“An Namamahalang Grupo nagdesisyon na dagkahon an gabos na kongregasyon na ibalik na an mga pagtiripon sa Kingdom Hall puon sa semana nin Abril 1, apuwera na sana kun may mga restriksiyon pa an lokal na gobyerno.” Ikinaugmang marhay kan mga Saksi ni Jehova sa bilog na kinaban an paising iyan na ilinuwas sa jw.org kan Marso 2022. Pero, dai pa tapos an COVID-19 na pandemya. a Ano an kinaipuhan na gibuhon na mga pagbabago, kinaipuhan na mga suplay, saka kagamitan para maproteksiyunan sa virus an mga maatender? Pakalihis nin mga duwang taon na dai ta ginamit sa mga pagtiripon an satong mga Kingdom Hall, puwede na daw giraray iyan na gamiton?

 An totoo, dakul na bulan nang inaandam kan satong mga tugang na ibalik an mga pagtiripon sa mga Kingdom Hall.

 Sarong bulan sana pagkatapos na papunduhon an in-person na mga pagtiripon kan 2020, an Worldwide Design/Construction Department (WDC), sa Warwick, New York, nagpuon na pag-adalan kun paano makakaapektar an COVID-19 sa paggamit ta kan satong mga Kingdom Hall asin kun anong mga paagi an kaipuhan para magin ligtas na lugar an satong mga ginagamit na lugar sa mga pagtiripon.

 Sa parati, an mga pangangaipo kan sarong partikular na nasyon iba man sa ibang mga nasyon. Si Matthew De Sanctis, na naglilingkod sa WDC, nagsabi: “Sa ibang mga nasyon, an problema ninda mayo sinda nin mga hanawan. Pag mayo nin tubig an mga Kingdom Hall, kaipuhan pa nindang magbakal o magsakdo sa salog o bubon. Sa ibang mga nasyon man, binago kan mga gobyerno an kahagadan manungod sa pagbugtak nin mga air-con, bentilasyon, saka mga karatula manungod sa salud asin kalinigan.”

 Ano an ginibo kan satong mga tugang para masolusyunan an mga problemang iyan? Nahiling ninda na sa dakul na Kingdom Hall, “epektibong marhay an simple saka bakong magastos na mga paagi,” an sabi ni Matthew. Halimbawa sa Papua New Guinea, nagbugtak sinda nin mga hanawan gamit an 20 litros na mga galon na may gripo. Kaya, nakapagbugtak sinda nin hanawan sa sarong Kingdom Hall sa probinsiya sa kantidad sana na $40 (U.S.). Sa mga Kingdom Hall sa Aprika, labing 6,000 na de-kalidad na mga hanawan an binakal sa sarong supplier sa Asia.

 Kaiba sa iba pang ginibong mga pagbabago an paglaag o pagpakarhay kan mga bentilador asin mga bentilasyon tanganing presko an duros sa Kingdom Hall. Dakul na kongregasyon an nagbakal nin microphone boom tanganing dai na kaipuhan na kaputan kan mga nag-aatender an mikropono mantang nagkokomento sinda. Naggibo man nin mga paghihinguwa para malimitaran asin regular na malinigan an mga parating nakakaputan, arog nin mga doorknob saka gripo, na paagi diyan puwedeng maipasa an virus. Sa mga comfort room, naglaag an nagkapirang kongregasyon nin mga gripo na may sensor, para awtomatiko na iyan na mabukas. Sa Chile, an pag-implementar kan kinakaipuhan na mga pagbabago uminabot nin mga $1,400 (U.S.) an nagastos para sa kada Kingdom Hall.

 Mantang priyoridad kan mga tugang na gibuhon na ligtas na lugar an mga Kingdom Hall, hinihinguwa man ninda na makatipid sa paggamit kan pondo na hali sa mga donasyon. Halimbawa sa nagkapirang nasyon, inaaprobetsaran ninda an tax exemption para sa pagbakal nin mga materyales na gagamiton sa mga hanawan saka nin mga microphone boom. Nagtitinarabangan an mga sangang opisina tanganing matipid an pondo paagi sa pagbakal nin mas dakul na suplay. Sa parati, an mga sangay asin an Global Purchasing Department nagbabakal nin mga suplay direkta mismo sa mga kompanya na naggigibo kaiyan, kaya mas barato an presyo saka madali tulos na naidi-deliver.

 An mga areglong ginigibo para magin mas ligtas na lugar an mga Kingdom Hall nagprotektar asin nagtao nin katiwasayan sa mga nag-aatender na sa in-person na mga pagtiripon. An sister na si Dulcine na taga Peru, nagsabi na “medyo natatakot” siya kan maaraman niya na maatender na giraray sa Kingdom Hall. “Nagka-COVID-19 tulos ako kan magpuon an pandemya,” an sabi niya. “Kaya dai ako mapamugtak na mabalik na giraray sa Kingdom Hall ta aram ko na puwede akong maulakitan na naman kan virus. Pero pag-abot ko sa Kingdom Hall, narisa ko na may mga ginibo an mga elder na mga areglo para magin mas ligtas kami, arog kan paglaag nin mga hand-sanitizing station saka paggamit nin mga microphone boom, pati man an areglo para mag-disinfect kan Kingdom Hall bago saka pagkatapos kan kada pagtiripon. Dahil sa gabos na areglong iyan namati ko na mas ligtas ako.” b

 An sister na si Sara na taga Zambia, iba man na kadipisilan an inagihan. Sinabi niya: “Pirang bulan pa sana an nakaagi, nagadan si agom dahil sa COVID-19. Nahadit ako sa magigin reaksiyon ko na sa inot na pag-atender ko sa in-person na mga pagtiripon dai ko na kaibanan si agom.” Pero ano na an sabuot niya ngunyan sa pag-atender? Sinabi niya: “Napatunayan ko na talagang kaibanan ta si Jehova sa huring mga aldaw na ini dahil sa in-person na mga pagtiripon. Ngunyan mas namati kong marhay an pagpakusog, pagkamuot, saka suporta sako kan mga elder saka kan sakong mga tugang.”

 Nagpapasalamat nanggad an satong namumutan na kapwa mga parasamba sa bilog na kinaban sa oportunidad na makaatender giraray sa mga Kingdom Hall. Salamat sa saindong mga donasyon, na an dakul kaiyan idinonar paagi sa donate.pr418.com. An mga donasyon na ini nakatabang sa sato na masiguradong komportable asin ligtas an satong ginagamit na mga lugar para sa dalisay na pagsamba.