Idinepensa kan Korte Suprema kan Israel asin kan lokal na pulisya an libertad sa relihiyon kan mga Saksi ni Jehova paagi sa pagprotektar kan saindang deretso na magkaigwa nin pagtiripon para sumamba. Sa dai pa sana nahahaloy na desisyon, inobligar kan Korte Suprema an siyudad nin Ra’anana na utubon an kontrata kaiyan sa mga Saksi ni Jehova para sa pag-arkila kan Metro West Sports Center na gagamiton sa duwang asembleya. Huli sa panggigipit kan ibang relihiyon, napiritan an siyudad na kanselaron an kontrata 36 oras na sana bago magpuon an inot na asembleya.

An mga Saksi ni Jehova nakipagkontrata sa siyudad nin Ra’anana para sa gigibuhon na asembleya sa Abril 18 asin Mayo 2, 2015. Kan Abril 15, nagduda na an mga Saksi na tibaad ipakanselar an kontrata ninda huling ipinahayag kan general manager an pagkahadit kaini sa seguridad para sa asembleya na gigibuhon sa Abril 18. Sa ibong kan paggarantiya kan lokal na hepe kan pulisya na magigin matuninong an okasyon, nagdesisyon pa man giraray an siyudad nin Ra’anana na kanselaron an kontrata kan suminunod na aldaw. Sigun sa news media, nangyari iyan huli ta an siyudad nagpadara sa panggigipit kan mga miyembro kan konseho kan relihiyon. Sinabi kan mga miyembro na hahalion ninda an suporta sa pulitika pag tinugutan kan siyudad na magsagibo nin mga asembleya an mga Saksi.

Baga man nakapag-file tulos an mga Saksi nin injunction o court order sa Lod District Court tanganing pagbutan an siyudad na utubon an kontrata, kulang na an panahon para pugulan an pagkanselar sa asembleya sa Abril 18. May nakua man nin ibang lugar an mga Saksi para duman gibuhon an asembleya, pero mas halangkaw nin anom na beses an arkila kaiyan.

Kan Abril 29, nagpaluwas nin court order an Lod District Court na pinagbubutan an siyudad na utubon an kontrata ninda, na sinasabing “binalga kan Munisipalidad nin [Ra’anana] an deretso [kan mga Saksi ni Jehova] para sa libertad na magkaigwa nin relihiyon asin ritwal, libertad na makiasosyar asin magtiripon, an deretso na igalang asin magin talingkas, asin an deretso para sa pagkapantay-pantay.” Tulos na nag-apelar an siyudad para isuspendir an court order, pero ibinasura iyan kan Korte Suprema kan Mayo 1. Saro pang apelasyon an ipinasa pero ibinasura giraray iyan, asin nangibabaw an desisyon kan Lod District Court.

Huli sa napapanahon na desisyon kan Korte Suprema, nagin mapanggana an ginibong asembleya kan mga Saksi ni Jehova kan Mayo 2. Kasabay kaini, an lokal na mga lider kan relihiyon, kaiba an panginot na rabbi kan siyudad asin an mga miyembro nin sarong panatikong organisasyon na midbid sa pagigin madahas, nag-organisar nin “iribang pagpamibi” na pinartisiparan nin 1,500 katawo bilang pagkontra sa desisyon kan korte. Nagtiripon sinda sa atubangan kan sports center mantang paarabot an 600 na mga Saksi para mag-atender sa asembleya. An “iribang pagpamibi” biglang nagin protesta. Inatake kan pira sa mga nagpoprotesta an mga Saksi, kaiba na an mga babayi asin aki. Insulto, lutab, kantiyaw, asin pambabastos an sinapo kan mga Saksi, pati mga lunadan ninda rinaot. Tulos na nakiaram an pulisya para pugulan an mga nagpoprotesta. Sa tabang kan mga pulis, mapangganang naisagibo kan mga Saksi an saindang asembleya asin ligtas sindang nakapuli kan aldaw na idto.

Nagpapasalamat nanggad an mga Saksi ni Jehova sa ginibong aksiyon kan mga awtoridad sa dai pagkonsinte sa nangyaring diskriminasyon sa relihiyon paagi sa pagtabang na maidepensa an saindang deretso na magkaigwa nin matuninong na asembleya.