Sigun sa Bibliya, nabuhay si Hading David kan Israel kan ika-11 siglo B.C.E. asin an mga gikan niya namahala sa laog nin ginatos na taon. Pero may mga kritiko na nagsasabing si David uruistorya sana na inimbento kan mga tawo pagkalihis pa nin haloy na panahon. Tunay na persona daw si Hading David?

 Kan 1993, an arkeologong si Avraham Biran asin an saiyang team nakadiskubre nin sarong tipak nin gapo sa Tel Dan, sa norteng parte kan Israel, na may nakaukit na mga tataramon na “Harong ni David.” Nasa sarong suanoy na Semitikong sistema iyan nin pagsurat asin ginibo kan ikasiyam na siglo B.C.E. Minalataw na parte iyan nin sarong monumento na ginibo kan mga Arameano para ipaghambog an mga kapangganahan ninda laban sa mga Israelita.

 Sinabi sa sarong artikulo sa Bible History Daily: “May mga nagdududa sa inskripsiyon na ‘Harong ni David’ . . . Minsan siring, kadaklan na iskolar sa Bibliya asin arkeologo inako tulos na an inukit na gapo sa Tel Dan nagtao kan inot na masarig na patunay na may Hading David talaga arog kan sinasabi kan Bibliya, kaya nagin saro iyan sa panginot na mga nadiskubre sa arkeolohiya manungod sa Bibliya na isinurat kan BAR [Biblical Archaeology Review].”