Kan Hunyo 1, 2023, binuksan na giraray an mga tour kan dakul na pasilidad kan Bethel sa bilog na kinaban. Labing tulong taon man na ipinundo nguna an mga tour huli sa COVID-19 na pandemya. Espesyal na aldaw idto para sa mga miyembro kan pamilyang Bethel sa bilog na kinaban asin para sa ribo-ribong nag-tour.

Pag-abot kan mga bisita, maugma sindang inako kan mga Bethelite paagi sa mga banner, mga kanta, maugmang ngirit, asin mamumuton na kugos. Si Ellis Bott, na nagpuon na maglingkod sa world headquarters sa Warwick, New York kan panahon nin pandemya, nagsabi: “Nakakaugma talagang mahiling an mga Bethelite na nakarilinya sa luwas kan lobby tapos may mga kapot na banner! An mga luha dahil sa kaugmahan na nahiling ko nagpagirumdom sako kun gurano talaga kaespesyal an Bethel.” Si Alexis Alexander, sarong part-time commuter Bethelite, ugmahon na marhay na makaiba sa pagsabat saka pag-welcome sa mga nag-aarabot para mag-tour. Sinabi niya: “Espesyal talaga na mahiling mismo an pagkamuot kan mga tugang ki Jehova asin sa Saiyang harong.”

Ugmahon si Mi-yeon Jo ta maiiba niya na man giraray an saiyang otso anyos na aking lalaki na si Yoon sa sangang opisina sa South Korea para mag-tour. Excited nang marhay si Yoon na mag-tour sa Bethel kaya haros dai siya nakaturog kan banggi bago kaiyan. Sinabi ni Mi-yeon: “Pagmata mi pa sana, pinatugtog mi tulos su kanta ni Caleb saka Sophia na nagbibisita sa Bethel. Pati ngani sa kotse pigdadangog mi iyan mantang nagbibiyahe kami pasiring sa Bethel.” Nag-enjoy talaga si Yoon sa tour kaya sinabi niya: “An kulang na lang po sa Bethel mga hayop, tapos paraiso na iyan.”

Si Noah Johnsen, sarong hoben na lalaki na taga Alberta, Canada, na may hilang na spinal muscular atrophy, haloy nang gustong makabisita sa Bethel sa New York, U.S.A. Dai siya puwedeng magbiyahe sa eroplano huli sa kondisyon niya, kaya nagmaneho an mga magurang niya nin mga 4,100 kilometros para mag-tour sa sangang opisina kan Estados Unidos sa Wallkill, New York. Kun manungod sa saiyang tour, sinabi ni Noah: “Saro sanang tataramon an naiisip ko sa pag-tour na ini—pagkamuot. Namatian ko an pagkamuot ni Jehova saka an pagkamuot kan mga tugang.”

An 76 anyos na si Fyodor Zhitnikov asin an saiyang agom, na si Yulita, ugmahon na marhay na mag-tour sa museum na nasa pasilidad kan Bethel sa Kazakhstan. Saro sa mahihiling sa museum an mga istorya kan nagkapirang mga tugang na maimbod na nagtagal sa laog nin mga dekada. Espesyal na marhay para ki Fyodor an eksibit na iyan dahil naglingkod siya kaiba kan dakul sa sainda. Napahalagahan na marhay ni Fyodor an ginibong trabaho sa pagpreparar kan eksibit. Sinabi niya: “Kun pinahalagahan saka ginirumdom ngani kan mga tugang an dakul na taon na paglilingkod ta, mas lalo nang gigirumdumon asin papahalagahan ni Jehova an gabos na ginigibo kan kada saro sa sato sa paglilingkod sa saiya.”

Nauugma kitang i-welcome giraray an mga nagbibisita sa mga pasilidad kan Bethel sa bilog na kinaban. Asin gustong-gusto ta nang akuon an ribo-ribo pang ma-tour sa maabot na mga aldaw!—Salmo 122:1.

Mahihiling sa ibaba an mga ritrato kan satong mga tugang na nag-tour sa manlain-lain na mga pasilidad kan Bethel asin mga museum.