MANILA, Pilipinas—Huli sa grabeng destroso na dara kan Super Typhoon Yolanda, nag-organisar an Mga Saksi ni Jehova nin nagpapadagos na pangglobong pagtao nin ayuda para sa mga biktima kan bagyo sa Pilipinas.

Nagbilog an sangang opisina kan mga Saksi ni Jehova sa Manila nin limang disaster relief committee para maparikas an pagtabang sa mga biktima. Labing 190 toneladang suplay nin mga ayuda an naipadara sa parteng sentral kan Pilipinas. Nagboluntaryong tumabang sa relief work an dai mababa sa 10 nasyon. Nagtatabang an mga boluntaryo sa pagtugdok asin paghirahay kan labing 2,000 na harong o pagtao nin medikal na tabang.

Mga 225 biktima pa man giraray an nakaistar sa mga tolda na itinugdok kan mga Saksi sa sarong relocation site harani sa Calbayog City, Samar. Mga 15 sagkod 20 porsiyento kan mga ini bakong mga Saksi ni Jehova.

An bilang kan mga nagadan sa masasabing saro sa pinakamakusog na bagyong tuminama sa daga uminabot na nin 6,201 asin 1,785 pa an mga nawawara. Mga 28,000 katawo an nairido asin labing 1 milyon na harong an naraot. Kinumpirmar kan sangang opisina kan Mga Saksi ni Jehova sa Manila na 33 na Saksi na an nagadan asin 10 an nawawara pa asin pigtutubudan na gadan na.

Sa laog nin pitong aldaw puon kan Disyembre 7, 2013, si Mark Sanderson na sarong miyembro kan Namamahalang Grupo kan Mga Saksi ni Jehova, nagbisita sa limang apektadong probinsiya. Sinabi niya: “Mati-mati pa man giraray kan dakul sa Pilipinas an marauton na epekto kan Bagyong Yolanda; pero andam kaming padagos na magtao nin kinakaipuhan na suplay, boluntaryo, asin karangahan tanganing tabangan an mga biktima na makayanan an nangyari.”

Media Contacts:

International: J. R. Brown, Office of Public Information, tel. +1 718 560 5000

Philippines: Dean Jacek, tel. +63 2 411 6090