Kan Oktubre 9, 2024, an World Wildlife Fund nagpaluwas nin nakakaalarmang report manungod sa nagigin epekto sa mga hayop kan aktibidad nin tawo. Sinabi diyan na “sa nakaaging 50 taon (1970-2020), an average na bilang kan pigsusubaybayan na mga hayop buminaba nin 73%.” Nagpatanid an report: “Bakong pagpasobra kun sasabihon na an mangyayari sa sunod na limang taon iyo an magdedeterminar kan puturo kan buhay digdi sa daga.”

 Normal sana na ikabigla kan dakul na tawo an arog kaiyan na mga report. Pinapahalagahan tang marhay an satong magayunon na planeta, asin habuon tang mahiling na nadadanyaran an mga hayop na nakaistar diyan. Arog kaiyan an namamatian ta dahil katuyuhan nin Diyos para sa sato na atamanon ta an mga hayop.—Genesis 1:27, 28; Talinhaga 12:10.

 Kaya tibaad maihapot mo, ‘Mapoprotektaran ta daw an mga hayop? Ano an sinasabi kan Bibliya?’

 Sa ibong kan satong mga paghihinguwa sa abot kan satong makakaya, an puturo kan mga hayop digdi sa satong planeta nakadepende bako sa sato, kundi sa Diyos. Ihinula kan Bibliya sa Kapahayagan 11:18 na an Diyos “[lalaglagon] idtong mga nagraraot kan daga.” May duwang bagay na itinutukdo sa sato an bersikulong iyan:

1.  1. Dai tutugutan nin Diyos na biyong maraot kan mga tawo an daga.

2.  2. An Diyos madali nang humiro. Paano ta iyan naaraman? Huling urog kisa kasuarin pa man, mas dakula an peligro ngunyan na mapuho kan mga tawo an mga hayop digdi sa daga.

 Ano an gigibuhon nin Diyos para maresolberan an problemang ini? Gagamiton niya an saiyang gobyerno, o Kahadian, sa langit tanganing mamahala sa enterong daga. (Mateo 6:10) An gobyernong iyan tatawan an makinuyog na mga tawo kan pagtutukdo asin pagsasanay na kaipuhan ninda tanganing maataman asin maprotektaran an mga hayop digdi sa daga.—Isaias 11:9.