Napagmata nin alas 5:00 nin aga si Brother Femi Durodola saka an saiyang agom na si Yana kan apudan sinda sa telepono nin sarong elder. “An sabi niya samo: ‘Dai kamo maghadit, magpreparar sana kamo. Padigdi na sa Kyiv an mga suldados kan Russia!’” an istorya ni Yana. “Kan oras na idto, ninerbiyos akong marhay.”

An bago pa sanang mag-agom nagsangli nin bado, nagtimpla nin huring masiram na kape na iinumon ninda sa saindang harong, saka binasa an teksto sa aldaw na idto. An sabi diyan: “An saindong kusog yaon sa pagdanay na kalmado asin pagpahiling nin tiwala.” (Isaias 30:15) Udok sa pusong namibi si Femi ki Jehova. Kinua ni Femi, na taga Nigeria, asin ni Yana, na tubong Ukraine, an saindang mga go bag saka binayaan an gabos tanganing magpasiring sa Netherlands para magin ligtas.

Arog kaiyan an nangyari sa kadaklan sa mga tugang niyato na nagdesisyon na maghali sa Ukraine kan punan kan Russia an pag-atake kan Pebrero 24, 2022. Igwa nin mga 130,000 na Saksi ni Jehova sa Ukraine. Sagkod ngunyan, labing 36,000 na Saksi an nagdesisyon na maghali sa saindang harong asin labing 16,000 sa sainda an nagdurulag pasiring sa ibang mga nasyon. Binayaan kan dakul an saindang harong, trabaho, asin kongregasyon. Kan magpuon an giyera, an mga lalaking taga Ukraine na an edad 18 sagkod 60 dai na tinugutan na maghali sa nasyon. Pero, an mga lalaki na siyudadano kan ibang mga nasyon pigtutugutan na maghali sa Ukraine.

Dara sana an mga kaipuhan ninda, idtong mga naghaharali nagsasarakay sa mga tren saka bus tanganing punan an sarong masakit na pagbiyahe para makahanap nin ligtas na lugar. Kun minsan, dai ninda aram kun sain sinda makakaabot. Dahil sa makusog nindang pagtubod ki Jehova, binayaan ninda an mga siyudad na apektadong marhay kan giyera, na mayo nin kasiguraduhan kun makakabalik pa sinda.

“Binayaan mi an gabos. Dikit sanang bagay an pigdara mi,” an sabi ni Yana. “Talagang ipinagirumdom sa samo kan sitwasyon na ini na an pinakamahalaga sana iyo an relasyon mo ki Jehova.”

Dangog-dangog sa harong ni Sister Lilia Antoniuk sa Kyiv an makusog na tanog kan sirena saka mga pagsabog nin bomba. Nakawararak sa tinampo an nagkasurulong mga awto saka nagkararaot na mga parte kan mga edipisyo asin tulay.

Si Lilia saka an saiyang 17 anyos na aking babayi na si Oleksandra nagdesisyon na maghali sa saindang nasyon. Mga pirang aldaw sindang nagbiyahe pasiring sa Poland sakay nin tren na surusuan an mga pasahero. Dikiton sana an kakanon ninda saka kinaipuhan nindang magtindog nin mga pirang oras. Nabawasan an kahaditan ninda kan makaabot sinda sa Przemyśl, Poland.

“Kan mahiling mi an mga tugang na igwa nin kapot na mga karatula na ‘JW.ORG,’ aram mi na magigin okey na an gabos,” an sabi ni Lilia. Dinara sinda sa sarong Kingdom Hall kun sain sinda maiimbungan, makakakakan, asin makakapahingalo bago sinda darahon sa harong kan mga tugang.

“Namatian mi an pag-ataman ni Jehova asin napakusog an samong pagtubod,” an sabi ni Lilia, na kan huri nagbiyahe pasiring sa Germany. “Nagpapasalamat nanggad ako ki Jehova sa pagkamuot niya asin sa mga tugang na handang tumabang sa masakit na mga panahon.”

Inistorya ni Sister Anastasiia Kovalyova an nangyaring pag-atake hali sa aire sa siyudad nin Zaporizhzhia. Nakahiling siya nin maliwanag na mga silyab hali sa mga kanyon asin nakadangog siya nin mga pagsabog sa saiyang apartment. An padagos na pambobomba nakaka-trauma sa mga aki pang pamangkin ni Anastasiia, na pito saka tulong taon an mga edad, kaya nagdesisyon an pamilya ninda na maghali. “Dahil dai kami makadara nin dakul na gamit, kulang an mga bado mi saka iba pang mga pangangaipo,” an istorya ni Anastasiia. “Pero inasikaso kaming marhay kan mga tugang. Igwa kami kan gabos na kaipuhan mi asin sobra pa ngani.” Si Anastasiia asin an saiyang hipag na si Anya saka an mga aki nagbiyahe pasiring sa Germany na nangangagi sa Poland.

Nagtatago si Sister Anastasiia Shchukina saka an saiyang ina na si Sister Olha Lysenko sa malipot na basement kan saindang sadit na harong kada madangog ninda an tanog kan sirena na nagpapatanid na may mangyayaring pambobomba. An mga sister na ini na payunir naglilingkod sa may dakulang pangangaipo sa sadit na banwaan nin Brailiv, Vinnytsia Oblast. Nasakitan sindang magdesisyon kun baga mahali o dai, pero nagdesisyon man giraray sindang maghali kan delikado nang marhay an sitwasyon. Dara sana an mga kaipuhan ninda, nagbiyahe sinda nin duwang aldaw sa tren na dikit sana an turog ninda. Bakong madali an pagbiyahe para ki Olha, na 58 anyos na asin may hilang. Nakaabot sinda nin alas 2:00 nin aga sa Rzeszów, Poland. Yaon duman an saindang mga kapagtubod tanganing sabaton sinda. “Dawa maagahon na, yaon an mga tugang naghahalat sa samo,” an sabi ni Anastasiia. “Grabe talaga an pasalamat mi ki Jehova saka sa mga tugang.”

Sa siyudad nin Sumy, nagtago si Brother Andrzej Chyba—sarong siyudadano kan Poland—saka an saiyang agom, si Elizabeth, na taga Britania, sa basement kan harong kan sarong tugang, kaiba an limang iba pa. Dangog-dangog an tanog kan mga fighter jet pati na an baradilan saka an pagsabog nin mga bomba. Nagkaigwa an mga tugang nin kusog nin buot paagi sa paghiling kan drama sa Bibliya na O Jehova, . . . sa Saimo Ako Nagtitiwala, na nagtatampok kan istorya manungod ki Hading Hezekias kan salakayon kan mga Asiriano an Jerusalem.

“Pinadarahan kami kan mga tugang nin manlain-lain na mensahe na hali sa Bibliya, arog kan pagpakusog samuya na basahon an Salmo 27,” an sabi ni Andrzej, na yaon na ngunyan sa Poland, kaiba an saiyang agom.

Nagtitiwala kita na bebendisyunan ni Jehova an mga tugang niyato na ‘tinalikdan an gabos na materyal na bagay’ mantang naglalaom sinda na maabot an panahon na mayo na nin giyera.—Filipos 3:8.