Kinakarkulo na limang bilyon na tawo an mahiling kan FIFA World Cup na isinasagibo puon Nobyembre 20 sagkod Disyembre 18, 2022. Para sa dakul, an arog kaiyan na sports event may potensiyal na maipamati sa mga tawo na nagkakasararo sinda bako lang bilang mga parahiling.

•   “An sport igwang kapangyarihan na baguhon an kinaban. May kapangyarihan iyan na makainspirar. May kapangyarihan iyan na pagkasararuon an mga tawo sa kakaibang paagi.”—Nelson Mandela, dating presidente kan Timog Aprika.

•   “An football . . . napagkakasararo an mga tawo sa paglaom, sa kaugmahan, sa hilig, sa pagkamuot, pati man sa pakamating may sarong bagay na diyan parareho sinda.”—Gianni Infantino, presidente kan FIFA. a

 Maisasagibo daw kan World Cup o kan ano man na sports event an arog kaiyan kadakulang mga obheto? May paglaom daw na makamtan an katuninungan asin pagkasararo?

 An World Cup ngunyan na taon nagin bako lang basta manungod sa football. An mga kawat diyan pinagpunan nin mga debate manungod sa mga isyu sa sosyedad asin sa pulitika may koneksiyon sa mga deretso nin tawo, diskriminasyon huli sa lahi, asin dai pagkapantay-pantay sa ekonomiya.

 Dawa arog kaiyan, para sa dakul sarong nakakaugmang libangan an internasyonal na mga sports event arog kan World Cup. Alagad, gurano man iyan kagusto kan mga tawo, an mga sports event na iyan dai makakatao nin nagdadanay na pagkasararo. Imbes, sa parati nagigin risang-risa diyan an mga ugali asin paggawi na nagpapahiling nin pagkabaranga na sinambit kan Bibliya na magigin tanda kan peryodo nin panahon na inaapod na “huring mga aldaw.”—2 Timoteo 3:1-5.

 May mababasa sa Bibliya na sarong tunay na paglaom na magkakasararo an bilog na kinaban. Nanunuga iyan na an gabos na tawo sa daga magkakasararo sa irarom kan sarong gobyerno sa langit na inaapod na “Kahadian nin Diyos.”—Lucas 4:43; Mateo 6:10.

 An Hadi kan Kahadian na iyan, si Jesu-Cristo, sisiguraduhon na magkakaigwa nin katuninungan sa bilog na kinaban. Sinasabi kan Bibliya:

•   “An matanos magigin marambong, asin an katuninungan magigin abunda.”—Salmo 72:7.

•   “Ililigtas niya an dukha na naghahagad nin tabang . . . Sa pang-aapi asin sa kadahasan ililigtas niya sinda.”—Salmo 72:12, 14.

 Dawa ngunyan, napagkasararo na kan mga tukdo ni Jesus an minilyon na tawo sa 239 kadagaan. Nanudan nindang halion an pagkaungis. Para makanuod pa, basahon an serye nin mga artikulo na may titulong “Pagpundo sa Dai Matapos-tapos na Pagkaungis.”