An mga video sa satong pangrehiyon na mga kumbensiyon nakakapahiro sa satong puso asin nakakatabang sa sato na mas masabutan an mga katukduan sa Kasuratan. An 2020 ‘Pirming Mag-ugma’! na Pangrehiyon na Kumbensiyon igwa nin 114 video, kaiba diyan an 43 na pahayag kan mga miyembro kan Namamahalang Grupo asin kan saindang mga paratabang. Anong mga paghihinguwa daw kaya an ginibo asin gurano daw kaya an ginastos para magibo an mga videong ini?

 Haros 900 na brother asin sister sa bilog na kinaban an nagtao kan saindang panahon asin kakayahan para maprodusir an programa. Sa kabilugan, haros 100,000 na oras sa laog nin duwang taon an itinao ninda para sa proyekto. Kaiba diyan an 70,000 na oras na kinaipuhan para matapos an 76 na minutong drama sa Bibliya na Nehemias: “An Kaugmahan na Itinatao ni Jehova Iyo an Saindong Masarig na Depensa.”

 Siyempre, dakula an ginastos para maitao an panginot na mga pangangaipo kan mapagsakripisyong mga boluntaryong ini, pati man para sa technical support, mga kasangkapan, asin mga pasilidad na kaipuhan para matapos an trabaho.

 “Interesadong marhay an Teaching Committee kan Namamahalang Grupo na itampok sa satong mga video an manlain-lain na kultura asin mga lugar. Paagi kaiyan, talagang naipapahiling ta na saro kitang pambilog na kinaban na kasararuan nin magturugang,” an sabi ni Jared Gossman, na nagtatrabaho sa Audio/Video Services. “Para magibo iyan, nagtarabangan sa proyektong ini an 24 team sa 11 nasyon. Huli kaiyan, kinaipuhan mi nin dakulang kuwarta, maingat na pagpaplano, asin marahay na koordinasyon.”

 Tanganing magibo an dakul sa mga video, kinaipuhan mi nin mga kasangkapan asin set na para lang diyan. Halimbawa, an mga set para sa Nehemias: “An Kaugmahan na Itinatao ni Jehova Iyo an Saindong Masarig na Depensa” ginibo sa laog kan Mt. Ebo studio harani sa Patterson, New York, U.S.A. Tanganing makatipid nin pondo mantang kauyon pa man giraray kan kasaysayan an drama, naggibo an mga tugang nin magian na mga props na dinisenyo para magin kaarog kan mga pader kan suanoy na Jerusalem. An kada saro kaiyan kompuwesto nin anom na metrong frame na kahoy na pinatos nin foam asin pininturahan para magin kaarog nin gapo. Naililipat-lipat an mga pader na ini na puwedeng gamiton sa manlain-lain na eksena, kaya nabawasan an total na bilang nin kinakaipuhan na set. Dawa arog kaiyan, kinaipuhan nin haros $100,000 (U.S.) para magibo an mga set para sa drama pa sana. a

 Ngunyan na aram ta na an mga detalyeng ini, urog tang papahalagahan an programa kan pangrehiyon na kumbensiyon para sa taon na ini. Nagtitiwala kami na an mga pagpapagal para magibo an programang ini maresulta sa kaumawan ki Jehova sa bilog na kinaban. Salamat sa saindong bukas-palad na mga donasyon sa pambilog na kinaban na gibuhon paagi sa donate.pr418.com asin sa iba pang mga paagi.