MAYO 3, 2022
MGA BARETA SA BILOG NA KINABAN
“Magdanay na Nakapokus sa Saindong Relasyon ki Jehova”
Napakusog kan Espesyal na Programa an mga Tugang sa Ukraine Asin Poland
Kan Abril 26, 2022, si Brother Mark Sanderson, sarong miyembro kan Namamahalang Grupo kan Mga Saksi ni Jehova, nag-abot sa Poland para pakusugon sa espirituwal an mga tugang na apektado kan nangyayaring giyera sa Ukraine.
Mga brother sa Poland na nag-aasikaso kan teknikal na aspekto kan programa sa Assembly Hall
Inimbitaran an gabos na kongregasyon sa Poland saka Ukraine sa sarong espesyal na programa na ginibo kan Abril 30, 2022. Sa Poland, an mga refugee na haling Ukraine saka an mga nagtatabang sa pag-ayuda iyo an mga inimbitaran na mag-atender nin personal sa Assembly Hall sa Warsaw. Kaiba na an mga nakakonektar paagi sa videoconference, inabot nin labing 250,000 na mga tugang sa Poland saka Ukraine an nag-atender sa programa.
“Pirmi kamong nasa isip kan mga tugang sa bilog na kinaban asin ipinapamibi ninda kamo,” an sabi ni Brother Sanderson. “Sa world headquarters, aroaldaw na sinasambit sa mga pamibi an mga tugang sa Russia saka Ukraine, pati na sa mga pamibi sa mga miting kan Namamahalang Grupo.” Inasigurar niya sinda na “an pakaeksperyensiya nin kasakitan dai nangangahulugan na mayo na an pag-uyon ni Jehova. Nahihiling niya kamo, namumutan niya kamo, asin harani siya lalo na sa mga nagsasakit.”
Sarong grupo nin mga tugang na napiritan na maghali sa lugar ninda sa Mariupol, Ukraine, na naghihiling kan espesyal na programa
Sinabi pa ni Brother Sanderson: “Magdanay na nakapokus sa saindong relasyon ki Jehova. An pasuhan ta bako lang magdanay na buhay, kundi an gusto ta iyo na malampasan an mga kasakitan na ini na igwa nin mas makusog na pagtubod saka mas harani ki Jehova. Iyan an itinutukdo sato ni Jehova.”
Si Serhiy, na sarong elder sa Odessa, Ukraine, nagsabi: “Sa nakaaging mga semana, mayo akong tultol na turog dahil sa paghadit, kamunduan, saka takot. Pero, napakusog [kan espesyal na programa] an kumbiksiyon ko na nagmamalasakit si Jehova sa mga lingkod niya bako lang bilang sarong grupo kundi nagmamalasakit siya sato bilang indibidwal.”
Si Tatiana, na sarong sister na refugee na taga Kyiv, Ukraine, nagsabi: “Namatian ko ngunyan na haranihon sako si Jehova. Garo ako kinukugos ni Jehova asin mati-mati ko an pagkamuot niya. Maski yaon man sain kita, pirmi tang kaibanan si Jehova.”
Namumutan tang marhay an satong mga tugang, asin nagtitiwala kita na naipagirumdom sa sainda kan espesyal na programa an “maimbod na pagkamuot” ni Jehova sa mga lingkod niya.—Salmo 136:1.
