“Bakong kaidto, dai ta lamang hunaon na an espirituwal na kakanon mareresibi ta sa digital na paagi?” Arog man daw kaiyan an naisip mo? Sinabi iyan ni Geoffrey Jackson sa saiyang nakakapakusog na pahayag sa 2020 Update kan Namamahalang Grupo #6. Sinabi pa niya: “Pero ngunyan, tibaad napapaisip kita kun paano na kita ngunyan na may pandemya na mayo an mga tools arog kan JW Library. Talagang haloy na kitang iinaandam ni Jehova para sa mga sitwasyon na arog kaini.”

 Paano kita iinaandam ni Jehova? Paano ginibo an JW Library app, asin ano an kaipuhan para ma-maintain saka mas mapagayon iyan?

 Kan Mayo 2013, sinabi kan Namamahalang Grupo sa MEPS Programming, sarong departamento sa world headquarters, na maggibo nin sarong app na igwa kan rebisadong New World Translation. “Bago kaiyan, dai pa kita nagre-release nin mobile app sa arin man na app store,” an sabi ni Paul Willies, na nagtatrabaho sa MEPS Programming. “Pero nagbilog kami nin sarong team, ipinundo nguna an nagkapirang proyekto, asin nakipagtabangan sa ibang mga departamento sa pagdisenyo saka paggibo kan app asin kan laog kaiyan. Namibi kami pirmi, asin sa tabang ni Jehova nai-release an app sa taunan na miting pakalihis sana nin limang bulan!”

 An sunod na dapat magibo iyo na magin sarong tunay na library an app na igwa nin mas dakul na publikasyon asin mas dakul na lengguwahe. Pag-abot nin Enero 2015, an kadaklan sa mga bago tang publikasyon sa Ingles yaon na sa app, asin pakalihis sana nin anom na bulan, mada-download na an mga publikasyon na iyan sa ginatos na iba pang lengguwahe.

 Puon kaidto, mas pinagayon pa kan satong mga tugang an app. Nagdagdag sinda nin mga video, pinag-iriba sa sarong tab an gabos na publikasyon saka media na ginagamit sa mga pagtiripon sa kongregasyon, asin linagan an mismong mga bersikulo kan Bibliya nin link pasiring sa mga reperensiya sa Giya sa Pag-research.

 An JW Library binubukasan sa 8 milyon na gadyet aroaldaw asin sa labing 15 milyon na gadyet kada bulan! Ano an kaipuhan para padagos na maggana nin daing problema an app sa mga gadyet na iyan? Ipinaliwanag ni Brother Willies: “An sarong mobile app dai man talaga masasabing tapos na. Padagos kaming may ginigibo para magdagdag nin bagong mga feature asin mas mapagayon saka mas magin pasil an paggamit kaiyan. Dahil pirming ina-update an mga operating system kan mga gadyet, kaipuhan ming padagos na i-adjust an app para magin compatible sa mga iyan. Kaipuhan mi man i-maintain saka i-upgrade an samong internal software mantang padagos na nagdadakul an mga publikasyon saka recording na yaon sa JW Library.” Kun bibilangon an gabos na materyal sa gabos na lengguwahe diyan, igwa sa ngunyan nin mga 200,000 na publikasyon saka labing 600,000 na audio saka video recording sa JW Library!

 Para maipadagos an pag-maintain sa app, bako lang mga kompyuter an kaipuhan. Kaipuhan man magbakal nin mga software license. An bayad kada taon sa saro sanang license nagkakatindad nin $1,500 (U.S.). Apuwera kaiyan, an MEPS Programming naggagastos nin mga $10,000 (U.S.) kada taon sa mga gadyet na hali sa iba-ibang manufacturer para masigurado na padagos na magana nin daing problema an app sa bagong mga kompyuter, tablet, asin smartphone.

 Dahil sa JW Library, dakula an nabawas sa mga ginagastos sa pag-imprenta, pag-bind, saka pagpadara nin mga literatura. Gibuhon tang halimbawa an buklet na Pagsiyasat sa Kasuratan Aroaldaw. Nag-imprenta kita nin haros 12 milyon na kopya kan Pagsiyasat sa Kasuratan Aroaldaw—2013. Pero para sa 2020 edisyon, nag-imprenta na sana kita nin mga limang milyon na buklet—dawa ngani nadagdagan kita nin mga 700,000 na parahayag sa bilog na kinaban. Ano an dahilan kaiyan? Dakul kaya sa satong mga tugang ngunyan an sa JW Library a na nagbabasa nin teksto kan aldaw.

 Natatabangan man kan JW Library an mga naggagamit kaiyan sa dakul na paagi. Para ki Geneviève, na nakaistar sa Canada, nakatabang an app na magin mas regular an pag-adal niya. “An totoo, kun kaipuhan ko pang magkua nin dakul na libro para mag-adal, sa hiling ko dai ako maadal kada aga,” an sabi niya. “Pero dahil sa app, kukuanon ko lang an tablet ko tapos yaon na diyan an gabos na kaipuhan ko. Dahil sa regular na pag-adal na ini, nagkusog an pagtubod ko asin mas naparani ako ki Jehova.”

 Dakulaon an tabang kan app na ini lalo na ngunyan na COVID-19 na pandemya. Si Charlyn, na taga Estados Unidos, nagsabi: “Dahil sa paglakop kan COVID-19 sa bilog na kinaban, labi nang sarong taon akong dai nakakahiling nin bagong mga imprentadong publikasyon ta. Pero huli sa JW Library, abunda pa man giraray an inaako tang espirituwal na kakanon, asin nagpapasalamat ako ki Jehova sa mamumuton na probisyon na ini.”

 Namatian man kan dakul an namatian ni Faye, na nakaistar sa Pilipinas. Sinabi niya: “Ginagamit ko an magayunon na app na ini para magdanay na harani ki Jehova saka mapagdanay ko an sakong espirituwal na rutina. Ini an inot kong binabasa pagmata ko pagkaaga. Ini an pigdadangog ko mantang naggigibo kan mga gibuhon sa harong. Ini an ginagamit ko sa pag-adal para sa pagtiripon. Ini man an ginagamit ko para maghanda sa pag-Bible study. Digdi ako naghihiling nin mga video pag mayo akong ginigibo. Digdi man ako nagbabasa nin mga artikulo o nin Bibliya pag nakapila ako. Talagang kapaki-pakinabang ini.”

 Dakulaon man an tabang kan app sa ministeryo. Halimbawa, mantang naghuhulit, sarong sister sa Cameroon an gustong gamiton an teksto na ginamit nin sarong sister mga pirang semana na an nakaagi. Pero dai niya matandaan kun anong teksto idto. Sinabi niya: “Maray na sana nagirumduman ko su pirang mga tataramon duman. Binuksan ko an app, nagduman sa Bibliya, tapos pig-search ko su mga tataramon na nagirumduman ko. Nahanap ko tulos su teksto. Gamit an app, nahahanap ko an dakul na teksto na kun minsan nalilingawan ko.”

 An saindong mga donasyon gamit an mga paagi na mahihiling sa donate.pr418.com nakatabang samo na magibo, ma-maintain, asin mas mapagayon an JW Library app para sa satong mga tugang sa bilog na kinaban. Salamat sa saindong pagigin bukas-palad.

1. Oktubre 2013—Pig-release an app na may rebisadong New World Translation

2. Enero 2015—Nagin available an iba pang publikasyon sa lengguwaheng Ingles, na sinundan nin ginatos na iba pang lengguwahe

3. Nobyembre 2015—Idinagdag an feature na pag-highlight

4. Mayo 2016—Idinagdag an tab na Meetings

5. May 2017—Idinagdag an feature na pag-nota

6. Disyembre 2017—Idinagdag an mga feature para sa Study Bible

7. Marso 2019—Puwede nang maka-download nin mga audio recording, maka-stream nin video, asin ma-access an mga reperensiya sa Giya sa Pag-research

8. Enero 2021—Idinagdag an mas pinagayon na mga feature para sa Mabuhay nin Maugma Sagkod Pa Man!