak.’”—Kapahayagan 6:5, 6.

An parakabayong ini nagrerepresentar sa tiggutom. Ilinaladawan digdi an grabeng kakulangan nin suplay nin kakanon na an sarong takad nin trigo nagkakantidad nin sarong denario, an sarong aldaw na tangdan kaidtong inot na siglo! (Mateo 20:2) Sa kantidad man na iyan makakabakal nin tulong takad na sebada, na mas hababang klase kisa sa trigo. Sa sarong dakulang pamilya, sagkod sa pirang aldaw sana daw iyan? Kaya, pinatanidan an mga tawo na magtipid maski idtong simpleng kakanon sa aroaldaw, arog kan lanang oliba asin arak na komun na kakanon kaidto kan mga Israelita.

Puon kan 1914, nahihiling ta na daw an ebidensiya na nagpuon nang mangabayo an nakasakay sa itom na kabayo? Iyo! Kan ika-20 siglo, mga 70 milyon an nagadan sa gutom. Sa sarong report, kinakarkulo na “805 milyon na tawo—mga saro sa kada siyam na tawo sa kinaban—an kulang nin kinakakan kan taon 2012-14.” Sinabi sa saro pang report: “Kun pagsararuon an mga nagagadan sa AIDS, malaria, asin tuberkulosis, mas dakul pa diyan an nagagadan sa gutom taon-taon.” Sa ibong kan mga paghihinguwa na pakakanon an mga nagugutom, dakul pa man giraray an nagugutom huli sa padagos an pangangabayo kan nakasakay sa itom na kabayo.

“Uya! nahiling ko an sarong malungsing kabayo, asin an nakasakay diyan igwa nin pangaran na Kagadanan. Asin an Lulubngan nagsusunod sa likudan niya. Asin tinawan sinda nin awtoridad sa ikaapat na kabtang kan daga, tanganing gumadan paagi sa halabang espada asin paagi sa grabeng gutom asin paagi sa nakakagadan na epidemya saka paagi sa mababangis na hayop sa daga.”—Kapahayagan 6:8.

An ikaapat na parakabayo nagrerepresentar sa kagadanan huli sa epidemya asin iba pang dahilan. Dai nahaloy pakalihis kan 1914, manampulong milyon an nagadan sa trangkaso Española. Posibleng mga 500 na milyon an nagkahilang, mga saro sa kada tulong tawo kaidto!

Pero, may suminunod pa sa trangkaso Española. Kinakarkulo kan mga eksperto na ginatos na milyon an nagadan sa smallpox kan ika-20 siglo. Sagkod ngunyan, minilyon an nagagadan sa AIDS, tuberkulosis, asin malaria sa ibong kan grabeng paghihinguwa kan mga medical researcher.

Saro sana an resulta—kagadanan. Baga man iyan huli sa giyera, tiggutom, o epidemya. Daing pundo an Lulubngan sa pangungulekta nin mga biktima, na mayong itinataong paglaom sa sainda.

Madali nang mawara an mga nangyayaring problema ngunyan. Tandaan ini: Si Jesus “luminuwas . . . tanganing mandaog” kan 1914, kan ihinulog niya si Satanas sa daga, pero dai pa lubos an saiyang pandadaog. (Kapahayagan 6:2; 12:9, 12) Dai na mahahaloy, sa Armagedon, tatapuson ni Jesus an impluwensiya ni Satanas saka lalaglagon niya an mga tawong nagsusuportar sa Diyablo. (Kapahayagan 20:1-3) Dai lang papapunduhon ni Jesus an pangangabayo kan iba pang tulong parakabayo kundi hahalion pa ngani niya an mga epekto kan mapanglaglag na pangangabayo ninda. Paano? Pag-isipan an mga panuga kan Bibliya.

Imbes na giyera, magkakaigwa nin katuninungan. ‘Pinapauntok [ni Jehova] an mga giyera sa bilog na kinaban. Binabari niya an mga pana [asin] pinuputol an mga garod.’ (Salmo 46:9, An Marahay na Bareta Biblia) Kun para sa mga tawong mamumuton sa katuninungan, sinda ‘magkakararanga nin labi-labi sa katuninungan.’—Salmo 37:11.

Imbes na tiggutom, magkakaigwa nin abundang kakanon. “Magkakaigwa nin abundang tipasi sa ibabaw kan daga; magsusupay sa alituktok kan kabukidan.”—Salmo 72:16, NW.

Imbes na epidemya asin kagadanan, perpektong salud saka buhay na daing sagkod an itatao para sa gabos. “Papahidon [nin Diyos] an gabos na luha sa saindang mga mata, asin an kagadanan mawawara na. Dai na man magkakaigwa nin pagmundo, o nin pagtangis, o nin kulog.”—Kapahayagan 21:4.

Kan si Jesus yaon digdi sa daga, nagtao siya nin magayunon na patanaw kan magigin kamugtakan pag namahala na siya. Pinalakop niya an katuninungan, milagrosong nagpakakan nin rinibong tawo, nagpaumay nin mga may hilang, asin nagbuhay pa ngani nin mga gadan.—Mateo 12:15; 14:19-21; 26:52; Juan 11:43, 44.

Mauugma an mga Saksi ni Jehova na tabangan kang maaraman, gamit an saimong Bibliya, kun paano ka magigin handa pag natapos na an pangangabayo kan apat na parakabayo. Gusto mo daw na makanuod nin urog pa??