Kan 2021 taon nin paglilingkod, a padagos na nagsasakit an kinaban dahil sa COVID-19 na pandemya. Arog kan ipinaliwanag sa artikulo na “Pagtao nin Ayuda sa Panahon nin Pangglobong Pandemya,” naggastos kita nin milyon-milyon na dolyar b sa pagtao nin ayuda sa panahon nin pandemya asin nagbilog nin labing 950 na mga Disaster Relief Committee.

 Sa katunayan, mantang nagpapadagos an pandemya, naapektaran man an satong mga tugang sa bilog na kinaban kan natural na mga kalamidad saka mga kalamidad na kagigibuhan nin tawo. Tanganing makapagtao nin ayuda para sa labing 200 na arog kaiyan na kalamidad, inaprubaran kan Coordinators’ Committee kan Namamahalang Grupo an paggastos nin $8 milyon bilang dagdag sa ayuda na itinao para sa COVID-19. Hilingon kun paano ginamit an saindong mga donasyon para tabangan an mga naapektaran kan duwang dai pa sana nahahaloy na kalamidad.

 Kan Mayo 22, 2021, an Mount Nyiragongo, sarong bulkan sa Democratic Republic of the Congo, nagpuon na magtuga. Rinaot kan lava an mga harong, mga eskuwelahan, asin sarong dam. Pero bako lang lava an nagtao nin peligro. Sa laog nin pirang aldaw pagkatapos kan pagtuga, nag-uran nin abo na hali sa bulkan sa siyudad nin Goma asin nagkaigwa nin dakul na paglinog. Labing kabanga kan mga tawo sa siyudad an pinagbutan na mag-ebakwar. Ginatos na ribo an nagdurulag, asin an iba nagbalyo pasiring sa Rwanda.

 Kaiba sa mga nag-ebakwar an mga 5,000 na mga Saksi ni Jehova. Nawaran an iba nin harong huli sa pagtuga; an ibang harong man hinabunan pagkatapos nindang maghali. Nagtabangan an mga komite sa pag-ayuda sa Rwanda saka sa Democratic Republic of the Congo. Manungod sa sarong komite sa pag-ayuda, an sangang opisina sa Congo (Kinshasa) nagreport: “Sa ibong kan karibarawan sa siyudad asin bago pa ipagbuot an pag-ebakwar, nagpuon na an komite na magdistribwir nin kakanon, tubig, mga tamong, saka mga bado.” Sa sarong banwaan kun sain labing 2,000 na mga tugang niyato an nagkatiripon, an komite sa pag-ayuda nagpatindog nin mga tolda, nagdistribwir nin mga mask, asin nagpaliwanag kun paano malilikayan an COVID-19 asin kolera.

 Sa laog sana nin tulong bulan, an satong mga tugang nakapagdistribwir nin labing anom na toneladang bagas, anom na toneladang harinang mais, tulong toneladang lana, asin tulong toneladang tubig. Para makatipid, iinareglo kan sangang opisina na sa lugar nang idto magbakal nin bultuhan na mga kakanon imbes na magbakal nin mga kakanon hali sa ibang nasyon na mas mahal an presyo.

 “Pinangluyahan kaming marhay nin buot asin mamundo,” an sabi kan sarong sister na an bagong harong naraot dahil sa pagtuga. Pero nag-ako an saiyang pamilya nin materyal asin espirituwal na tabang. Sinabi niya ngunyan: “Sa tabang ni Jehova, igwa pa man giraray kami kan mga kaipuhan mi. Nahiling mi na dinadara ni Jehova an samong mga purupasan kaya nagin magian iyan sa samo.”

 Buminagsak na marhay an ekonomiya kan Venezuela sa laog nin dakul na taon. An mga tugang ta duman nagtatagal nin masakit na mga kamugtakan sa buhay, mga kakulangan nin kakanon, asin pagdakul nin krimen. Pero, dai sinda pinabayaan kan organisasyon ni Jehova.

 Kan nakaaging taon nin paglilingkod, labing $1.5 milyon an nagastos sa pagbakal saka pagpadara nin kakanon saka sabon sa mga pamilyang nangangaipo. An sangang opisina kan Venezuela nagreport: “Bako talagang madali na magdara nin 130 tonelada nin kakanon sa gabos na lugar kan nasyon kada bulan dangan idistribwir iyan sa mga tugang na nangangaipo.” Para masiguradong dai mararaot an mga kakanon, sa parati an mga ipinapadara kan mga tugang iyo an mga kakanon na puwedeng iistak nin halawig na panahon. Sinabi pa kan sangang opisina: “An kadaklan sa mga kakanon na binabakal mi bultuhan saka su dakul sa panahon na iyan tapos su barato. Dangan ibinibiyahe mi iyan sa paaging pinakamakakatipid.”

 Gustong-gusto ni Leonel, sarong miyembro kan Disaster Relief Committee sa Venezuela, an saiyang asignasyon. “Espesyal an gibuhon na pag-ayuda,” an sabi niya. “Talagang napakusog ako kan pribilehiyong ini puon kan magadan an namumutan kong agom dahil sa COVID-19. Nagdanay akong sibot, asin pagmati ko dakula an naitatabang ko sa mga tugang na nangangaipo. Nahiling ko mismo kun paano inuutob ni Jehova an saiyang panuga na dai niya papabayaan an saiyang mga lingkod.”

 An sarong brother na natawan nin ayuda naglingkod man dati sa komite sa pag-ayuda. “Ngunyan ako naman an nangangaipo nin tabang,” an sabi niya. “Bako sanang materyal na mga bagay an naresibi mi. Tinabangan man kami ni agom kan mga tugang na magin kalmado. Inasikaso ninda kami, rinanga, saka pinakusog.”

 An ibang kalamidad biglaan na sanang nangyayari. Alagad sa parati, an organisasyon ni Jehova nakakakua asin nakakapadara tulos nin mga suplay para sa pag-ayuda, dahil iyan sa saindong mga donasyon sa pambilog na kinaban na gibuhon. An nagkapirang pamamaagi sa pagdonar mahihiling sa donate.pr418.com. Pinapahalagahan mi an saindong pagigin bukas-palad.