Sa Hulyo asin Agosto 2020, sa kainot-inuting pagkakataon, sarabay na hihilingon kan pambilog na kinaban na kasararuan nin magturugang an pararehong programa kan pangrehiyon na kumbensiyon. Para magibo ini, an mga rekording kan programa kaipuhan na itradusir sa labing 500 na lengguwahe. Sa parati, aabuton nin sarong taon o labi pa para maplano asin matapos an siring na proyekto. Pero, huli sa mga kamugtakan na resulta kan pandemya na coronavirus, an mga paratradusir kan ‘Pirming Mag-ugma’! na 2020 Pangrehiyon na Kumbensiyon igwa sana nin haros apat na bulan para matapos an proyekto.

 An Translation Services asin Global Purchasing sa World Headquarters kan Mga Saksi ni Jehova nagtinabangan sa dakulaon na proyektong ini. Naisip kan Translation Services na kakaipuhanon kan dakul na translation team an mas dakul na kagamitan, lalo na idtong maray na klaseng mga mikropono, para magibo an trabaho. Kaya, naggibo nin areglo an Global Purchasing na magbakal nin 1,000 mikropono asin ipinadara iyan sa haros 200 na lokasyon.

 Para makatipid, an mga mikropono binakal nin bultuhan, ipinadara sa sarong lokasyon dangan idineliver sa mga paratradusir sa bilog na kinaban. Paagi sa pagbakal nin bultuhan, an kada mikropono nagkakantidad nin ₱8,500.00, kaiba na an bayad sa pagpadara—nakatipid kita nin labing 20 porsiyento kisa kun babakalon iyan nin kada pidaso.

 Kinaipuhan kan Global Purchasing na isagibo an mga areglong ini nin pagbakal asin pagpadara kan Abril asin Mayo 2020—kan panahon na dakul sa mga negosyo limitado an pagpunsiyonar huli sa pandemya. Minsan siring, bago matapos an Mayo, naresibi na kan kadaklan na remote translation office, sangang opisina, asin iba pang lokasyon nin pagtradusir an kinakaipuhan na kagamitan.

 “Nagkaigwa nin marahay na pakikipagtabangan an mga departamento kan Bethel saka an manlain-lain na kompanya na imbuwelto sa proyektong ini,” an sabi ni Jay Swinney, na nangangataman sa Global Purchasing. “Huli sana iyan sa espiritu ni Jehova kaya nagibo mi ini nin marikas asin nagamit sa pinakamarahay an mga donasyon para suportaran an teokratikong mga pangangaipo.”

 Si Nicholas Ahladis, na naglilingkod sa Translation Services, nagsabi: “Napakusog na marhay an mga paratradusir na naka-lockdown kan maresibi ninda an kagamitan na ini. Dawa napasuhay sinda sa iba pang miyembro kan saindang translation team, nakakatradusir pa man giraray sinda asin nakakarekord nin mga pahayag, drama, asin kanta sa labing 500 na lengguwahe.”

 An proyektong ini saro sana sa dakul na natapos para magibo an ‘Pirming Mag-ugma’! na 2020 Pangrehiyon na Kumbensiyon para sa pambilog na kinaban na kasararuan nin magturugang. Nagin posible an pagbakal kan kinakaipuhan na mga kagamitan huli sa mga donasyon na bukas-palad nindong itinatao paagi sa donate.pr418.com asin iba pang pamamaagi.