NOBYEMBRE 2, 2021
RUSSIA

Limang Pigsangatan nin Kaso sa Sakhalin Nagsasarig ki Jehova Para sa Suporta

I-PLAY

UPDATE | Kan Enero 31, 2022, hinatulan kan Nevelskiy City Court of the Sakhalin Region na nagkasala si Brother Vyacheslav Ivanov, Aleksandr Kozlitin, Sergey Kulakov, Sister Tatyana Kulakova, asin Brother Yevgeniy Yelin. Pinatawan si Sergey asin Yevgeniy nin suspended prison sentence na anom na taon asin anom na bulan. Si Vyacheslav, Aleksandr, asin Tatyana pinatawan man nin suspended prison sentence na duwang taon. Dai sinda kaipuhan na ipreso ngunyan.

Time Line

Hulyo 2020

Tinawan nin mga restriksiyon sa pagbiyahe si Vyacheslav, Aleksandr, Sergey, asin Tatyana
Abril 2, 2020

Tinawan nin mga restriksiyon sa pagbiyahe si Yevgeniy
Enero 20, 2019

Pig-raid kan mga pulis kan Federal Security Service (FSB), an secret police kan Russia, an dai mababa sa 11 harong nin mga pigsususpetsaran na Saksi ni Jehova. Agresibo an mga pulis, asin pig-usisa ninda an menor de-edad na mga aki sa mga pamilya. Nangyari ini dai nahaloy pagkatapos na mangako si Presidente Vladimir Putin kan Russia na iimbestigaran an ginigibong persekusyon sa mga Saksi ni Jehova

Profile

Sergey Kulakov

Namundag: 1961 (Nevelsk, sa Rehiyon nin Sakhalin)

Biograpiya: Nag-eskuwela sa sarong boarding school puon 14 anyos. Nagkakawat nin soccer saka chess kan aki pa. Naggradwar sa sarong vocational school asin nagsanay bilang sarong mekaniko nin barko. Retirado na ngunyan

Pakalihis kan mga taon 2000, siya saka an saiyang agom, si Tatyana, nagpuon na mag-adal nin Bibliya. Napahiro siya kan pagkamuot na nahiling niya sa mga Saksi ni Jehova, kaya nagpabawtismo siya kan 2008. Igwa sinda nin duwang aking lalaki

Personal na Komento

Sa anong espesipikong mga kadipisilan ka tinabangan ni Jehova na makatagal?

An pinakamasakit na gibuhon iyo an magdanay na kalmado asin maugma. Paagi sa pagigin sibot sa espirituwal na mga bagay, napatunayan ko an sinabi sa tataramon nin Diyos: “Sa tawong maimbod mapahiling ka nin kaimbudan.” (2 Samuel 22:26) Padagos na nagkusog an pagkamuot saka pagtitiwala ko ki Jehova. Nakatabang man iyan sako na dai maghadit sa mga puwedeng mangyari sa maabot, ta kontrolado niya an gabos na bagay.

Tatyana Kulakova

Namundag: 1973 (Nevelsk, sa Rehiyon nin Sakhalin)

Biograpiya: Puon sa pagkaaki, gustong-gusto niya an pagbasa, pagdrowing, asin musika. Nagtrabaho bilang paraplaster asin pintor. Nagpakasal ki Sergey kan 1996, asin igwa sinda nin duwang aking lalaki

Nahiling an kahalagahan kan Bibliya kan maaraman niya an sinasabi kaiyan manungod sa katuyuhan para sa daga asin sa kamugtakan kan mga gadan. Nabawtismuhan bilang Saksi ni Jehova kan 2003

Personal na Komento

Anong teksto an nakatabang saimo na magin makusog an buot o makatagal na may kaugmahan?

Kan pag-raid ninda sa harong mi, asin pagkatapos, kan sangatan ninda ako nin kaso tapos kaipuhan kong magduman sa FSB, napakusog ako kan mga sinabi ni Eliseo sa saiyang lingkod: “Huli ta mas dakul an kaiba ta kisa sa mga kaiba ninda.” Pig-imahinar ko na an Makakamhan sa Gabos, si Jehova, pati man si Jesus saka an dakul na anghel nasa kataid ko. An arog kaiyan kakusog na suporta nakatabang sako na magibo an mga kaipuhan kong gibuhon imbes na magparahadit.

Yevgeniy Yelin

Namundag: 1974 (Yuzhno-Sakhalinsk, sa Rehiyon nin Sakhalin)

Biograpiya: Gustong-gusto niya an pagdrowing puon kan aki pa. Nagtrabaho bilang home designer. Igwa siya nin sadiring kompanya na nagre-renovate. Nagdidisenyo man siya asin naggigibo nin mga muwebles

Nagpuon na mag-adal nin Bibliya kan siya nasa hayskul. Kan mga 1990, may nabisto siyang mga Saksi ni Jehova asin napahanga siya huling isinasabuhay ninda an mga prinsipyo sa Bibliya. Nabawtismuhan kan 1992. Ikinasal sinda kan saiyang agom na si Anastasia kan 2017

Personal na Komento

Ano an masasabi mong dapat gibuhon kan mga nag-aandam sa posibleng persekusyon?

Sasabihon ko sainda na panuon an saindang isip saka puso nin espirituwal na mga bagay. Importanteng marhay na sunudon an instruksiyon kan organisasyon. Hinahalat-halat ta na an kautuban kan mga propesiya may koneksiyon sa bagong kinaban, pero an persekusyon parte kan mga propesiyang iyan na talagang mangyayari. Pag napapaatubang kita sa persekusyon, nagigin parte kita kan kautuban kan propesiya. Espesyal nanggad na pribilehiyo iyan!

Aram ta na padagos na aatamanon ni Jehova an satong namumutan na mga tugang mantang sinda mismo kumbinsido sa mga sinabi ni propeta Isaias: “An Diyos iyo an sakong kaligtasan. Magtitiwala ako asin dai matatakot na marhay.”—Isaias 12:2.

MGA NEWS RELEASE