Kan Agosto 12, 2022, natapos nang i-shooting an inot na kabtang kan Episode 1 kan An Maugmang Bareta Sigun ki Jesus. Pagkatapos na maabala nin halipot na panahon, pupunan nang i-shooting an ikaduwang kabtang, asin posibleng matapos iyan sa Oktubre 2022.

Arog kan nasambit sa nakaaging report, pinunan kan mga tugang an pag-shooting kan An Maugmang Bareta Sigun ki Jesus kan Mayo 20, 2022, panginot na an pag-shooting sa mga set na nasa laog kan pasilidad. Kan panahon na iyan, napendiyente pa an pinal na mga dokumento sa mga materyales para matapos an gagamiton na edipisyo pati na an ginigibong historical set sa luwas. Nakumpleto an mga dokumentong iyan kan Hulyo 15, 2022. Ipinagkatiwala na kan Australasia Branch Construction Department an edipisyo saka an mga ginibong set sa Regional Video Team (RVT). Puwede nang gamiton an mga pasilidad na ini sa pag-shooting kan proyekto.

Labing 500 na mga tugang hali sa Australia asin New Zealand an nagboluntaryo sa pagtugdok kan labing 7,000 metros kuwadradong set na kaparehong-kapareho an itsura kan lugar kaidtong panahon ni Jesus. Kun manungod sa pagtugdok, si Brother Russell Grygorcewicz, an Construction Committee coordinator, nagsabi: “Dawa dakul kadipisilan, malinaw ming nahiling an patunay kan pagtabang ni Jehova samo para mapangganahan an mga iyan. Siguradong paagi sa tabang kan espiritu ni Jehova, natapos an pagtugdok.”

Presente si Brother Ronald Curzan, paratabang sa Teaching Committee, sa haros bilog na panahon kan pag-shooting kan inot na kabtang. Sinabi niya: “Pambihira nanggad an pagtarabangan asin maugmang iribanan kan mga boluntaryo sa pagtugdok asin kan pamilyang Bethel. Nakakaugmang mahiling na lubos nang ginagamit an mga set pagkatapos nin mga taon na pagplano asin pagtugdok. Nakakataros sa puso an dakulaon na suportang itinao kan mga tugang na nasa teritoryo kan sangay. Daing duda na an 18 episode na videong ini manungod sa buhay asin pagtutukdo ni Jesus makakapahiro nanggad sa puso kan mga tawo sa bilog na kinaban.”

Si Brother Kenneth Cook kan Namamahalang Grupo, na presente sa ultimong mga aldaw kan pag-shooting kan inot na kabtang kan Episode 1, nagsabi: “Malinaw na sinusuportaran kan satong mamumuton na Ama na si Jehova an proyektong ini. Pinapasalamatan ta si Jehova asin an pagsasakripisyo saka an maigot na pagtatrabaho kan gabos na nagtabang sa paggibo kan mga set saka sa pag-shooting kan proyekto. Ipinapamibi ta na an espesyal na seryeng ini makakatabang sa dakul na mas lalo pang sunudon si Jesus asin magin mas harani ki Jehova.”