Gustong-gusto kan Namamahalang Grupo na gamiton an mga donasyon para makapagtugdok nin mga pasilidad na makakatabang sa sato na maisagibo an gibuhon na paghuhulit kan Kahadian. Halimbawa, kan 2023 na taon nin paglilingkod, an legal na mga korporasyon na ginagamit kan mga sangang opisina kan Mga Saksi ni Jehova nakagastos nin labing 500 milyon na dolyar sa pagbakal, pagtugdok, pag-renovate, asin pagmentenar nin mga Kingdom Hall saka mga Assembly Hall sa bilog na kinaban. a Dagdag pa ini sa ginastos kan mga kongregasyon sa bilog na kinaban para sa pag-asikaso kan saindang mga Kingdom Hall.

 Saro pa, ginagamit man an mga donasyon sa pagtugdok asin pag-asikaso sa mga pangangaipo kan mga pasilidad kan sangay, na nakakatabang na maorganisar asin masuportaran an gibuhon na paghuhulit sa bilog na kinaban. Pinasimple an mga trabaho sa Bethel para magamit an ibang pondo sa pagtugdok asin pag-remodel nin mga Kingdom Hall asin mga Assembly Hall. Pero dakulang kantidad pa man giraray an kaipuhan para sa pag-ayos, pag-remodel, o pag-relocate kan mga pasilidad kan sangay. Taano ta mahalaga an mga proyektong ini? Paano sinusuportaran kan mga sangang opisina an mahalagang gibuhon sa langtad? Aramon ta.

 Dakul na sangang opisina an labing 30 o 40 taon nang ginagamit! Sinabi ni Nicholas, kan Worldwide Design/Construction Department: “Maski ngani namementenar na marhay an sarong building, naluluma asin nararaot pa man giraray iyan sa pag-agi nin panahon. An pag-renovate nakakatabang para padagos na magamit nin haloy an sarong edipisyo asin padagos na pakinabangan iyan.”

 Kaipuhan man na baguhon an mga pasilidad kan Bethel para makasabay sa mga pangangaipo kan organisasyon. Sa bilog na kinaban, duminakul nanggad an bilang nin mga parahayag puon kan maitugdok an dakul na mga sangang opisina. Para makatabang sa pag-uswag na iyan, kaipuhan ta nin dagdag pang mga boluntaryo na matrabaho sa mga opisina. Kaya an resulta, sadit na para sa mga nagboboluntaryo an mga pasilidad na iyan!

 Kaipuhan man tawan nin atensiyon an pagigin ligtas kan mga pasilidad. Huling nabubuhay na kita sa huring mga aldaw kan sistemang ini, nakakaeksperyensiya kita nin mas naggagrabe asin peligrosong natural na mga kalamidad. (Lucas 21:11) Paagi sa pagsunod sa bagong mga pamamaagi sa pagtugdok sa panahon nin renovation kan mga pasilidad, nagigibo tang mas ligtas iyan para sa mga nagtatrabaho diyan. Huli sa mga pagbabago man na iyan, mas madaling magagamit kan mga tugang an mga pasilidad para sa pag-organisar nin pag-ayuda asin para padagos na masuportaran an paghuhulit pag may nangyaring natural na kalamidad.

 Sa paggiya kan Namamahalang Grupo, isinagibo an mga proyekto nin pagtugdok sa 43 na pasilidad nin mga sangay durante kan 2023 na taon nin paglilingkod. Buot sabihon kaini, haros kabanga kan gabos na mga pasilidad kan Bethel sa bilog na kinaban igwa nin isinasagibong pagtugdok o pag-renovate. Mangnuhon an nagkapirang halimbawa na nagpapahiling kun taano ta mahalaga an gibuhon na ini.

 Angola. Sinabi ni Matt, na miyembro kan Branch Committee sa Angola: “Pribilehiyo ming mahiling sa espesyal na paagi an kautuban kan propesiya sa Hageo 2:7. Sa laog sana nin sampulong taon, nagkaigwa kami nin 60 porsiyentong paglangkaw nin mga parahayag! Para masuportaran sinda, kaipuhan na triplehon an mga naglilingkod sa Bethel. Pero, huling sadit sana an samong mga pasilidad dai kami makapag-imbitar nin mas dakul na boluntaryong kaipuhan mi. Kaya dakul na Bethelite an nadagdagan nin trabaho asin kaipuhan mag-overtime.”

 Nag-asignar nin mga brother para aramon kun ano an puwedeng magin solusyon sa pangangaipong ini. Kan primero, naisip ninda na mas madali saka praktikal kun ire-renovate na sana an dati nang nakatugdok na building kan sangay. Pero pagkatapos na pag-adalan na marhay an sitwasyon, narealisar ninda na dai kaiyan magagamit sa pinakamarahay na paagi an mga donasyon. Imbes, irinekomendar ninda na magbakal nin sarong kaharaning building asin i-renovate iyan. “Kan inot na ipresentar sa Branch Committee an opsiyon na magbakal asin mag-renovate nin nakatugdok nang building, nagduduwa-duwa kami kun baga magayon na solusyon iyan kumpara sa kun kita mismo an matugdok kan building,” an sabi ni Matt. “Pero ngunyan na natapos na an proyekto, nahiling mi na tamang-tama palan iyan sa mga pangangaipo mi. Binendisyunan ni Jehova an desisyon na ini.”

 Posibleng marhay na sa maabot na panahon mangangaipo pa nin dagdag na lugar an sangay sa Angola. Pero an bagong building, kaiba an modular housing sa Bethel saka an pigrerentahan na mga apartment, nakatabang sa sangang opisina na magkaigwa nin lugar na kaipuhan para padagos na masuportaran an dakulaon na pag-uswag sa mga teritoryong sakop kaiyan.

 Japan. May mga building an sangay na haros 40 taon nang nakatugdok, asin an kadaklan sa mga iyan dai pa lamang nagkaigwa nin dakulang renovation. Namementenar man na marhay an pasilidad, pero sa ibong kan mga paghihinguwa, lampas nang marhay sa bilang nin taon na dapat gamiton an mga building. Huli kaiyan, ginigibo na sa ngunyan an dakulang proyekto nin pag-renovate sa mga iyan.

 Nagkaigwa man nin mga pagbabago sa buhay sa Bethel kan mga nakaaging taon. Bago kan 2015, gabos na pagkakan kan pamilyang Bethel pigluluto para sa sainda. Kaya an disenyo kan mga kuwarto kan mga Bethelite sa Japan igwa nin porsiyon na may sadit na “kusina.” Pero ngunyan, an mga Bethelite na mismo an nagluluto kan haros gabos na kakakanon ninda. Kaya sa pag-renovate, pinadakula an kusina asin dinagdagan nin mga gamit tanganing madali para sa mga Bethelite na makaluto. Si Kumiko, sarong Bethelite na sister sa Japan branch, nagsabi, “Dahil sa bago ming kusina, pagmati ko garo lang ako yaon sa harong, saka nakatabang iyan sako na lubos na suportaran an bagong mga areglo sa Bethel.”

 An trabahong ginigibo sa Japan branch importanteng marhay sa pambilog na kinaban na gibuhon. (Mateo 28:19, 20) An Japan saro sa duwa sanang sangay na nag-iimprenta kan kumpletong Bibliya. Kaya, saro sa ginigibong proyekto ngunyan iyo an pag-install nin sarong trimming asin dust collection system para sa kaligtasan kan gabos na nagtatrabaho sa Printery. Dawa ngani an pagbakal asin pag-install kaini nagkakantidad nin haros sarong milyon na dolyar, masisigurado man kan sangay na padagos sindang makakapag-imprenta asin makakapadara nin espirituwal na kakanon.

 Sinigurado kan mga tugang na dagos-dagos an pag-imprenta nin Bibliya dawa may ginigibong renovation. Sinabi ni Trey, miyembro kan Branch Committee sa Japan: “Sa panahon kan renovation, mas dakul na traduksiyon nin Bibliya an pigre-release kan organisasyon ta, asin padakul nin padakul na tawo sa bilog na kinaban an kaipuhan nin Bibliya. Kaipuhan talaga nin pagtinarabangan kan dakul na departamento saka kan kontraktor tanganing maiskedyul an pag-install kan bagong equipment na dai nauulang an pag-imprenta kan mga publikasyon.” Sa ibong kan mga kadipisilan na iyan, haros 220,000 na Bibliya an naimprenta kada bulan puon kan Marso sagkod Agosto 2023—panahon iyan na sibot-sibot sa pag-renovate kan Printery. An gabos na trabahong ini natapos na dai naglampas sa itinagamang badyet para sa proyekto.

 An saro pang mahalagang dahilan kan renovation iyo na para makatipid nin kuryente. Ma-install nin bagong mga solar panel, para makatipid nin mga $120,000 na gastos kada taon. Ma-install man nin mga bintana na may tulong layer na salming, na makakatabang para makabawas sa konsumo nin kuryente, kaya makakatipid nin mga $10,000 kada taon. Baga man makakadagdag ini sa gastos kan proyekto, kinakarkulo na labing 3.5 milyon na dolyar an matitipid sa panahon na ginagamit an mga panel saka mga bintana. Magayon man an epekto kaiyan sa kapalibutan.

 Ipinapahiling kan mga proyektong iyan kan duwang sangay na dakulang trabaho an kaipuhan para masigurado na padagos na masuportaran kan satong mga pasilidad kan Bethel an mga pangangaipo sa mga teritoryong sakop kan kada sangay. Alagad, nagpapadagos pa an gibuhon. “Dakul na an naisagibo, pero dakulon pa an dapat gibuhon,” an sabi Aaron, kan Worldwide Design/Construction Department. Paano ini maisasagibo? Sinabi niya: “Apuwera sa bukas-palad na mga donasyon, na nakakatabang para magkaigwa nin pondo an importanteng mga proyektong ini, pinapasalamatan mi man an pagigin andam kan gabos na nagboluntaryo asin kan mga maboluntaryo pa sa maabot. An pagboluntaryo kan satong mga tugang saka an pinansiyal na suporta ninda dakulang patunay kan bendisyon ni Jehova.”—Salmo 110:3.

 An gabos na ginigibo tang proyekto nin pagtugdok asin pag-renovate sinusuportaran nin boluntad na mga donasyon, asin dakul sa mga iyan idinonar paagi sa donate.pr418.com. Salamat sa saindong padagos na pagigin bukas-palad.