Ihinula kan Bibliya na sa panahon ta magkakaigwa nanggad nin mga giyera, linog, epidemya, asin iba pang “makatatakot na mga tanawon.” (Lucas 21:10, 11) An propetikong mga tataramon na iyan padagos na nautob kan 2022 na taon nin paglilingkod. a Halimbawa, an giyera sa Ukraine nagpapadagos pa man giraray asin apektado kaiyan an buhay kan minilyon na tawo. Dakul na parte kan kinaban an nagpaparahay pa sa pandemyang COVID-19. Dugang pa, dakulon na tawo an naapektaran nin natural na mga kalamidad, arog kan mga linog sa Haiti asin kan mapandestrosong mga bagyo sa Sentral Amerika, Pilipinas, saka sa timog-sirangan na Aprika. Paano tinabangan kan Mga Saksi ni Jehova an mga naapektaran?

 Kan 2022 na taon nin paglilingkod, nagtao nin ayuda an satong organisasyon sa mga biktima nin mga 200 na kalamidad! Sa kabilugan, haros 12 milyon na dolyar an nagamit ta sa pag-ayuda. b Hilingon kun paano ginamit an mga donasyon para tabangan an mga biktima kan duwang kalamidad.

 Kan Agosto 14, 2021, sarong linog na may kusog na 7.2 magnitude an nagtama sa timog na parte kan Haiti. Nakakamundo, tulong Saksi an nagadan—duwang sister saka sarong brother. An mga nakaligtas nagsapar nin danyos sa pisikal asin sa emosyon huli sa linog. Sinabi kan brother na si Stephane: “Sa bilog na siyudad, dakulon na tawo an nagkagaradan kaya nagkapira an piglulubong kada semana sa laog nin labing duwang bulan.” Ini man an sinabi kan saro pang brother na si Éliézer: “Dakul na tugang an mayong madadagusan, mga bado, sapatos, saka panginot na mga pangangaipo. Sa laog nin nagkapirang bulan, dakul an pirming takot dahil sa nagpapadagos na mga aftershock.

 Naghiro tulos an satong organisasyon para tumabang. An sangang opisina kan Haiti nagtao nin labing 53 toneladang kakanon, pati na nin mga tent, mga trapal, mga kutson, saka mga solar charger para sa mga cell phone. Dugang pa, kan 2022 na taon nin paglilingkod, labing 100 na harong an naitugdok giraray o nahirahay. Labing sarong milyon na dolyar an nagamit para sa pagtao nin ayuda.

 Nagpapasalamat talagang marhay an satong mga tugang. Sinabi ni Lorette: “Biyong naraot kan linog an harong mi pati na an negosyo mi. Mayo kaming makakan. Pero tinabangan kami kan organisasyon ni Jehova paagi sa pagtao samo kan gabos na kaipuhan mi.” Sinabi ni Micheline: “Naraot kan linog an pig-iistaran mi kan duwa kong aking lalaki. Dai ko aram kun anong gigibuhon kaya namibi na lang ako para sa tabang, asin sinimbag iyan ni Jehova paagi sa saiyang organisasyon. Igwa na kami ngunyan nin masarig na harong na maiistaran. Determinado akong gibuhon an gabos na magigibo ko para ipahiling an pasasalamat ko ki Jehova.”

 Narisa kan lokal na awtoridad an ginibo tang mga pag-ayuda. An direktor kan city hall kan L’Asile nagsabi: “Saludo ako sa marikas na paghiro nindo para tumabang. Saka inuumaw ko kamo sa pagpahiling nindo nin dakulang paggalang sa mga awtoridad. Nauugma man akong mahiling na bako kamong interesado sa kuwarta. Imbes, gusto nindong tumabang sa mga tawo. Naghihiro kamo dahil sa pagkamuot.”

 Kan Enero 24, 2022, tuminama an Bagyong Ana sa Mozambique dangan nagpasulnupan pasiring sa Malawi. Dahil sa bagyo, nagkaigwa nin makusog na uran saka duros—na uminabot sa 100 kilometro por ora. Rinaot kaiyan an mga linya nin kuryente saka an mga tulay, asin nagkawsa iyan nin grabeng pagbaha.

 Naapektaran kan bagyo an labing 30,000 na Saksi sa Malawi saka Mozambique. Si Charles, na sarong brother na nagtabang sa pag-ayuda, nagsabi: “Kan mahiling ko an pagsakit kan mga tugang saka kun gurano an nawara sainda, namundo talaga akong marhay saka namati kong mayo akong maitatabang.” An mas malala pa, an kakadikit nindang suplay nin kakanon saka mga pananom nagkararaot gabos dahil sa bagyo. Dakul an nawaran nin harong. Nakakamundo, sarong brother an nagadanan nin agom saka duwang hoben na aking babayi dahil nalamos sinda kan maglubog an rescue boat ninda.

 Nakakatakot su bagyo. Kan 1:00 nin aga sa Nchalo, Malawi, nakadangog an pamilyang Sengeredo nin nakakatakot na tanog nin nagraragasang tubig. Duwang salog su nagbabaha na! Nagdesisyon si Brother Sengeredo na dapat na sindang mag-ebakwar. Madunong na desisyon idto ta, dai nahaloy, nagaba an harong ninda dahil sa baha. An mga pagsadiri ninda magsalang may naraot o inanod. Nagdesisyon an pamilya na magduman sa Kingdom Hall, na sa normal na kamugtakan 30 minutos kun lalakawon hali sa harong ninda. Pero sa pagkakataon na ini, inabot sinda nin duwang oras. Pag-abot ninda, basa-basa saka pagal-pagal sinda, pero ligtas.

 An sangang opisina kan Malawi asin kan Mozambique nagpuon tulos na magsagibo nin pag-ayuda. Ininstruksiyunan ninda an mga paraataman nin sirkito saka an mga elder na aramon kun ano an mga kaipuhan kan naapektaran na mga tugang asin na magtao nin espirituwal na tabang asin pampakusog. Nag-asignar nin nagkapirang Disaster Relief Committee (DRC) tanganing direhiran an gibuhon na pag-ayuda; pinunan tulos kan mga komiteng ini na tabangan an satong mga tugang na makakua nin kakanon asin iba pang mga pangangaipo. Labing $33,000 an ginamit sa pagtabang sa mga tawo asin labing $300,000 an ginamit sa paghirahay asin pagtugdok liwat nin mga harong.

 Ginamit kan mga DRC an pondo sa madunong na paagi, na mahalaga talaga lalo na dahil nagmahal an mga barakalon. Halimbawa, sa inot na pitong bulan kan pag-ayuda an presyo kan harinang mais—sarong panginot na kakanon sa Malawi—luminangkaw nin mga 70 porsiyento. Naglangkaw man an presyo nin gasolina saka nin mga kaagid kaiyan. Tanganing makatipid, binakal kan mga brother nin bultuhan an mga kakanon saka mga materyales sa pagtugdok. Kaya nakadiskuwento sinda asin nakalikay sa dakulang gastos sa transportasyon.

 An gibuhon na pag-ayuda nakapahiro sa puso kan mga lingkod ni Jehova. Si Felisberto, na sarong brother sa Mozambique, nagsabi: “Dai pa lamang ako nakahiling nin ibang organisasyon na nagtao nin arog kaini kadakulang tabang: mga materyales sa pagtugdok, transportasyon, mga paratugdok, kakanon, saka mamumuton na paggiya. An pag-ayudang ini sarong pambihirang halimbawa kan pagkamuot na sa-magturugang na ilinadawan ni Jesus sa Juan 13:34, 35.” Si Ester, na sarong balo sa Malawi na nagaba an harong, nagsabi: “Nawaran na ako kaidto nin paglaom dahil dikit lang an kuwarta ko para makapatugdok nin bagong harong. Kaya kan mag-abot an mga tugang asin nagtugdok nin harong para sako, pagmati ko nasa Paraiso na ako.”

 Mantang paparani kita sa ipinanugang bagong kinaban, asahan niyato na makakaeksperyensiya kita nin mas dakul pang kalamidad. (Mateo 24:7, 8) Dawa arog kaiyan, salamat sa saindong bukas-palad na mga donasyon, tiwala kita na an mga lingkod ni Jehova makakaresibi kan kinakaipuhan na ayuda. An mga paagi para makadonar ipinapaliwanag sa donate.pr418.com. Salamat sa saindong pagkabukas-palad.