Kan Setyembre 1, 2022, maugmahon na marhay na isinagibo na giraray kan mga Saksi ni Jehova sa bilog na kinaban an gibuhon na midbid sinda, an paghuhulit sa harong-harong. Nakadagdag pa sa kaugmahan an espesyal na kampanya nin pag-alok nin mga pag-adal sa Bibliya sa bulan na iyan. Para sa nagkapirang tugang, magigibo na giraray ninda an kinatudan saka an gustong-gusto nindang paagi nin pagmiministeryo. Para man sa iba, ini an primerong beses nindang madudumanan an saindang mga pagtaraid para ihiras an mensahe kan Bibliya. Uni an nagkapirang eksperyensiya sa bilog na kinaban na nagpapahiling kan maugmang pagpupuon kan 2023 na taon nin paglilingkod.

Kan Setyembre 2, 2022, naghuhulit si Nicole asin Tina, na taga Petershagen sa North Rhine-Westphalia, sa sarong apartment building pero mayo sindang nakaulay. Kan pahali na sinda, nadangog ninda an sarong babayi na inaapod sinda. Sinabi kan babayi na dai niya tulos nabuksan an pinto kan magtuktok an mga sister saka pinapabalik niya sinda para pag-ulayan an Bibliya. Paglaog kan mga sister sa apartment kan babayi, nahiling ninda sa may lamesa an sarong gamit nang marhay na kopya kan Bagong Kinaban na Traduksiyon kan Banal na Kasuratan. Sinabi kan babayi na natawan siya kaiyan kan mag-istar siya sa Italy tulong taon na an nakaagi. Pero dai na siya nakaulay kan mga Saksi ni Jehova kan magbalyo na siya sa Germany kan mag-pandemya. Nagtao sinda nin contact information sa kada saro asin inimbitaran kan mga sister an babayi sa mga pagtiripon. Pakalihis nin duwang aldaw, nag-atender sa pagtiripon an babayi kaiba an duwang aki kaini. Nag-iskedyul nin pag-adal sa Bibliya an mga sister sa babayi.

May nakaulay si Manuel asin Karol Gastelum, na naglilingkod bilang mga espesyal payunir sa teritoryo na Mam an lengguwahe, na sarong mabuot na babayi na nagpadagos sa sainda sa harong kaini. Dai aram kan babayi na may pangaran an Diyos, kaya pinunan nindang pag-ulayan an leksiyon 04 na may titulong “Siisay an Diyos?” sa librong Mabuhay nin Maugma Sagkod Pa Man! Kan basahon ninda an Isaias 42:8, napangalas an babayi kan mabasa niya sa Bibliya niya an pangaran nin Diyos, na Jehova.

Napahibi an babayi saka sinabi na napag-isip-isip niya na bako lang pagkaigwa nin Bibliya an kaipuhan kundi kaipuhan niyang manudan an sinasabi kaiyan tanganing masunod niya an sinasabi nin Diyos diyan. Pagkatapos nindang pag-ulayan an leksiyon, grabe an pasasalamat kan babayi sa nanudan niya. Sinabi niya na iiistorya niya man iyan sa saiyang agom. Nag-iskedyul an mag-agom na Gastelum para ipadagos an pag-uulay sa Bibliya.

Mantang naghuhulit sa Yokohama si Brother asin Sister Nukamori, may nadumanan sindang harong na may intercom. Sarong babayi an nagsimbag sa sainda. Nagpabisto sinda sa babayi, asin sinabi na mga Saksi ni Jehova sinda. Sinabi kan babayi na halaton siya sa may pinto. Uruatyan, binukasan kan babayi an pinto asin sinabi, “Haloy ko nang pighahalat na may magbisita sako na mga Saksi ni Jehova.”

Sinabi kan babayi na nakipag-adal na siya nin Bibliya sa mga Saksi ni Jehova sa Nagasaki. Nagbalyo siya sa Yokohama kan mag-pandemya pero padagos pa man giraray siyang nag-adal paagi sa Zoom. Kan semana man sanang iyan, sabi saiya kan nagtutukdo saiya: “Igwang isasagibong kampanya sa Setyembre. Siguradong may madiyan saimo na sarong Saksi ni Jehova. Puwede kang mag-request saiya nin in-person na pag-adal sa Bibliya.” Ugmahon an babayi saka napapangalas na nahanap siya tulos kan mga Saksi. Sinabi kan babayi na gusto niyang mag-atender sa mga pagtiripon asin nagpa-iskedyul siya para sa sunod niyang pag-adal sa Bibliya.

Kan alukan nin sarong mag-agom an sarong babayi nin pag-adal sa Bibliya, sinabi kaini na nakipag-adal na siya nin Bibliya sa mga Saksi ni Jehova asin nakapag-atender pa ngani sa mga pagtiripon kan kongregasyon dakul na taon na an nakaagi. Haloy na niyang dai nakakaulay an mga Saksi asin nasusupog siya na hanapon sinda giraray ta dai man siya namumuhay kauyon kan mga prinsipyo sa Bibliya. Kan sabihon niya iyan, napahibi siya. Binasa saiya kan mag-agom an yaon sa Salmo 10:17 asin ipinaliwanag na dai siya nalilingawan ni Jehova. Inumaw ninda siya huli sa kagustuhan niya na sunudon an mga pamantayan ni Jehova. Nagtugot siya na makipag-adal nin Bibliya asin sinabi na gusto man na makanuod pa sa Bibliya an 16 anyos niyang aking lalaki.

Kan magbalik an mag-agom kan sunod na aldaw, naghahalat na an babayi saka an aki kaini. Pagkatapos na pag-adalan an leksiyon 01 kan brosyur na Mabuhay nin Maugma Sagkod Pa Man!, inimbitaran sinda kan mag-agom na mag-atender sa pagtiripon sa puro kan semana, asin nag-atender sinda. Gusto kan mag-ina na ipagpadagos an pag-adal saka an pag-atender sa mga pagtiripon.

Namibi si Ramon na makanumpong siya nin saro na mahuhulitan niya kan maugmang bareta sa primerong aldaw kan pagharong-harong niya giraray. Sa inot na harong na nadumanan niya, sarong babayi an nagbukas nin pinto saka nagsirip. Nagtaong galang si Ramon saka nagpabisto. Bago pa siya makapuon, an babayi nagsabi: “Hinahalat-halat ko talaga na mangyari ini. Pigpaparapamibi ko na magdigdi kamo sa harong ko.”

Sinabi kan babayi na nakaulay na siya kan mga Saksi mga pirang taon na an nakaagi asin nakapag-atender na man sa pagtiripon kan kongregasyon. Pero nagbalyo siya nin lugar kaya dai na siya nakaulay kan mga Saksi. Ipinaliwanag ni Ramon na ipinundo an paghuhulit ta sa harong-harong kan nagkaigwa nin pandemya. Dangan binasa saiya ni Ramon an Salmo 37:29 asin ipinaliwanag an areglo sa pag-adal nin Bibliya. Maugmang inako kan babayi an pag-adal sa Bibliya. Nag-iskedyul si Ramon para madalaw an babayi kan sarong sister.

Huli sa eksperyensiyang ini, sinabi ni Ramon: “Talagang ginigiyahan kita ni Jehova saka kan mga anghel para manumpungan an mga gustong magdangog.”

Kan may madumanan na harong sa Kentucky si Katelyn Thompson, narisa niya su nakasurat na mga teksto sa mailbox saka may sarong sadit na karatula sa natad na igwang nakasurat na “Namumutan Ka ni Jesus.” Kan nagtuktok si Katelyn sa pinto, sarong babayi an nagsimbag. Nagpabisto si Katelyn asin ipinaliwanag niya na dahil sa COVID-19 na pandemya dai nakaduman sa mga pagtaraid ninda an mga Saksi ni Jehova. Sinabi niya man na sa panahon nin pandemya pinakusog saka rinanga kan mga Saksi an iba paagi sa paggibo nin surat asin pag-apod sa telepono. Kinumusta ni Katelyn an babayi saka an pamilya kaini. Sinabi kan babayi na nagadan an ama niya kan may pandemya. “Nakaresibi ako nin mga surat hali saindo,” an sabi niya, “mati ko na garo baga itinatao nin Diyos an kaipuhan ko sa panahon na kaipuhan ko talaga iyan!” Ipinahayag ni Katelyn an saiyang pakikidumamay asin ipinakipag-ulay sa babayi an leksiyon 02 kan brosyur na Mabuhay nin Maugma Sagkod Pa Man! Binasa ninda an mga teksto sa leksiyon, asin idinuon lalo na an paglaom na pagkabuhay liwat sa maabot. Napahibi an babayi. Sinabi niya na eksaktong sarong taon na kan magadan an ama niya. Itinao kan babayi ki Katelyn an saiyang contact information asin nagtugot na dalawon siya giraray. Dai nahaloy, nakaresibi si Katelyn nin text hali sa babayi, na an sabi: “Salamat—kaipuhan ko talaga sa ngunyan nin pampakusog!”

Mayong duda na talagang binebendisyunan ni Jehova an paghuhulit ta giraray sa harong-harong asin an kampanya na makapuon nin mga pag-adal sa Bibliya. Inaabangan ta na an magagayon na resulta kaiyan!—Juan 4:35.