Puon kan Abril 1, 2022, nagbalik na an mga Saksi ni Jehova sa pagtiripon sa mga Kingdom Hall. An ano man na kahaditan na namatian kan satong mga tugang marikas na nasalidahan nin ngiriritan, luha dahil sa kaugmahan, asin maugmang pagkanta nin mga kanta na pang-Kahadian.

Para sa iba, iyan an primero nindang pag-atender sa Kingdom Hall.

“Ini an primero kong pag-atender sa pagtiripon sa Kingdom Hall,” an sabi ni Brother Krzysztof Hoszowski na taga Poland. “Nanudan ko an katotoohan paagi sa videoconference tapos kan nabawtismuhan ako naka-stream iyan sa Zoom. Aram ko kun paano ginigibo an mga pagtiripon sa Kingdom Hall ta nakahiling na ako nin dakul na video manungod diyan. Maugmahon ako dahil sa pagkamuot, kaugmahan, saka kabuutan kan mga tugang na naeksperyensiyahan ko sa pagtiripon.”

Kan magpuon na an paglakop kan COVID-19 sa bilog na kinaban kan Marso 2020, pinunan kan mga Saksi ni Jehova an saindang mga pagtiripon paagi sa videoconference. An mga dai makakaatender sa mga pagtiripon sa Kingdom Hall puwede pa man giraray makaatender paagi sa videoconference.

“Kan magpuon na an musika saka kan magkanta na ako kan inot na kanta, grabe an kaugmahan ko saka pasasalamat dahil pakalihis nin duwang taon nakaibanan ko man giraray an mga tugang sa inot na pagkakataon,” an sabi ni Brother Neil Campbell na taga Edinburgh, Scotland.

Nagpapasalamat kita ki Jehova ta binendisyunan niya an pagtiripon ta giraray sa Kingdom Hall.—Salmo 84:10.