Kan Abril 20, 2022 an ikalimang taon puon kan bakong makatanusan na ipagbawal kan Russia an mga aktibidad kan Mga Saksi ni Jehova. a Taon-taon puon kan ipagbuot an pagbabawal mas pinagrabe pa kan mga awtoridad sa Russia an persekusyon—kun minsan pigkukulgan pa ngani ninda nin grabe sa pisikal an mga tugang. Alagad, arog kan mahihiling sa mga bareta sa jw.org, an satong namumutan na mga tugang may kusog nin buot na nakakatagal.

Nagpahiling nin marahayon na halimbawa si Brother Dennis Christensen, na malimang taon nang nakapreso. Tulos-tulos, pagkatapos na madaog an pag-apelar niya sa kaso kan Mayo 2019, kalmado asin may kumpiyansa niyang sinabi sa gabos na tugang na yaon duman sa korte para suportaran siya: “Ginigibo ko an gabos kong makakaya para paglingkudan si Jehova. Gigibuhon ko iyan sagkod lamang.”

Arog man kaiyan an determinadong gibuhon ni Brother Igor Turik. Nagirumduman niya kan magkamidbidan sinda ni Brother Nikolay Kalibaba, na nakaeksperyensiya nin persekusyon kan panahon nin Sobyet. Itinukdo ni Nikolay ki Igor na an mga pagbalo nakakatabang sa mga lingkod ni Jehova na mahiling kun paano Siya nagtatao nin tabang. Sinabi ni Igor, “Malinaw sa sako na sarong pribilehiyo na magsakit nin dahil sa pagtubod.” Padagos na nagtatagal si Igor sa ibong kan pitong taon na suspended prison sentence sa saiya.

Ipinaliwanag ni Brother Yevgeniy Fedin an saiyang kumbiksiyon: “Bako ini an panahon para ipakipaglaban an personal na hustisya. Kaipuhan ta na magpatotoo—itatao ni Jehova an hustisya. Nakikipaglaban kita para sa bendisyon . . . Nakakatabang sa sako an mga kaisipan na ini na magkaigwa nin tamang sabuot sa mga pagbalo, dawa ano pa an magin resulta kaiyan. An kada pagbalo sarong oportunidad na mapamuraway si Jehova asin makapagpatotoo.”

Kaagid kaiyan, sinabi ni Sister Tatyana Zhuk: “Pag iniisip ta an mga napangganahan ta, napapahiro kita na padagos na magtagal sa mga pagbalong ini. Patunay iyan na nasa kaibanan ta si Jehova. Imposible na mapagdanay ta an kaugmahan niyato sa presenteng mga kamugtakan na ini kun mayo an tabang kan satong Ama sa langit.”

“Mga mapanggana kita!” an sabi ni Yevgeniy, na sinambit sa inutan. “Pigdedetenir kita pero minaluwas kitang mapanggana. Pigdadara kita sa korte pero minaluwas kitang mapanggana. Pigpepreso kita pero minaluwas kitang mapanggana.”

Bago ipinaisi an pagbabawal kan 2017, si Dr. Emily Baran, na sarong historyador asin ekspertong nag-adal manungod sa mga Saksi ni Jehova kan Unyon Sobyet, nagsurat: “Kun pagbabasaran sana an kasaysayan, imposibleng mahali kan Russia an mga Saksi ni Jehova.”

Malinaw na an propesiya sa Isaias 54:17 nauutob sa mga tugang niyato sa Russia asin sa Crimea: “Mayong armas na ginibo laban sa [sainda] an magigin mapanggana.”