Kan taon 2020, nagkaigwa nin kadakul na kalamidad saka nagpuon na maglakop an pandemyang COVID-19 sa bilog na kinaban. Paano tinabangan kan mga Saksi ni Jehova an mga naapektaran kaiyan?

 Kan 2020 taon nin paglilingkod, a inaprubaran kan Coordinators’ Committee kan Namamahalang Grupo na gamiton an 28 milyon na dolyar b sa pagtao nin ayuda sa mga biktima nin kalamidad. Nakatabang ini sa mga biktima nin labing 200 na kalamidad—kaiba diyan an pandemyang COVID-19, dakul na bagyo, pagbaha sa Africa, kakulangan nin kakanon sa Venezuela, saka tigmara sa Zimbabwe. An mga pondong idinonar nakatabang para makabakal nin kakanon, tubig, istaran, bado, saka bulong, pati nin mga suplay sa paglinig, paghirahay, saka pagtugdok liwat. Uni an pirang halimbawa kan ginibong pag-ayuda.

 COVID-19. Sa bilog na kinaban, naapektaran kan pandemya an pisikal, emosyonal, saka pinansiyal na kamugtakan kan satong mga tugang. Para matabangan sinda, nagbilog nin labing 800 na Disaster Relief Committee (mga DRC) sa bilog na kinaban. Minomonitor kan mga komiteng ini an mga pangangaipo kan satong mga tugang saka nagpapasa tulos nin mga report na makakatabang sa Coordinators’ Committee na maaraman an pinakamarahay na paagi na maitao an ayuda.

 Sa bilog na taon, dakul an natabangan kan mga DRC na magkaigwa nin kakanon, tubig, mga gamit sa paglinig, saka bulong. Sa pirang lugar, nakipagtabangan man an mga DRC sa mga elder para matabangan an mga tugang na makakua nin ayuda hali sa gobyerno.

 Nariparo kan mga bakong Saksi an mga ginibo tang pag-ayuda. Halimbawa, sinabi ni Field Simwinga, an district commissioner kan Nakonde, Zambia, sa satong mga tugang: “Nagpapasalamat talaga kami sa itinao nindong ayuda sa naapektaran na mga pamilya—napapanahon iyan saka kaipuhan na marhay.”

 Kakulangan nin Kakanon sa Angola. Dahil sa pandemyang COVID-19, naapektaran an suplay nin kakanon sa Angola kaya mas nagmahal na marhay iyan. Dahil diyan, lalong nasasakitan an dakul sa mga tugang ta na makabakal nin kakanon.

 Hinagadan nin tabang an sangang opisina kan Brazil para magpadara nin mga kit nin kakanon sa mga tugang niyato sa Angola. Para magamit sa pinakamarahay na paagi an pondo, pinag-adalan na marhay kan mga tugang kun anong mga kakanon an babakalon saka kun paano iyan ipapadara tapos binakal ninda iyan nin bultuhan. Kaya sa kada kit, may average na $22 sana an nagastos sa pagbakal saka pagpadara pero an laog kaiyan haros 20 kilong mga kakanon, arog nin bagas, beans, tapos lana. Sa ngunyan, 33,544 kit nin kakanon an naipadara—may total na 654 tonelada. Kaiba an mga kakanon sa lugar ninda, nakatabang an mga probisyon na ini para mapakakan an labing 50,000 katawo!

 Ano an masasabi kan mga tugang niyato na natawanan kan mga ayudang ini? Si Alexandre, na nakaistar sa sarong puwerang lugar sa Angola, nagsabi: “Para sako, patunay ini na padaba ako ni Jehova saka dai ako nagsosolo. Mahalaga nanggad ako sa organisasyon ni Jehova!” Sinabi nin sarong nagsosolong ina na si Mariza: “Dinangog ni Jehova an pamibi ko. Salamat talaga saiya saka sa organisasyon niya!”

 Ayuda Para sa Tigmara sa Zimbabwe. Kan 2020 taon nin paglilingkod, nagkaigwa nin grabeng tigmara sa Zimbabwe na dahil diyan minilyon na tawo an haros magadan na sa gutom. Ribo-ribong Saksi sa Zimbabwe an mayo nin igong kakanon.

 Limang DRC an binilog para magtao nin kakanon sa mga tugang niyato. Ginatos na parahayag an nagtabang sa pagpatos nin kakanon, pagkarga kan mga suplay, o nagpasubli kan saindang mga lunadan. c Kan 2020 taon nin paglilingkod, $691,561 an ginamit para pakakanon an labing 22,700 katawo!

 May mga pagkakataon na nag-abot an ayuda kan panahon na ubos na an kakanon kan mga tugang. Kaya kan mag-abot an kakanon, inumaw si Jehova kan mga tugang niyato. May mga nagkaranta pa ngani nin mga kantang pang-Kahadian.

 Sa sarong lugar, duwang balong sister an nag-atender sa sarong miting na inorganisar para pag-ulayan an itataong ayudang kakanon hali sa sarong NGO. Pero kan nagigin mas manungod na sa pulitika an miting, nagdesisyon su duwang sister na dai ninda kayang akuon an mga kondisyones para matawan sinda nin ayuda. Kan pahali na sinda sa miting, tinuya-tuya sinda saka sinabihan, “Dai nindo kami pagdumanan para maghagad nin kakanon!” Pero pakalihis lang nin duwang semana, nag-abot sa lugar na iyan an mga tugang asin tinawan nin ayudang kakanon an duwang sister—mas nainot pang marhay na nag-abot kisa sa ayuda kan NGO!

 An pagtao nin ayuda sa Zimbabwe nagresulta man sa marahay na patotoo. Halimbawa kaiyan an eksperyensiya ni Prisca, na nakaistar sa sarong sadit na baryo. Sa ibong kan mga kadipisilan dahil sa tigmara, iniskedyul ni Prisca an Miyerkules saka Biyernes na magin para sana sa pagmiministeryo, dawa kan panahon na nin pag-arado. Pigparainsulto siya kan mga kabaryo niya na sinasabi: “Gagadanon mo sa gutom an pamilya mo ta puro ka hulit.” Ini an isinisimbag sainda ni Prisca: “Dai lamang pinapabayaan ni Jehova an mga lingkod niya.” Dai nahaloy pagkatapos kaiyan, natawanan siya nin ayuda hali sa satong organisasyon. Napahanga kaini an nagkapira sa mga kataraid niya. Sinabi ninda ki Prisca: “Dai ka talaga pinabayaan nin Diyos, kaya gusto ming mas mabisto pa siya.” Sa ngunyan, pitong kataraid niya an nagdadangog na sa mga pagtiripon kan kongregasyon na ibino-broadcast sa radyo.

 Mantang mas nagrarani kita sa katapusan, padagos na magkakaigwa nin mga kalamidad. (Mateo 24:3, 7) Nagpapasalamat kaming marhay sa bukas-palad na mga donasyon nindo gamit an iba-ibang paagi nin pagdonar na yaon sa donate.pr418.com. Nagagamit iyan sa pagtao nin ayuda na napapanahon asin pinakakaipuhan.