Kada bulan, inaabang-abangan ta an espirituwal na mga programa asin video na pigre-release sa JW Broadcasting. Pero dakul na tugang ta sa Africa an dai ma-access an mga programang ini sa Internet. Taano?

 Kadaklan na lugar sa Africa limitado an access sa Internet. Asin kun may access man, sa parati maluya o kaya mahalon iyan. Halimbawa, sarong paraataman nin sirkito sa Madagascar an nag-download kaidto nin sarong bulanan na programa nin JW Broadcasting sa sarong Internet café. Nagbayad siya nin Php 777—labi pa sa ginaganar nin nagkapirang indibidwal sa laog nin sarong semana!

 Sa ibong kan mga kadipisilan na ini, minilyon na tawo sa Aprika an puwede nang maghiling nin JW Broadcasting dawa mayong Internet. Paano?

 Puon kan 2017, an JW Broadcasting available na sa mga nakaistar sa sub-Saharan Africa paagi sa sarong satellite-television channel. An paghiling sa channel na ini mayong bayad; pigbobrodkast ini 24 oras kada aldaw, 7 aldaw kada semana, sa 16 na lengguwahe.

 Para magibo ini, an Mga Saksi ni Jehova nakipagkontrata sa sarong television broadcast service para mag-transmit nin mga programa paagi sa satellite. Naaabot kan satellite an mga 35 nasyon sa sub-Saharan Africa. An kontrata nagkakahalaga nin labing Php 580,000 kada bulan. Sa pana-panahon, nagtatao nin dagdag na bayad para sa pagbrodkast nin mga live event sa sarong suway na channel. Paagi kaiyan, rinibo an makakahiling nin mga kumbensiyon o nin espesyal na mga programa na konektado sa mga dalaw sa sangay.

 Dakul na tawo, kaiba na an bakong mga Saksi, an naghihiling kan JW satellite channel sa saindang telebisyon sa harong. Dawa arog kaiyan, an nagkapira sa mga tugang ta dai kayang magbakal kan equipment na kaipuhan para madalan an satellite channel. Para matabangan sinda, labing 3,670 Kingdom Hall an linagan nin satellite receiver para makadalan diyan nin JW Broadcasting an mga tugang. An equipment, kaiba na an delivery, nagkakahalaga nin mga Php 3,400 kun an Kingdom Hall igwa na nin telebisyon o projector. Kun mayo pa, puwedeng abuton nin mga Php 25,730 an kinakaipuhan na mga equipment.

 Pinapahalagahan na marhay kan mga tugang ta an channel na iyan. Sinabi nin sarong elder sa Cameroon: “Garo iyan manna sa katahawan nin disyerto para sa pamilya mi.” Si Odebode, sarong brother sa Nigeria, nagsabi: “Hinihiling ming bilog na pamilya an channel tulong beses kada semana. Pirming inaabang-abangan kan mga aki ko an mga pagkakataon na ’yan. May mga pagkakataon pa ngani na nakikiulay sinda na maglipat kami sa JW channel.” Si Rose, na taga Nigeria man, nagsabi: “Maugma akong sabihon na kun kaidto mga bareta an pirmi kong dinadalan, ngunyan JW channel na an pirmi kong dinadalan. Pag nagdadalan ako nin bareta, madalion akong mauyam kaya naglalangkaw an presyon kan dugo ko. Pero an JW Broadcasting talagang nakakapakusog saka dai nakaka-stress! Iyan an paborito kong channel. Dakulang bendisyon ’yan hali ki Jehova.”

 Sa Mozambique, sarong paraataman nin sirkito an nagsabi na sa sirkito niya, may pig-set up na equipment sa mga Kingdom Hall para ma-access an satellite channel. An mga tugang sa mga kongregasyon na ini minaabot nin sarong oras o labi pa bago an pagtiripon para maghiling kan JW Broadcasting paagi sa satellite.

 Kan 2019 na internasyonal na kumbensiyon sa Johannesburg, South Africa, ginamit an channel para i-transmit an panginot na mga pahayag, kaiba na an pahayag kan sarong miyembro kan Namamahalang Grupo, sa siyam na iba pang lokasyon. Si Sphumelele, na hali sa Broadcasting Department sa sangang opisina sa South Africa, nagsabi: “Kaidto, kakaipuhanon ming i-transmit an mga pahayag paagi sa Internet. Pero mangangaipo iyan nin marahay na koneksiyon sa Internet saka nin bayad sa data. An JW satellite channel mas abot-kaya saka maaasahan.”

 Sa tabang kan saindong bukas-palad na mga donasyon sa pambilog na kinaban na gibuhon, dakul sa mga tugang ta sa Africa an mahihiling na an JW Broadcasting paagi sa satellite. Pinapasalamatan ming marhay an saindong mga donasyon na itinao nindo paagi sa manlain-lain na pamamaagi na mahihiling sa donate.pr418.com.