HUNYO 9, 2022
MGA BARETA SA BILOG NA KINABAN
Mga Refugee na Taga Ukraine Naghihinguwa na Magpuon nin Bagong Buhay sa Ibang Nasyon
Si Iryna Makukha na nakaistar na ngunyan sa Czech Republic
Kan magpuon an giyera sa Ukraine, si Iryna Makukha, sarong 46 anyos na daing agom na sister, nagpasiring sa istasyon nin tren sa Kharkiv. Nagdesisyon siya na mas magigin ligtas siya kun mahali siya sa saindang nasyon. Sa karibarawan, nagsarakay an mga tawo sa mga tren na dai aram kun pasain talaga iyan. An tren na nasakayan ni Iryna naghali sa istasyon na may tahob an mga bintana para mabawasan an peligro na atakihon iyan. Pakahali kan tren sa istasyon saka niya lang naaraman na pasiring palan sinda sa Slovakia.
Nakaistar ngunyan si Iryna sa kataid kaiyan na nasyon, sa Czech Republic. Nakaabot siya sa kabiserang siyudad kaiyan na Prague kan Marso 3, 2022. Nakakua siya nin trabaho bilang sarong paralinig, asin nakaistar siya sa sarong apartment kaiba an duwang sister na taga Ukraine, na mga refugee man. Nag-aadal si Iryna nin lengguwaheng Czech asin ipinagpadagos niya an bilog na panahon na ministeryo, na iyo an nagin pokus kan buhay niya sa nakaaging 20 taon.
“Nahiling ko mismo kun paano kami inasikaso ni Jehova sa tabang kan mga lingkod niya. Napakusog kaiyan na marhay an pagtubod ko,” an sabi ni Iryna.
Haros 23,000 na tugang niyato an personal na nagdesisyon na magdulag pasiring sa ibang nasyon. An mga nagdesisyon na mag-istar sa ibang nasyon tibaad nasa mas ligtas na lugar, pero kaipuhan pa man giraray nindang maghanap nin trabaho saka madadagusan, magkua nin legal na mga dokumento, asin ienrol an saindang mga aki sa bagong eskuwelahan, mantang nag-aadal nin bagong lengguwahe. Nahiling ninda na dakulaon na tabang an saindang espirituwal na rutina saka an mamumuton na mga tugang sa dipisilon na panahon na ini.
Si Anatoli, Olena, asin Alina Perceac na yaon na ngunyan sa Romania
An tulong miyembro kan pamilyang Perceac, si Anatoli, Olena, asin an 17 anyos na si Alina, nagpupuon nin bagong buhay sa Romania pagkatapos na bombahon an lugar ninda sa Mykolaiv Oblast, Ukraine. Nagbalyo an pamilya ninda kan Marso 6, 2022. Bilang siyudadano kan Moldova, tinugutan si Anatoli na darahon an saiyang pamilya sa Romania. Ilinadawan ni Olena an pagbalyo sa ibang nasyon na garo “paggabot sa daga sa sarong kahoy kaiba an mga gamot kaiyan asin pagtanom kaiyan sa ibang lugar.”
Sa tabang kan mga tugang sa Romania, nakaistar na sinda ngunyan sa sarong apartment. Apuwera kaiyan, pareho man nakakua nin trabaho si Anatoli saka si Olena, asin natapos ni Alina sa online an mga kaipuhan niyang gibuhon sa eskuwelahan ninda sa Ukraine.
Tinatabangan kan mga tugang sa Romania an pamilya ninda bako lang sa praktikal na paagi kundi pati man sa emosyonal asin espirituwal. Regular na nakikiiba-iba sa sainda an mga tugang tanganing dai ninda mamatian na nagsosolo sinda sa sarong lugar na dai pamilyar sa sainda. Nakakanuod si Olena asin Alina nin Romanian paagi sa paggamit kan JW Language app asin pagpartisipar sa ministeryo kaiba kan bago nindang mga kakongregasyon. Romanian an dinakulaan na lengguwahe ni Anatoli.
“Puon sa puon, nahiling mi an kamot ni Jehova,” an sabi ni Anatoli. “Paagi sa organisasyon asin sa suporta kan mga tugang, namatian mi an pagkamuot ni Jehova.”
Si Vladyslav Havryliuk asin an saiyang ina, si Alina, na yaon na ngunyan sa Poland
Bago pa man magpuon an giyera, balo na si Alina Havryliuk. Siya saka an 16 anyos niyang aki na si Vladyslav nakaabot sa Suwałki, Poland, hali sa Vinnytsia, Ukraine, kan Pebrero 27. “Kan inot, iniisip-isip ko kun sain kami kan aki ko maistar saka kun ano an magigin pagbuhay mi, pero nagtitiwala ako na aatamanon kami ni Jehova,” an sabi ni Alina.
Tulos-tulos na naghanap an 37 anyos na si Alina nin trabaho na dai makakaulang sa mga pagtiripon. Nakakua siya nin trabaho bilang paralinig sa sarong eskuwelahan. “An pinakaimportante, dahil sa trabahong ini mas dakul akong pagkakataon na magpartisipar sa ministeryo asin nasusuportaran ko an pamilya mi,” an sabi niya.
Nag-aadal si Alina asin Vladyslav nin lengguwaheng Polish asin dagos-dagos na naglilingkod bilang mga auxiliary payunir sa sarong kongregasyon na Polish an lengguwahe. Nag-enrol na man si Vladyslav sa hayskul.
An satong mga tugang na taga Ukraine nag-aagi nin grabeng mga kadipisilan asin pagbabago, pero padagos sindang tinatawan ni Jehova nin puwersa na urog kisa sa ordinaryo. Nagin totoo sa sainda an mga tataramon sa 2 Corinto 4:8: “Ginigipit kami nin grabe sa lain-lain na paagi, pero bako man su biyo nang dai nakakahiro; ribaraw kami, pero bako man su dai na nanggad nin maluluwasan.”
