NEW YORK—Pupunan kan Mga Saksi ni Jehova an saindang taunan na serye nin mga kumbensiyon sa Biyernes, Mayo 18, 2018. An tema kan serye sa taon na ini iyo an ‘Kusugi an Buot Mo’! Bago kaiyan, an mga Saksi sa manlain-lain na parte kan kinaban makikikabtang man sa pangglobong kampanya nin pag-imbitar sa publiko na umatender sa daing bayad na programang iyan. Isasagibo an mga kumbensiyon sa manlain-lain na lugar sa 180 kadagaan.

An tulong aldaw na programa kompuwesto nin 54 presentasyon na kaiba diyan an mga diskurso, audio drama, interbiyu, asin haralipot na video. Apuwera kaiyan, may ipapahiling na pelikula na may titulong An Istorya ni Jonas—Sarong Leksiyon Dapit sa Kusog nin Buot Asin Pagkahirak sa huring aldaw kan kumbensiyon. Kada aldaw, pupunan an pang-aga asin panghapon na sesyon paagi sa mga music video na espesipikong inandam para sa kumbensiyon.

Si David A. Semonian, sarong tagapagtaram kan Mga Saksi ni Jehova, nagsabi: “Pag naghihiling ka nin mga bareta ngunyan, malinaw mong mahihiling na kumpara kaidto urog nanggad na napapaatubang an mga tawo, ano man an edad ninda, sa mas dakul na kahaditan asin takot. Kaipuhan nin kusog nin buot tanganing maatubang an mga ini. Maugma ming inaako an gabos sa kumbensiyon sa taon na ini tanganing makinabang sa praktikal na mga sadol na nasa Bibliya.”

An petsa asin lugar kan lambang kumbensiyon mahihiling sa opisyal na website kan mga Saksi, an jw.org/bcl.

Media Contact:

David A. Semonian, Office of Public Information, +1-845-524-3000