An musika sarong magayon na regalo hali ki Jehova. Kaya kaiyan na mabago an satong kaisipan saka an satong namamatian, asin kaya kaiyan na mapahiro kita. Iyan nanggad an nagigibo kan satong orihinal na mga kanta. An totoo, bako lang iyan an nagigibo kan mga kantang iyan: nakakaparani iyan sa sato ki Jehova.

 Puon kan 2014, labi nang 70 orihinal na mga kanta an naprodusir, asin ngunyan, dai mababa sa sarong kanta sa mga iyan an available na sa labing 500 na lengguwahe! Pero ’baad maisip mo, ‘Siisay an naggigibo kan mga kantang ini, asin paano iyan pigpoprodusir?’

 Ginigibo an orihinal na mga kanta kan music team sa Audio/Video Services, na nasa irarom kan paggiya kan Teaching Committee kan Namamahalang Grupo. An music team kompuwesto nin 13 brother saka sister na nagtatabang sa pag-compose, music engineering, pag-iskedyul, asin iba pang trabaho sa production. Apuwera sa sainda, nag-aprubar an Teaching Committee nin mga remote volunteer sa bilog na kinaban para tumabang sa gibuhon na ini, kaiba na an mga kompositor, mga musikero, saka mga parakanta. Mapakumbabang ginagamit kan mga tugang na ini an saindang talento na dai nagmamawot na mamidbid sinda.

 Paano ginigibo an sarong orihinal na kanta? Inot, nagdedesisyon an Teaching Committee kun anong teksto sa Bibliya an pagbabasaran kan kanta asin kun ano an dapat na mamatian kan mga makakadangog kaiyan. Dangan nag-aasignar an music team kun siisay an ma-compose kan musika asin magibo kan mga liriko. Tapos pighahanda an sarong sampol na rekording. Rerepasuhon kan Teaching Committee an sampol na rekording asin matao nin dagdag na instruksiyon. Dangan, i-aadjust kan music team an kanta asin marekord nin final version kaiyan. Irinerekord an mga kantang ini sa manlain-lain na lokasyon, kaiba na an mga pasilidad kan sangang opisina asin mga studio sa harong.

 Para maka-compose asin makarekord nin orihinal na mga kanta, an satong mga tugang naggagamit nin manlain-lain na computer program. Kaipuhan man nindang gumamit nin mga musical instrument, mixing console, amplifier, speaker, saka mga microphone. An kada sarong microphone puwedeng magkantidad nin puon sa $100 sagkod sa $1,000 (U.S.). Kan 2020, naggastos kita nin $116,000 (U.S.) para sa mga equipment na ginagamit sa pagrekord nin musika.

 Ano an mga ginigibo para makatipid sa pondo? Imbes na magkaigwa nin dakulang music team sa Bethel, dakul na remote volunteer an ginagamit. Apuwera kaiyan, imbes na magtiripon sa sarong lugar an sarong dakulang orkestra, an satong mga tugang sa parati naggagamit nin computer program na nakakabilog kan iba-ibang tanog nin mga instrumento.

 Gustong-gusto kan mga tugang na magdangog sa orihinal na mga kanta. Si Tara, na nakaistar sa Germany, nagsabi: “Nakakatabang sako an mga kanta na marelaks pag nahahadit ako. Garo ako kinukugos ni Jehova pag dinadangog ko an mga iyan sa sadiri kong lengguwahe.” An brother sa Kazakhstan na si Dmitry nagsabi: “Nauugma akong magdangog sa mga kanta na dai na ako naghahadit kun baga kauyon iyan kan mga prinsipyo sa Bibliya. Bako lang iyan, nakakatabang man sako an mga kantang iyan na magdanay na nakapokus sa espirituwal na mga bagay.”

 Sinabi ni Delia, na taga South Africa, kun ano an sabuot niya sa orihinal na mga kanta: “Nakakapakusog sa pagtubod an mga iyan. Pag namumundo ako o may inaagihan na problema, pirming igwa nin kanta na saktong-sakto sa sitwasyon ko. Sa parati, madangog ko pa sana an tono kan mga kanta, nababago na an namamatian ko!”

 May orihinal na mga kanta na nagin paborito kan mga tugang. Si Lerato, na taga South Africa man, nagsabi: “An kantang ‘Natatanaw Na’ saka ‘Sa Bagong Kinaban’ nakatabang sako na maimahinar na pigsasabat ko na an nagadan na namumutan kong nanay. Pag dinadangog ko an mga kantang iyan, garo nahihiling ko siyang nagdadalagan pasiring sako para kuguson ako.”

 Sarong orihinal na kanta an nakatabang na marhay sa sarong tin-edyer sa Sri Lanka. Sinabi niya: “Inanggutan ako kan science teacher ko sa atubangan kan klase dahil Saksi ni Jehova ako. Natakot ako, asin dai ko aram an sasabihon. Pagpuli ko sa harong, sinabi sako ni mama na dangugon ko an kantang ‘Ikaw ay Tatatag.’ Nakatabang sako an kantang ini na marealisar na kaipuhan kong mag-research saka maghanda nin simbag. Kan sunod na aldaw, kinaulay ko an maestra ko. Nagdangog siya sako asin sinabi na mas nasasabutan na niya an mga paniniwala kan mga Saksi ni Jehova. Nagpapasalamat ako sa organisasyon ni Jehova sa pagtao sato kan arog kaiyan na nakakapakusog na mga kanta.”

 Sain hali an kuwartang ginagastos sa pagprodusir kan mga kantang ini? Sa mga donasyon para sa pambilog na kinaban na gibuhon, na an dakul diyan itinao paagi sa saro sa mga pamamaagi na mahihiling sa donate.pr418.com. Salamat sa saindong bukas-palad na mga donasyon.