Sa laog nin labing 130 taon, iribang nagtitiripon an mga Saksi ni Jehova sa taunan na mga kumbensiyon. Itinatampok sa mga programa ngunyan an labing 40 pahayag kaiba na an musika, mga interbiyu, asin mga video. Para makinabang saka mapahiro an mga nag-aatender, dapat na an programa malinaw na ‘nadadangog saka nahihiling.’ (Lucas 2:20) Paano ginagamit an saindong mga donasyon para masigurado na makikinabang an gabos sa pag-atender ninda sa mga kumbensiyon sain man sinda nakaistar?

Dakul na istadyum saka arena sa mga nasyon sa sulnupan igwa nang naka-install na mga audio/video system. Pero, taano ta sa parati nag-i-install kita kan sadiri tang equipment pag nag-aarkila kita nin sarong lugar para sa kumbensiyon? Sinabi ni David, na naglilingkod sa World Headquarters Broadcasting Department: “An nagkapira sa mga pasilidad na inaarkilahan ta dinisenyo panginot na para sa mga programa na labing anom na oras an lawig asin atentibo sanang nagdadangog an mga nag-aatender sa mga nagtataram sa stage. Halimbawa, su mga lugar para sa mga kawat, ginagamit sana an audio/video system diyan pag may halipot na paisi saka pag mapatugtog nin haralipot na musika. An mga video screen diyan ginagamit para ipahiling an iskor kan kawat, mga patalastas, saka mga replay kan kawat. Pero sa mga programa ta, gusto ta na mahiling kan mga nag-aatender an halawig na mga video asin madangog saka maintindihan na marhay an mga ipinepresentar sa stage.”

Bakong parareho an mga lugar na ginagamit sa kumbensiyon, kaya dapat na i-customize an audio/video system na ginagamit sa kada lokasyon. Pag nakapili na nin mga venue, aaramon kan Broadcasting Department sa satong mga sangang opisina kun sain na porsiyon matukaw an mga maatender base sa inaasahan na bilang kan mga maatender saka base sa kun pira katawo an kayang magkaigo sa pasilidad. Dangan, kakarkuluhon kan mga brother kun sain kaipuhan ilaag an mga speaker saka mga video screen, pag-iisipan na marhay kun paano iyan ii-install, tapos ililista an gabos na equipment na kaipuhan para masigurado na mahihiling saka madadangog kan gabos an programa.

Mas nagigin komplikadong marhay an audio/video system na kaipuhan i-install sa mga kumbensiyon na an programa madadangog sa nagkapirang lengguwahe. Kun an programa iiinterpretar sa ibang lengguwahe, dapat na nadadangog asin nahihiling kan mga nag-iinterpretar an audio saka video, dangan su iniinterpretar ninda ita-transmit sa mga radio channel kan kanya-kanyang lengguwahe kan mga nag-aatender. Huli sa espesyal na mga media player, sarabay na nahihiling kan mga nag-aatender an video dawa ngani itina-transmit an audio kaiyan sa walong iba-ibang lengguwahe. “Komplikadong marhay an system na ini,” an sabi ni David, “kaya kaipuhan talagang sanayon na marhay an mga boluntaryo sa paggamit kaiyan.”

Kadaklan sa mga sangang opisina igwa nin sadiring suplay nin audio/video equipment na ginagamit kada taon. Sa mga lugar na arog kaiyan, aayuson kan mga tugang an kada equipment para madara hali sa nainot na kumbensiyon pasiring sa sunod na kumbensiyon. An sangay sa Estados Unidos naggagastos nin labing $200,000 a kada taon sa pagbiyahe pa sana kan mga equipment na gagamiton sa mga kumbensiyon. Pero, mas tipid pa man giraray iyan kisa sa pagbakal saka pagmentenar nin dagdag pang equipment. Sinabi ni Steven, sarong paraataman sa audio/video sa sarong kumbensiyon sa Canada: “Sinisiguradong marhay kan audio/video team mi na an kada turnilyo, kordon o wire, saka iba pang parte kan equipment kumpleto, maayos, maingat na naimpake, asin handa nang gamiton sa sunod na kumbensiyon.”

Magastos na marhay an pag-arkila nin mga audio/video equipment, asin sa parati maluyang klase o dai namementenar na marhay an mga iyan. Huli kaiyan, an parating ginigibo ta nagbabakal kita nin mga equipment na kaipuhan. Sa ngunyan, an sarong LED video wall na may sukol na singko por tres metros nagkakantidad nin mga $24,000, asin an kable nin mikropono na may labang 15 metros nagkakantidad nin mga $20. Kaya, nakikipagtabangan an Broadcasting Department sa Purchasing Department para ‘makuwenta an gastos’ bago magbakal nin ano man na equipment. (Lucas 14:28) Halimbawa, inaaram ninda: Pira katawo an makikinabang sa paggamit kan equipment? Pinakamarahay daw na desisyon an pagbakal nin bagong equipment? May marahay daw na sarayan para sa mga equipment, asin igwa daw nin mga kagamitan saka sinanay na mga boluntaryo na kaipuhan para mamentenar an mga iyan?

Para haloy na magamit an mga audio/video equipment asin matipid an pondo kan organisasyon, regular kitang nagsasagibo nin pagmentenar kan mga iyan. Ilinalaag ta man an mga equipment sa matibay na mga case para maingatan na dai maraot pag ibiniyahe an mga iyan, tapos pighihirahay man an mga case na piglalagan kan mga iyan kun kaipuhan.

Napapahanga an mga bakong Saksi sa magayon na kalidad kan audio saka video sa satong mga kumbensiyon. Halimbawa, sa sarong kumbensiyon, sarong empleyado kan sarong broadcasting company na prominente sa bilog na kinaban an may positibong sinabi manungod sa kalidad kan satong programa asin produksiyon. “Napahanga siyang marhay kan maaraman niya na bako man palan mga propesyonal kundi mga boluntaryo sana kami sa samong team,” an sabi ni Jonathan, na nagtatabang sa pag-set up saka paggamit kan audio/video equipment sa mga kumbensiyon. “Sinabi niya na an ginibo ming pag-install nin saro may kabangang aldaw aabuton nin limang aldaw kun su kompanya niya an maggibo kaiyan.” Sa saro pang kumbensiyon, sinabi kan sarong manedyer kan pasilidad, “Dakul nang propesyonal sa musika saka video an nakagamit na digdi, pero dai pa lamang ako nakahiling nin mga tawo na arog kaiyan kahusay magtrabaho!”

Paano ka nakikinabang sa mga audio/video system sa satong kumbensiyon? Tibaad arog man kan ki David na taga England an namatian mo. Sinabi niya: “Ngunyan, 88 anyos na ako asin haros bilog kong buhay nag-aatender ako nin mga kumbensiyon. Kumpara kaidto, mas madali na ngunyan na magpokus sa programa. Dahil sa magagayon na video garo baga an bilog na programa marikason lang na natatapos asin mas naipapaabot nin malinaw saka dai nababago an mensahe kan programa.” Si Micheal, na nakaistar sa Nigeria, nagsabi, “Huling dai na nasasakitan an mga tugang na madangog an mga ispiker o mahiling an mga video, mas nakakapagpokus na sinda asin dai nawawara an saindang interes sa bilog na programa.”

Sa pag-atender mo sa “Ipahayag an Maugmang Bareta!” na Pangrehiyon asin Espesyal na mga Kumbensiyon sa taon na ini, pag-isipan an gabos na paghihinguwang ginigibo tanganing matabangan kang madangog asin mahiling an programa. Nagpapasalamat kaming marhay na huli sa saindong mga donasyon, kaiba na idtong idinonar paagi sa donate.pr418.com, nakatabang na magin posible an mga iyan. Salamat sa saindong pagigin bukas-palad.