Kada taon, may nagkapirang nasa espesyal na bilog na panahon na paglilingkod sa manlain-lain na parte kan kinaban na iniimbitaran na magklase sa Watchtower Bible School of Gilead, na ginigibo sa Watchtower Educational Center sa Patterson, New York. a Sa paadalan na ini, nakakanuod an mga estudyante kun paano magigin mas epektibo sa manlain-lain nindang asignasyon sa organisasyon ni Jehova. Nakakatabang sa sainda an pagsasanay na ini para pakusugon an mga kongregasyon asin mga sangang opisina sa bilog na kinaban.

 An mga nagkaklase sa Gilead hali sa manlain-lain na parte kan kinaban. Halimbawa, sa ika-147 klase na ginibo kan 2019, igwa nin 56 na estudyante hali sa 29 nasyon. An mga nagkaklase sa Gilead nasa espesyal na bilog na panahon na paglilingkod—mga Bethelite, paraataman nin sirkito, misyonero, o mga special pioneer.

 Pinupunan an mga pag-andam para sa paadalan haloy pa bago magpuon an klase. Halimbawa, nagbabakal nin mga ticket an World Headquarters Travel Department (WHQ Travel) para sa mga inimbitaran na magklase. Para sa ika-147 klase nin Gilead, $1,075 (U.S.) an average na ginastos para sa lambang dayuhan na estudyante pasiring sa Patterson asin pabalik sainda. Apat na flight an kinaipuhan kan mga estudyante haling Solomon Islands para makaabot sa Patterson, tapos tulo pabalik sainda—labing 35,400 na kilometro an total na biniyahe ninda! An ginastos sa mga flight na iyan $2,300 (U.S.) kada estudyante. Para makatipid, naggagamit an WHQ Travel nin sarong computer program na pang-book para makahanap nin mga ticket na tama sana an presyo. Asin dawa nakapareserba na nin ticket, padagos na nagsi-search an computer program sa laog nin mga semana o mga bulan pa ngani para bantayan kun nagbaba an presyo. Naggagamit man an WHQ Travel nin mga idinonar na airline credit saka mileage para makakua nin mga ticket.

 Dakul sa mga estudyante an kaipuhan nin visa para makalaog sa Estados Unidos. Para diyan, tinatabangan sinda kan World Headquarters Legal Department na makakua nin student visa. An gastos para sa visa saka sa pagparehistro may average na $510 (U.S.) kada estudyante.

 Paano kita nakikinabang sa pagsasanay na itinatao sa mga estudyante? Sarong elder sa Timog-Sirangan na Asia si Hendra Gunawan. Nasa sarong kongregasyon siya na may mag-agom na naggradwar sa Gilead. Sinabi niya: “Kaidto, mayong regular payunir sa kongregasyon mi. Pero kan yaon na an mga naggradwar, nakaulakit an kaigutan saka pagigin andam nindang maglingkod, kaya nagpayunir na man an iba. Pag-abot nin panahon, may sarong sister pa ngani samo na nagklase sa School for Kingdom Evangelizers!”

 Si Sergio Panjaitan nagtatrabaho sa sarong Bethel sa Timog-Sirangan na Asia kaiba nin mga naggradwar sa Gilead. Sinabi niya: “An pagsasanay na itinao sainda bako lang bendisyon sainda, kundi pati man samo. Kadakul nindang nanudan! Pero imbes na magpasikat, ihinihiras ninda an mga nanudan ninda. Nakapakusog iyan samo, tapos napakusog mi man an iba.”

 Sain hali an kuwartang ginagastos para sa paadalan na ini? Sa mga donasyon para sa pambilog na kinaban na gibuhon, na an dakul diyan itinao paagi sa saro sa mga pamamaagi na mahihiling sa donate.pr418.com. Salamat sa saindong bukas-palad na mga donasyon, na iyo an nagsusuportar sa pambilog na kinaban na paadalan na ini.